Pa Kuyuka Kiyampe ne Kibi: Bible—Buludiki Bukulupilwa
Butyibi botukwata mu būmi kebukulupilwangapo nyeke shi bwimanine enka pa bitulombola mutyima wetu wa mundamunda nansha pa bilanga bantu. Bible ulombola kine kyobwikadile namino ne kushintulula myanda mikwabo. Witukwasha tuyuke kiyampe ne kibi—mwanda wa twikale na nsangaji ne na būmi buyampe.
TUSAKILWA KULUDIKWA NA LEZA
Yehovaa Leza ushintulula mu Bible amba bantu bafwaninwe kuludikwa nandi pa kyaba kya kwiludika abo bene. (Yelemia 10:23) O mwanda witusapwila mu Bible byotufwaninwe kulonga mu būmi. Witusenswe batwe bantu kadi kasakangapo tukwate butyibi bubi bwituletela musala. (Kupituluka mu Bijila 5:29; 1 Yoano 4:8) Nakampata, Umpangi wetu udi na tunangu ne ñeni, o mwanda ye ufwaninwe kwitukwasha tuyuke kiyampe ne kibi. (Ñimbo ya Mitōto 100:3; 104:24) Inoko Leza kaningilangapo muntu alonde madingi adi mu Bible mu būmi bwandi.
Yehova wāpele ba Adama ne Eva, ba mwana-mulume ne mwana-mukaji babajinji, kintu kyonso kyobādi basakilwa pa kwikala na nsangaji ya bine. (Ngalwilo 1:28, 29; 2:8, 15) Kadi wēbapele ne bulombodi bupēla bobādi banenwe kukōkela. Inoko wēbapele bwana pabo bwa kutonga abo bene kukokela buno bulombodi nansha kupela kwibukokela. (Ngalwilo 2:9, 16, 17) Ino kyabulanda, ba Adama ne Eva bātongele kulonga byobādi bamona abo bene bu biyampe ne bibi pa kyaba kya kulonda madingi a Leza. (Ngalwilo 3:6) Mwapya tunga? Muzo wa muntu keudipo mu nsangaji pano powikwatyila ao mwine butyibi butala kiyampe ne kibi. Mānga ilombola’mba kusūla binena Leza kekuletangapo ndoe ne nsangaji.—Musapudi 8:9.
Bible uleta madingi mayampe mwanda wa kwitukwasha tukwate butyibi bwa tunangu, ekale tushikatanga kwepi nansha shi twi ba mu kisaka’ka. (2 Temote 3:16, 17; tala kapango kanena’mba, “Dibuku dya Bantu Bonso.”) Bandaula madingi awitupa.
Wifunde myanda mivule ilombola kine kityilwa Bible “bu kinenwa kya Leza.”—1 Bene Tesalonika 2:13. Enda pa jw.org utale video inena’mba Le I Ani Wālembeje Bible?
BIBLE ULOMBOLA BITUSAKILA LEZA KULONGA
Bible witusapwila mwādi mupwanine Yehova na bantu tamba ku ngalwilo. Myanda idi’mo itukwasha twivwanije bintu bimona Leza bu biyampe ne bibi, bimwenwa’mo ne bisanshijañana. (Ñimbo ya Mitōto 19:7, 11) Mu Bible mudi myanda itukwasha tukwate nyeke butyibi bwa tunangu bwa mwa kwiendejeja mu būmi bwetu difuku ne difuku.
Kimfwa tala madingi adi mu Nkindi 13:20, anena’mba: “Yewa unanga na ba tunangu ukekala wa tunangu, ino yewa upwene na bivila ukamona malwa.” Uno musoñanya i wa mvubu tamba kala kufika ne didi kūlu dino. Mu Bible mudi madingi mavule a uno muswelo ne misoñanya ya mvubu.—Tala kapango kanena’mba, “Tunangu Tudi mu Bible I twa Mvubu Nyeke.”
Padi ubwanya kwiipangula’mba, ‘Le i bika binkulupija’mba madingi a mu Bible a mwa kwikadila abwanya kunkwasha dyalelo?’ Kishinte kilonda’ko kisa kwisambila pa bimfwa bya bantu bemwenine uno mwanda.
a Yehova dyo dijina dya Leza.—Ñimbo ya Mitōto 83:18.