Lelo Wadi Uyukile Kala?
Mwanda waka byādi biyampe Yehova etabije byamulambu bya tukutyikutyi ne bankunda?
MU BIJILA bya Mosesa bādi betabije kulambula Yehova tukutyikutyi ne bankunda. Tuno toni tubidi twādi tutelwa nyeke pamo mu bijila mu mwanda utala bitapwa ne kwitupingakanya kamo na kakwabo. (Levi 1:14; 12:8; 14:30) Mwanda waka byādi biyampe? Bubinga bumo bidi i buno’mba, tukutyikutyi ketwādipo tuvudile kumweka. Mwanda waka?
Kakutyikutyi
Tukutyikutyi i toni twādi mu ntanda ya Isalela monso mu myeji ya kyanga. Mu Kweji wa dikumi yense twādi tuviluka kunshi twaenda ku matanda a kyanga, kupwa twajokela mu Isalela ku muketeko. (Lwi. 2:11, 12; Yel. 8:7) Ko kunena’mba mu Isalela wa kala, bene Isalela bādi bakomenwa kulambula bitapwa bya tukutyikutyi mu bitatyi bya mashika.
Nkunda
Inoko, bankunda abo kebavudilepo kuvilukaviluka, o mwanda bādi mu Isalela mwaka onso. Ne kadi bankunda bādi bamunwa ku mobo. (Dingakanya na Yoano 2:14, 16.) Dibuku dimo (Bible Plants and Animals) dinena’mba, “mu bibundi bikatampe ne bityetye bya mu Paleshitina bādi bamunine’mo bankunda. Mwinē njibo yense wādi na kakipombo, nansha kutubula kipunzu mu lubumbu, mwa kwikala toni.”—Dingakanya na Isaya 60:8.
Nkunda mu kakipombo
O mwanda Yehova wālombwele buswe ne mutyima unekena pa kwitabija byamulambu bya toni byādi na bene Isalela mu bula bwa mwaka.