Pa Kuyuka Kiyampe ne Kibi: Butongi Bofwaninwe Kwitongela
Byotonga kulonga mu būmi bobe byo bikakukwasha wikale na nsangaji nansha kubulwa’yo. Yehova Leza uyukile kino. O mwanda witupanga madingi mu būmi bwetu.
Yehova usakanga twikale na ndoe ne na būmi bwa nsangaji.
“Ami Yehova, ne Leza obe, mwine ukufundija mwanda wa kamweno kobe, mwine ukwendeja mu dishinda dyofwaninwe kwenda. Yō, shi watele’tu mutyima ku mbila yami! Longa ndoe yobe yadi ya kwikala pamo bwa munonga ne boloke bobe pamo bwa mantanki a dijiba.”—Isaya 48:17, 18.
Leza ye wa kwitulombola byotufwaninwe kulonga mu būmi mwanda i Umpangi wetu. Usaka tulonde madingi andi mwanda wa twikale biyampe. Kitatyi kyotulonda byaetusoñanya kulonga tumwenanga’mo. Tukakwata nyeke butyibi buyampe bwituletela ndoe ne nsangaji shi tupwane na Leza.
Yehova ketulombangapo kulonga bintu bitupite kilo.
“Ino mbila yonkusoñanya dyalelo dino’di ke mikomopo bininge kodi, nansha yokomenwa kufikila’po.”—Kupituluka mu Bijila 30:11.
Pa kulonda madingi etupa Leza atala motufwaninwe kwikadila, bitulomba kushita muswelo otumona bintu ne kushinta bilongwa byetu. Yehova ketulombangapo kulonga bintu byoketubwanyapo. Kadi bidi uyukile pafudile bukomo bwetu mwanda ye wetupangile. Kuyuka mwikadile Yehova kubetukwasha twivwanije amba “mbila yandi keilēmangapo.”—1 Yoano 5:3.
Yehova i mulaye kukwasha boba batonga kwivwana madingi andi mu būmi bwabo.
“Ami, Yehova Leza obe, nkwete kuboko kobe kwa lundyo, mwine ukunena’mba, ‘Kokakwatwa moyo. Nkakukwasha.’”—Isaya 41:13.
Madingi etupa Leza mu būmi bwetu ke makomopo kulonda mwanda unena’mba usa kwitukwasha. Witukwashanga kupityila ku Kinenwa kyandi Bible, mwine motutana myanda i tukankamika ne itukulupija’mba būmi busa kwikala buyampe ku meso’ku.
Bantu midiyo ne midiyo ntanda yonso i bemwene’mba kulonda madingi a Leza adi mu Bible kwebakweshe bekale ke bantu bayampe. Le nobe wabulwapo kwitūdila’ko kyaba kya kufunda madingi mayampe atanwa mu Bible? Ubwanya kushilula kufunda’o kupityila ku boloshile wisambila pa Bible unena’mba, Ikala Mūmi Nyeke! udi pa jw.org, ukokeja kutentula’ye ku bitupu. Mu uno boloshile mudi bino bifundwa:
Le Bible Ubwanya Kulumbulula Būmi Bobe Namani?
Lukulupilo Lwitupēle Bible
Lelo Ubwanya Kukulupila Byobya Binena Bible?
Shi ubandaule Kinenwa kya Leza Bible na mutyima umo ukemwena’mba kikidi na mvubu ne dyalelo; mwanda myanda idi’mo “i ikulupilwa kyaba kyonso, dyalelo ne nyeke.” (Ñimbo ya Mitōto 111:8) O mwanda shi usaka wikale na būmi buyampe londa madingi adi mu Bible. Inoko yuka’mba Leza kakuningilangapo wialonde. (Kupituluka mu Bijila 30:19, 20; Yoshua 24:15) I butongi bwa muntu ne muntu.