Le Kudi Bulombodi Bukulupilwa bwa Mwa Kukekadila na Būmi Bulumbuluke bwa Kumeso?

Monka motwesambilanga mu bishinte bibadikile, bantu ke balonge bukomo amba bakekale na būmi bulumbuluke bwa kumeso, na kukulupila mu bintu pamo bwa kulaibwa kwa bintu, kufunda masomo, kukimba bupeta, ne kwikala bantu bayampe. Inoko shi wingidija bino bintu mwanda wa kukekala na būmi bulumbuluke, bidi pamo bwa kwingidija kalata ka bubela pa kwenda ku kifuko kyokuyukilepo. Le ko kunena’mba kekudipo bulombodi bukulupilwa bwa mwa kukekadila na būmi bwa kumeso? Aa, budi’ko!

BULOMBODI BUTAMBA KU NSULO MILUMBULUKE

Pa kukwata butyibi, divule dine twipangulanga muntu mutame kadi wa tunangu kwitupita. Muswelo umo onka, tubwanya kupebwa bulombodi bukulupilwa bwa mwa kukekadila na būmi bwa kumeso na muntu mutame bininge kadi wa tunangu kwitupita. Tubwanya kutanga madingi andi mu bilembwa bikola byashilwile kulembwa pano ke padi myaka 3 500. Bino bilembwa bijila bidi mu dibuku ditwa bu Bible.

Mwanda waka ubwanya kukulupila Bible? Mwanda mwine’ye, i Muntu mutame bininge kadi wa tunangu kutabuka bantu bonso mūlu ne pano panshi. I mutelwe bu “Mukulu wa Mafuku” udi’ko “nyeke ne nyekeke.” (Danyele 7:9; Ñimbo ya Mitōto 90:2) Aye i “Umpangi wa madiulu, Leza wa bine, Mwine wapungile ntanda.” (Isaya 45:18) Witusapwila’mba dijina dyandi i Yehova.—Ñimbo ya Mitōto 83:18.

Bible byatambile kudi Umpangi wa bantu bonso, kanenangapo amba kibidiji nansha lukoba kampanda i lutabuke lukwabo. Madingi adi’mo i a kamweno nyeke kadi akwashanga bantu ba matanda onso. Udi mu ndimi mivule kadi i dibuku dyabanibwa bininge ntanda yonso kutabuka mabuku makwabo.a Ko kunena’mba bantu ba pi na pi babwanya kumwivwanija ne kuludikwa nandi. Buno bubine bukwatañene na bine binena Bible amba:

“Leza kadipo na mboloji, ino mu mizo yonso yewa muntu umutyina ne ulonga byoloke ye witabijibwa nandi.”—BILONGWA 10:34, 35.

Monka musanshilwe mbutwile bandi bana kadi wibakwasha, Yehova Leza nandi i Shabana wa buswe witukwasha kupityila ku Bible Kinenwa kyandi. (2 Temote 3:16) Ubwanya kukulupila Kinenwa kyandi, mwanda i aye witulongele kadi uyukile bintu biketusangaja mu būmi.

BULOMBODI BUKULUPILWA

Tubwanya kukulupila byobya binena Bible pa būmi bwa kumeso, mwanda twimwenanga binkumenkume ne ngikadila ya bantu yālailwe na Bible pano ke padi kintu kya myaka 2 000.

BINKUMENKUME

“Muzo ukatamba muzo mukwabo, ne bulopwe nabo bulopwe bukwabo. Kukekala kutenkana kukatampe kwa ntanda, kadi ne bimpengele bya nzala ne bipupo bya misongo byadi koku kebidi koku.”—LUKA 21:10, 11.

