Bingidilwa Bifundija, Bikunka ku Mityima Kadi Bikankamika
1 Bidi na bufundiji bwa bukomo bukatampe bwa kufundija bantu myanda itala pa Bible ne pa Batumoni ba Yehova. Bikunkanga ku mityima ya bantu bavule ne kwibemanija nshinkidingi mu bubinebine. Biningisha lwitabijo lwa bangi bene ne kulengeja bantu kebatendela bantu ba Leza bepāne. Lelo i bika bine’byo? Ke mabande video alupulwa na bulongolodi bwa Yehova kadi. Lelo kodi mwiatale ao onso dikumi? Le ke peje mafuku anga kasha wiatala? Lelo wiengidijanga mu mwingilo obe? Pakwabo kadi, betuyukije ku kitango kya distrike amba kubatambe bande wa video wa 11 unena’mba Toute la communauté de nos frères. Lelo nobe kodi mumulombe? I muswelo’ka nobe obwanya kumwena bininge mu bino bingidilwa bitulumukwa?
2 Kiteba kya Mulami kya difuku 1 Kweji 7, 1999, mu kishinte “Mwifundei Kinenwa kya Leza mu Kisaka Kitatyi ne Kitatyi,” kyetusoñenye amba, “ku kitatyi kya kifundwa ufwaninwe kushiya’ko ne kya kutala kipindi kya bande wa video, umo wa mu mabande ōbaka alupwilwe na Sosiete . . . kupwa mwesambila’po.” Kukwatañana na ano madingi malumbuluke, tukanza kutūla bande umo wa video mu mpangiko ya Kupwila kwa Mingilo kwa mu kweji ne kweji. Tukankamika mwanetu yense udi mu kipwilo atale bande wa video ku njibo kumeso kwa kwiya kwisambila’po ku Kupwila kwa Mingilo.
3 Uno kweji tukashilula na bande wa video umbajinji otulupwile, Les Témoins de Jéhovah — Un nom, une organisation. Tala’ye ne kwivwana byobanena’mo mwa kukalondolwela ku bino bipangujo:
◼ Batumoni ba Yehova i bayukane bininge pa mwanda wa bintu’ka?
◼ Byonso bilongwa ku Betele bimanine pa kisonekwa’ka?
◼ Lelo i kyakumwenako’ka kya mu Bible kyowamwene bekitadije kamera, bekikwata mafoto, kupwa bekifwatula mwanda wa kwingidija’kyo mu mabuku?
◼ I kika kyakutulumwine mu muswelo upungwa etu mabuku?
◼ Le i mabuku anga alupwilwe na Sosiete tamba mu 1920 kutūla ne mu 1990?
◼ Mu bantu ba Leza, i bāni nakampata bafwaninwe kubwanya bisakibwa mwa kukengidila ku Betele?—Nk. 20:29.
◼ Kisaka kya Betele kipānanga namani kifwa kilumbuluke ku Batumoni ba Yehova bonso?
◼ I bika byakutengele ku mutyima mu mingilo ingilwa ku Betele mwanda wa myanda miyampe ifikile bantu bavulevule?
◼ I muswelo’ka ukwatakanibwanga mwingilo wingilwa ntanda yonso?
◼ I mwingilo’ka otufwaninwe kukwatakanya na bupyasakane, ne tukeukwatakanya na mushipiditu’ka?—Yoa. 4:35; Bil. 1:8.
◼ I muswelo’ka nobe omwene bulongolodi buselele dyetu dijina?
◼ I muswelo’ka obwanya kwingidija ino video mu mwingilo?
Mu Kweji wa 12 tukesambila pa bande wa video La Bible : Un récit historique exact des prophéties dignes de foi.