Bintu Byobwanya Kulonga pa Kukekala mu Ntanda Mipya

Kishinte kibadikile kibalombolanga’mba Leza usa konakanya panopano ponka bantu bampikwa bwine Leza ne kutalula’ko makambakano onso. Tubwanya kukulupila’mba kino kikalongeka. Mwanda waka? Mwanda Bible, Kinenwa kya Leza, i mulaye amba:

“Ino ntanda ipitanga.”—1 YOANO 2:17.

Tubwanya kukulupila’mba kukekala bantu bakapanda mwanda kino kisonekwa i kilaye monka’mba:

“Yewa ulonga kiswa-mutyima kya Leza udi’ko nyeke.”

Nanshi shi tusaka kupanda tufwaninwe kulonga kiswa-mutyima kya Leza. Inoko pa kuyuka kiswa-mutyima kya Leza, tufwaninwe bidi kumuyuka aye mwine.

‘ENDELELA KUYUKA’ LEZA AMBA UKAPANDE KU MFULO

Kifwatulo: 1. Muñanga umo ushikete panshi ku lupitalo, mukōke kadi ñeni mimuvutakane. 2. Ukōkolokwa mobadīlanga, wamone obengilanga nandi utanga dipepala na nsangaji. 3. Obengilanga nandi umutangila vese mu Bible, wamupe kalata ka kutwela nako pa jw.org.

Yesu wānenene amba: “Buno’bu bo būmi bwa nyeke, bendelele kukuyuka abe, Leza umo kete wa bine.” (Yoano 17:3) Pa kukapanda ku mfulo ya ntanda ne kukekala mūmi nyeke, tufwaninwe ‘kwendelela kuyuka’ Leza. Ko kunena’mba bilomba kulonga bivule kupita’ko’tu kuyuka’mba Leza udi’ko nansha kuyuka myanda mityetye imutala. Tufwaninwe kupwana nandi. Shi tusaka kuningija kipwano kyotupwene na balunda, tufwaninwe kupityija nabo kitatyi pamo. Ne kipwano kyotupwene na Leza nakyo mo monka. Tala bubine bumobumo bwa kamweno botwefundile mu Bible, bwetukweshe tusambe kipwano na Leza ne kwikilama.

Bubine botwefundile mu Bible

Twefundile amba Leza usakanga tukekale mu Paladisa.

Aye wāpangile bantu babajinji, ba Adama ne Eva, wēbatūla mu kifuko kilumbuluke kitwa bu budimi bwa Edena. Bādi babwaninine, kadi Leza wēbapele bintu byonso byobādi basakilwa pa kwikala na būmi bwa nsangaji. Bādi bakokeja kwikala’ko nyeke. Shi bālamine kipwano kyabo na Leza kebādipo ba kufwa. Ino abo bātonga kutyumuna musoñanya upēla wēbapele Leza.

Twayukile kine kyotususukila dyalelo.

Adama muntu mubajinji byaātombokēle Leza, wājimije mukenga wandi wa kwikala’ko nyeke ne wa bantu bonso. Bible unena’mba: “Monka mwātwelele bubi mu ino ntanda kupityila ku muntu umo ne lufu kupityila ku bubi, mo mwasambakenine ne lufu ku bantu bonso.” (Bene Loma 5:12) Monka mubwaninya muntu kupyana misongo isambuka kudi bambutwile bandi, bana bonso ba Adama nabo bāpyene kwadi kubulwa kubwaninina. O mwanda tununupanga ne kufwa.

Twefundile bilongele kala Leza pa kwitukwasha.

Bible unena’mba: “Leza byaasenswe ino ntanda bikatampe mpata, wapēne wandi Mwana wa bunka, amba ense ulombola lwitabijo mudi aye kakyonakanibwa, ino amone būmi bwa nyeke.” (Yoano 3:16) Leza wātumine Yesu pano pa ntanda apāne būmi bwandi pa mwanda wetu. Pa mwanda utala kino kilongwa kya buswe, Prabhakar, mwana-mulume umo mwine India wa myaka 86 unena’mba: “Kino kilombola’mba Yehovaa unsenswe bininge. Buswe bwandi i bumpe lukulupilo lwa kukekala na būmi bwa nyeke.”

Twefundile muswelo otubwanya kufwija’ko pa bitulongēle Leza.

Bible unena’mba tubwanya kufwija’ko pa bitulongēle Leza, na ‘kulama mbila yandi.’ (1 Yoano 2:3) Yehova Leza i mwitulombole na buswe byotukokeja kulonga pa kwikala na būmi bwa nsangaji tamba’nka pano. (Isaya 48:17, 18, kunshi kwa dyani) Leza kasakengapo tususuke. I mulaye amba shi tulonde misoñanya yandi, tukekala na būmi bwa nsangaji dyalelo ne na mukenga wa kukekala’ko nyeke.

TANGA BIBLE KINENWA KYA LEZA DIFUKU NE DIFUKU

Muñanga utala mūlu pa kupwa kutanga Bible kitatyi kyadīla panja pa kukōkolokwa. — Ubwanya kukapanda ku mfulo ya ino ntanda shi ulomba Leza akukwashe ne kulonga kiswa-mutyima kyandi

Tudyanga byakudya difuku ne difuku mwanda wa twikale’ko bōmi. Ino Yesu wānenene amba: “Muntu kakokejapo kwikala mūmi na mikate yonka kete mhm, ino i na kinenwa kyonso kitamba mu kyakanwa kya Yehova.”—Mateo 4:4.

Dyalelo tutananga binenwa bya Yehova mu Bible. Shi wifunde dino dibuku dikola, ukayuka byālongele Leza pa kala, bilonga Leza dyalelo, ne byakalonga mu mafuku a kumeso.

LOMBA LEZA AKUKWASHE

Le i bika byobwanya kulonga shi usaka kulonda bulombodi bwa Leza, inoko umona’mba i bikomo kuleka kulonga bintu byanena’mba i bibi? Shi bidi uno muswelo, kwendelela kuyuka Leza kubwanya kukukwasha mu muswelo wa pa bula.

Langulukila padi Sakura, mwana-mukaji umo wadi kisekese. Paadi wifunda Bible wayukile musoñanya wa Leza unena’mba “nyemai busekese.” (1 Bene Kodinda 6:18) Sakura walombele kudi Leza amupe bukomo, kupwa wabwanya kuleka kino kilongwa kibi. Inoko ukilwanga na milangwe ya busekese. Unena’mba, “shi milangwe ya busekese ibangiya mu ñeni, nombolanga’yo Yehova mu milombelo kwampikwa kafinda, mwanda ndyukile amba nkibwanyapo kulwa nayo bunka bwami. Kulombela i kumfwenye bininge kudi Yehova.” Pamo bwa Sakura, midiyo ne midiyo ya bantu, yendelelanga kuyuka Leza. Leza wibapanga bukomo bobasakilwa mwanda wa kushinta mu būmi bwabo, kadi beendeje mu muswelo umusangaja.—Bene Fidipai 4:13.

Shi uyuke Leza biyampe, nabya nobe ‘ukayukwa na Leza’ bu mulunda nandi mulēme. (Bene Ngalatea 4:9; Ñimbo ya Mitōto 25:14) Ebiya ukabwanya kutwela mu ntanda mipya ya Leza. Ino le ino ntanda mipya ikekala namani? Kishinte kilonda’ko kisa kuleta malondololo.

a Yehova i dijina dya Leza monka modilombwedilwe mu Bible.