Le I Bika Bine Bilombola Mukekadila Būmi Bobe bwa Kumeso?

BINTU BIKULUPILE BANTU BAVULE

KUBUKA NA ÑENYENYE: Bantu bamo bakulupile amba, būmi bwabo bwa kumeso bwimanine pa muswelo wadi wipangile ñenyenye kitatyi kyobabutwilwe. Bendanga kukepangula babuka na ñenyenye nansha kwingidija miloto, pa kuyuka bisa kwibafikila amba balonge’po kintu kutyina bakafikilwa na bibi.

FENG SHUI: Bantu bakwabo bakulupile amba, mu bupangi mudi bukomo bwampikwa kumweka bubwanya kwibakwasha bekale na būmi bwa nsangaji. Lo Wing,a ushikatanga mu Hong Kong unena’mba, “shayuka umo wa feng shui wansapwidile amba kutūla dibwe dya kidisale pantu kampanda mu kibīko kyami, kukankwasha nsokole lupeto luvule.”

KUTŌTA BANKAMBO: Ino bakwabo nabo bakulupile amba bafwaninwe kusenga bankambo bafwile nansha mikishi, mwanda wa bebakinge ne kwibesela. Van ushikatanga mu Vietename unena’mba, “nadi nkulupile amba ami ne bami bana tukekala na būmi buyampe pano, ne būmi bulumbuluke bwa kumeso, shi tupa bankambo bami bulēme.”

KUBUTULWA MONKA: Bantu bavule bakulupile amba shi muntu wafu, ubutulwanga monka, misunsa ne misunsa. Bakulupile amba bafikilwanga na bintu biyampe nansha bibi, pa mwanda wa bintu byobalongele pa kala.

Bakwabo nabo bamwene amba kukulupila uno muswelo i kabutyibutyi. Ino abo papo bakulupila mu lubuko lwa kutala mishiko ya mu makasa, miloto, lubuko lwa musheta, ne mu bintu pamo bwa bino. Balañanga’mba, padi bino bilongwa bibwanya kwibakwasha bayuke mukekadila būmi bwabo bwa kumeso.

LE BIFULANGA KWEPI?

Le boba badi na ino nkulupilo ne balonga bino bintu badi na būmi buyampe, ne bakekala na būmi bulumbuluke bwa kumeso?

Langulukila pa myanda yatene Hào, ushikatanga mu Vietename. Wadi wingidija mu būmi lubuko lwa ñenyenye, feng shui, ne kutōta bankambo. Ino le waikele na būmi buyampe? Hào unena’mba, “najimije lupeto lwami, netumpa mu kwapula, mu kisaka mwaikala kavutakanya, kadi nazumbija mutyima bininge.”

Qiuming wa mu Taiwane, nandi wadi ukulupile mu kubuka na ñenyenye, kubutulwa monka, kulaibwa kwa bintu, feng shui, ne mu butōtyi bwa bankambo. Wanenene pa kupwa kulangulukila bininge pa ino nkulupilo amba: “Najingulwile amba buno bufundiji ne bibidiji bīpatanyanga abyo bine kadi bivutakanyanga ñeni. Namwene amba divule dine, bintu byobadi balaya mu kubuka na ñenyenye byadi bya bubela. Pa mwanda utala kubutulwa monka nako, le shi kubwanyapo kuvuluka bintu byowalongele mu būmi bubajinji, i muswelo’ka obwanya kushinta ne kulonga bintu biyampe mu būmi bukwabo?”

Pamo bwa Hào, Qiuming, bantu bakwabo bavule nabo bajingulwile amba, ketubwanyapo kuyuka mukekadila būmi bwetu bwa kumeso kupityila ku kulaibwa kwa bintu, ñenyenye, bankambo bafwile, nansha kubutulwa dipya. Le ko kunena’mba ketubwanyapo kuyuka bya kulonga pa kulumbulula būmi bwetu bwa kumeso?

Bantu bavule balañanga’mba pa kwikala na būmi bulumbuluke bwa kumeso, bafwaninwe kufunda masomo malamala ne kwikala na bupeta. Le i bika byafikīle bantu bamo bakwete buno butyibi?