Mabande a Video Apāna Bukamoni
1 “Wetu mwana washilwile kubandila bande wa video aye kaendele ne kwenda kwine. Wadi umubandila misunsa ne misunsa. Bine, i kya kutendelwa mpata pa kwikala na bingidilwa bikomeneja mu betu bana buswe bwa kuswa Yehova!” Le uno bande wa video usekununa uno mbutwile mwine Kidishitu i bande’ka? I bande wa video udi na mutwe wa mwanda unena’mba Noé : il marchait avec Dieu. Lolo umo wakubulwa kwikala Kamoni nandi wadi na mwana watadile uno bande kwa bene, kupwa watumina musambo kyabuntu kya madolala 90 ne kulomba shi kudi mabande a video makwabo a banuke. Bine, mabande a video alupulwa na bulongolodi bwa Yehova ateñanga mpata banuke ne batame bene kumo.
2 Mu Kisaka: Kisaka kimo pokyapwile kutala bande wa video La fermeté des Témoins de Jéhovah face à la persécution nazie, inabana wanene amba: “Nadi nanguluka difuku dyonso, muswelo waikele Yehova kupa bano bantu bitupu bukomo bwa kūminina masusu keaneneka! Ponangulukanga pa bino bintu monanga amba myanda intananga i mityetye mpata. Kubandila kotwabandile uno bande wa video na betu bana kwebakweshe bamona patōkelela amba i biyampe kwiubija mudi Yehova. Kadi kwisamba kotwesambīle’po nabo pamo kwakweshe betu bana bana-bakaji bekale kwikumbanya senene mwa kulwila na mitabakano ne kupangwapangwa ko-konso kukokeja kwibafikila.”
3 Ku Masomo: Nkasampe umo Kamoni wa Yehova walombwele kipindi kimo kya bande wa video La fermeté ku bobafunda nabo bu devwala ya kunena ku masomo. Ku ngalwilo mwadimu wādi unena amba nshikilwe Batumoni. Ino paapwile kubandila uno bande wa video, wanena’mba: “Uno bande waalamuna mpata muswelo onadi mwene Batumoni ba Yehova. Pano natyipe amba shi abaiya dikwabo ku yami njibo, nkebevwana ne kushilula kwifunda nabo Bible!” I kika kyaalamwine mumweno wadi witumona uno lolo mwadimu? Aye mwine unena amba i bwetu “buswe bwabine ne dikōkeji.”
4 Mu Mwingilo: Kaka umo wetene na mwana-mukaji wadi wikaka kutambula etu mabuku, nansha byaadi na bipangujo pa myanda itutala ne pa nkulupilo yetu. Kaka wajokela’ko monka na bande wa video Les Témoins de Jéhovah : un nom, une organisation, batala’ye na uno lolo ne mulumyandi. Bonso batulumuka mpata, baitabijija kifundwa kya Bible. Musapu obebasapwidile pa kwibatenga, bashilula kukwatañanya būmi bwabo na kiswa-mutyima kya Leza.
5 Lelo wingidijanga mabande etu a video mwanda wa kulupula nao bipa bivule?