Mwanda Waka Kudi Mushikwa Muvule Nenki?

Mwanda waka kudi mushikwa muvule mu ino ntanda? Pa kuyuka bubinga bowikadile’ko, tufwaninwe bidi kuyuka mwine mushintulwila mushikwa, mwanda waka bantu bashikwanga bakwabo, ne musambakenanga mushikwa.

Le Mushikwa I Bika?

Mushikwa i nshikani nansha kubulwa kusangela muntu nansha musaka wa bantu. Ke kulobelapo’tu muntu mu kitatyi kampanda.

MWANDA WAKA BANTU BASHIKWANGA BAKWABO?

Bantu bashilulanga kushikwa bakwabo pa bubinga buvule. Divule dine bebashikwanga, ke pa mwandapo wa byobalonga, ino i pa mwanda wa mwine mobekadile. Babwanya kwibashikwa na kulanga’mba, bantu bonso ba ku wabo musaka i babi, baleta kyaka, kadi kebabwanyapo kushinta. Padi bebamonanga bu bantu ba munshi, babi, kadi baleta makambakano. Boba bemona bu bashikibwe, padi bebasuswile, bebalongēle bintu na bukondame, nansha kwibalonga bintu byebashile na milangwe mibi mu ñeni.

MOUSAMBAKENANGA

Kyaba kimo bantu bashikwanga bantu bokebemwene ne nabo bene. Kimfwa, muntu ubwanya kwikala na milangwe mibi idi na ba mu kyabo kisaka nansha balunda aye papo kuyuka mpika. O mwanda mushikwa ubwanya kusambakana bukidibukidi, utulumuka’tu musaka onso wa bantu waikala nao.

Shi twivwanije mwine musambakenanga mushikwa bukidibukidi, tukevwanija kine kikadile bantu bavule na mushikwa. Inoko kudi bubinga bukwabo bwikadile’ko mushikwa mu ino ntanda. Pa kwibuyuka, tufwaninwe kuyuka mwine mwāshilwidile mushikwa. Tubwanya kuyuka mowāshilwidile kupityila ku Bible.

BIBLE ULOMBOLA MWĀSHILWIDILE MUSHIKWA

Kifwatulo kya miketo ibidi yenda ījokoloka, yelekeja musambakenanga mushikwa. 1. Myanda ya bubela, mu musaka wa bantu, pa Entelenete, ne mu mapya. 2. Kubulwa kuyuka senene bibidiji, musaka, nansha kipwilo. 3. Moyo wa kutyina, kushinta, kujimija bintu, nansha kubulwa kuyuka bikalongeka. 4. Mushikwa, ubwanya kuleta mboloji, kwisañuna, ne lūma.

MUSHIKWA WA NSHIKANI KEUTAMBILEPO KU BANTU. Wāshilwile kitatyi kyobātombokēle Leza kudi mwikeulu umo momwa mūlu, mwine wāityilwe bu Satana Dyabola. Dyabola “wādi ntapañani paāshilwile” butomboki bwandi. Byadi “mbepai kadi . . . shandya bubela,” ukyendelela kukolomona mushikwa ne bukalabale. (Yoano 8:44; 1 Yoano 3:11, 12) Bible ulombola’mba i muntu wa nshikani, kilobo, kadi wa bukalabale.—Yoba 2:7; Kusokwelwa 12:9, 12, 17.

BANTU BAMPIKWA KUBWANININA BAPĒLELWANGA KUSHIKWA BAKWABO. Adama, muntu mubajinji, wālondele ngikadila mibi ya Satana. O mwanda bantu bonso i bapyane bubi ne kubulwa kubwaninina. (Loma 5:12) Kaini mwana mubajinji wa Adama, wāipaile mwanabo Abele ku nshikani. (1 Yoano 3:12) Shako kudi bantu bavule bamwekeja buswe ne lusa. Inoko, pa mwanda wa bubi botupyene, bantu bavule badi na kwisakila, kwabila ne mitatulo—ngikadila mine ileta mushikwa.—2 Temote 3:1-5.

MUSHIKWA UTAMBANGA KU KUBULWA KUSANGELA BANTU. Ntanda yotudi’mo i miyule mushikwa mwanda ikankamikanga mwiendelejo mubi kadi wampikwa lusa. Kudi kasumalomo, mboloji, binenwa bya mutonko, kusombwa, bilongwa bya butomboki, mwanda ino “ntanda yonsololo idi mu lupusa lwa yewa mubi,” Satana Dyabola.—1 Yoano 5:19.

Inoko Bible i munene bivule kupita’ko’tu kulombola mwāshilwidile mushikwa. Ulombolanga ne mwa kupwila’o.