Le Mfulo Ikafika Kitatyi’ka? Byānenene Yesu

LANGULUKILA PA BINO BINTU BIBIDI BYĀNENENE YESU PA MWANDA UTALA MFULO:

“Nanshi, keshai’nka kukesha, mwanda kemuyukilepo difuku nansha nsá mine.”​—MATEO 25:13.

“Talai’nka kutala, kemwakilālai, mwanda kemuyukilepo kitatyi kitungwe pokikafika.”​—MAKO 13:33.

Nanshi i kutupu muntu nansha umo pano pa ntanda uyukile kitatyi kine kisa kufula ino ngikadilo ya bintu. Inoko Leza i mutonge “kitatyi kitungwe”​—ko kunena’mba “difuku ne nsá mine” ya kufika mfulo. (Mateo 24:36) Le ko kunena’mba kekudipo muswelo wa kuyuka shi mfulo ibafwena? Aa, udi’ko. Yesu wāsapwidile bandi bana ba bwanga bate mutyima ku bintu byadi bya kulombola’mba mfulo ibafwena.

KIYUKENO

Bino bintu byadi bya kwikala bu kiyukeno kya kuyukila’po “mvuyo ya ngikadilo ya bintu.” Yesu wānenene amba: “Muzo ukatamba muzo mukwabo ne bulopwe nabo bulopwe bukwabo, kadi kukekala bimpengele bya nzala ne kutenkana kwa ntanda byadi koku kebidi koku.” (Mateo 24:3, 7) Kadi wānenene amba kukekalanga “bipupo bya misongo.” (Luka 21:11) Lelo umonanga bino bintu byālaile Yesu?

Bantu dyalelo basusukanga na mavita, bipupo bya nzala, kutenkana kwa ntanda, ne misongo yadi yoi ke yoi. Kimfwa mu 2004, kutenkana kwa ntanda kuvule kwalongekele mu dijiba dya India, kwaletele kintenshi kya tsunami kyaipaile bantu kubwipi kwa 225 000. Mu myaka isatu, kipupo kya COVID-19 kyaipaile kintu kya bantu midiyo 6 ne musubu ntanda yonso. Yesu wānenene amba, bintu bya uno muswelo bikalombola’mba mfulo ya ino ngikadilo ya bintu ibafwena.

“MAFUKU A MFULO”

Bible utelanga kitatyi kilondakana na mfulo bu “mafuku a mfulo.” (2 Petelo 3:3, 4) Kisonekwa kya 2 Temote 3:1-5 kinena’mba, mwiendelejo wa bantu wadi wa koneka bininge mu mafuku a mfulo. (Tala kapango kanena’mba “Kumeso’tu kwa Mfulo ya Ntanda Kufika.”) Le umonanga bantu dyalelo badi na ngikadila ya kwisakila, makomwa-meso, bukalabale ne kubulwa buswe? Buno nabo i bubinga bulombola’mba mfulo ya ntanda keidi pabwipi bininge.

Le mafuku a mfulo akalonga bitatyi binga? Mungya Bible, i ‘kakitatyi katyetye’tu.’ Ebiya, Leza ukonakanya “boba bonakanya ntanda.”​—Kusokwelwa 11:15-18; 12:12.

NTANDA MIPYA IBAFWENA!

Leza ke mutunge kala difuku ne nsá yasa kufudija ino ngikadilo mibi ya bintu. (Mateo 24:36) Inoko mwanda muyampe bininge i uno, Leza “kasakilepo muntu nansha umo oneke.” (2 Petelo 3:9) I mupe bantu mukenga wa kulonda misoñanya yandi. Mwanda waka? Mwanda usakanga tukapande ku mfulo ya ino ntanda ne kutwela mu ntanda yandi mipya, kitatyi kikālamunwa ntanda ke paladisa.

Leza i muteakanye bufundiji bwa kukwasha bantu bayuke bya kulonga pa kukekala mu ntanda mipya ikaludikwa na Bulopwe bwandi. Yesu wālaile amba myanda miyampe ya Bulopwe bwa Leza ikasapulwa “pa ntanda yonso ikelwe na bantu.” (Mateo 24:14) Batumoni ba Yehova ba ntanda yonso baloñanga mansá midiyala ne midiyala, pobasapwila bantu ne kwibafundija musapu wa mu Bible uleta lukulupilo. Yesu wānenene amba, uno mwingilo wa busapudi ukengilwa ntanda yonso kumeso kwa mfulo kufika.

Kitatyi kya bantu kuludika kekidi’tu ku mfulo. Ino mwanda muyampe i uno amba, ubwanya kupanda ku mfulo ya ino ntanda ne kutwela mu ntanda mipya ilaile Leza. Kishinte kilonda’ko kisa kwisambila pa byobwanya kulonga pa kusaka’mba ukekale mu ntanda mipya.