Tubwanya Kunekenya Mushikwa!

Shi aa, ino padi wimwenanga mushikwa mu miswelo palapala. Mu mapya, bavudile kunena’mo myanda ya kwisañuna kwa tubila, kushikwa bantu ba ngitu imo basambakena pamo, ne kushikwa beni—binenwa bilombola’mba bantu bashikwanga bakwabo pa mwanda wa lukoba, kusambakena pamo, nansha pa mwanda wa muzo wabo. O mwanda maludiki mavule atūlanga’ko bijila bya kupa mfuto boba bonso bashikwa bantu bakwabo.

Bantu bobashikilwe nabo bavudile kushikwa bakwabo. Divule dine bantu bobashikilwe bakimbanga kwaluja kinongo, kintu kine kivudija’ko mushikwa.

Padi nobe ke bakusañune, bakunenene bibi, bakuzawile, bakutuke mutonko, nansha kukuzakaja. Inoko mu mushikwa mubadilwa ne bintu bikwabo. Divule dine mu mushikwa mubadilwanga ne kutambwa, kusombwa, kukupilwa, kujilulwa ku bukomo, kwipaibwa, nansha kwitapa kwa bana na bana.

Dino dipepala disa kulondolola bipangujo bilonda’ko’bi, ne kulombola muswelo otubwanya kunekenya mushikwa:

• Mwanda waka kudi mushikwa muvule nenki?

• Le mushikwa ubwanya kupwa namani?

• Le kudi kitatyi kekikekala’kopo mushikwa lonso?