NGIKADILA

“Mu mafuku a mfulo kukekalanga bitatyi bya makambakano bikomo ne mwa kulongela. Mwanda bantu bakekala ba kwisanswa abo bene, ba kusanswa lupeto, ba kwitumbika, ba kwizunzula, batuka Leza, bampikwa kukōkela bambutwile, bampikwa kufwija’ko, ba kubulwa lulamato, bampikwa kisanso kya bumuntu, bapela kumvwañana ko-konso, bavubavuba, ba kubulwa kwīfula, ba bukalabale bwa malwa, bampikwa kusanswa buyampe, ba kwaba bakwabo, ba mitwe myūmu, bayule mitatulo, basenswe kwisangaja kupita’ko kusanswa Leza.”—2 TEMOTE 3:1-4.

Le ufulanga ku kunena bika shi ubamone bintu byālaile Bible tamba kala bilongeka dyalelo? Na bubine, uketabija byanenene Leung wa mu Hong Kong amba: “Bupolofeto bwa Bible bwalembelwe pano kepadi myaka mivule. I kutupu muntu nansha umo wadi ubwanya kulaya bintu bya bine bilongeka kamo ne kamo uno muswelo. Bine, Bible i mutambe kudi muntu wa tunangu bininge kwitupita.”

Mu Bible mudi bupolofeto tutwa na tutwa ke bufikidile.b Kino kilombola’mba bine Bible i Kinenwa kya Leza. Yehova unena’mba, “Ami ne Leza, kekudipo nansha umo udi bwa ami. Tamba ku ngalwilo, ndayanga bintu bikafika.” (Isaya 46:9, 10) Nanshi, pa buno bubinga bwendele’mo, ubwanya kukulupila binena Bible pa būmi bwa kumeso.

BULOMBODI BUKUKWASHA DYALELO NE NYEKE

Shi ulonde bulombodi budi mu Bisonekwa Bijila, ukamwena’mo abe mwine. Langulukila bidi pa bino bimfwa.

MADINGI MAYAMPE MU MYANDA YA LUPETO NE KAJI

“Kuboko kuyule kukōkolokwa i kupite buya maboko abidi mayule mingilo mikomo ne kupanga luvula.”—MUSAPUDI 4:6.

BŪMI BWA KISAKA

“Muntu ne muntu momudi’mo ufwaninwe kusanswa mukajandi mwaesanshilwe aye mwine; mukaji nandi ufwaninwe kulēmeka mulumyandi bikatampe.”—BENE EFISESA 5:33.

MWA KUPWANINA NA BANTU

“Leka bulobo ne bukalabale; kokifītwa mutyima ne kwalamuka kolonga bibi.”—ÑIMBO YA MITŌTO 37:8.

Shi wingidija binena Bible, ukekala na būmi buyampe tamba’nka pano ne mu mafuku a kumeso. Mu Bible tutana’mo milao ya Leza itala pa būmi buyampe bwa kumeso kubadila’mo ne ino

NDOE NE MUTYIMA-NTENKE

“Bakaloelelwanga bininge mu bungibungi bwa ndoe.”—ÑIMBO YA MITŌTO 37:11.

BANTU BONSO BAKEKALA NA MOBO NE BYAKUDYA

“Bakobakanga mobo ne kwikala’mo, kadi bakadimanga madimi a mañanza ne kudya bipa byao.”—ISAYA 65:21.

KEKUKEKALAPO MISONGO NANSHA LUFU

“Lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”—KUSOKWELWA 21:4.

Le i bika byofwaninwe kulonga pa kukekala na būmi bwa kumeso bwa uno muswelo? Tala kishinte kilonda’ko.

a Shi usaka kuyukila’ko bivule pa mwanda utala kwalamunwa ne kwabanibwa kwa Bible, enda pa www.jw.org, twela mu BIBLE NE ABE > MĀNGA NE BIBLE.

b Shi usaka kuyukila’ko bivule, tala shapita 9 wa dibuku La Bible: parole de Dieu ou des hommes ? dilupwilwe na Batumoni ba Yehova. Didi ne pa www.jw.org. Twela mu KIBĪKO > MABUKU NE MABOLOSHILE.