Lelo Ukivulukile?

Lelo watangile senene manimelo a uno mwaka a Kiteba kya Mulami? Nabya, tala bidi shi ubwanya kulondolola bino bipangujo:

Le tukamwena namani mu kupityija kitatyi na kwisamba na Yehova, kumuteja, ne kulangulukila pādi?

Tukakwata butyibi buyampe, tukekala bafundiji bayampe, lwitabijo lwetu lukakomena’ko, kadi tukasanswa Yehova bininge.—w22.01, p. 30-31.

Le kukulupila mudi Yehova ne mu bantu batongele kuketukwasha namani?

Kino i kitatyi kya kukulupila muswelo ulonga Leza bintu na kuleka kutatana bulombodi ne butyibi bukwata bakulumpe. Pa kyamalwa kikatampe, tukabwanya kukōkela shi abetupe bulombodi bumweka bu bukomo kwivwanija nansha bukomo kulonda.—w22.02, p. 4-6.

Le i bika byādi bikimba kunena mwikeulu paāsapwidile Zekadia myanda ya “monji wa kūbaka nao mu kuboko kwa [Mbikavu] Zelububele”? (Zek. 4:8-10)

Kino kimonwa kyākulupije bantu ba Leza amba tempelo yādi imonwa bu keidingakenepo na mibajinji, yādi ya kupwa, kadi yādi ikwatañene na misoñanya ya Leza.—w22.03, p. 16-17.

Le i muswelo’ka otubwanya kwikala “kimfwa . . . mu muneneno”? (1 Tm. 4:12)

I na kwisamba biyampe kadi na bulēme mu busapudi, kwimba na mutyima umo ne kulondolola kyaba ne kyaba ku kupwila, ne kuleka kunena binenwa bya mutonko.—w22.04, p. 6-9.

Mwanda waka bintu bidi na banyema baná (malopwe) batelelwe mu Danyele shapita 7 bidi na kinyema kimo kitelelwe mu Kusokwelwa 13:1, 2?

Kinyema kya mu Kusokwelwa 13 kekyelekejapo bulopwe’tu bumo, kimfwa Loma. Ino kyelekeja imbikalo yonso ya politike ke mibikale muzo wa muntu.—w22.05, p. 9.

Le i muswelo’ka mukatampe otubwanya kulombola’mba tukulupile mu boloke bwa Leza?

Shi muntu wetutuke, wetusanshija, nansha wetulubila, tuloñanga bukomo bwa kutalula bulobo ne kuleka kulama kīji, na kushiya myanda mu makasa a Yehova. Aye ukapwija bibi byonso bilupukile ku bubi.—w22.06, p. 10-11.

Le tutu ulombela ku kupwila ufwaninwe kulama bika mu ñeni?

Milombelo keifwaninwepo kwingidijibwa mwanda wa kudingila kipwilo nansha kuleta misapu. Kafwaninwepo kunena “binenwa bingibingi,” nakampata mu milombelo ya ñanjilo. (Mat. 6:7)—w22.07, p. 24-25.

Le boba “badi balongalonga bibi” bakasangulwa “lusangukilo lwa butyibi” muswelo’ka? (Yoa. 5:29)

Kebakatyibilwapo butyibi bubi pa mwanda wa bilongwa bya mu būmi bwabo bwa pa kala. Bakatalwa ne kulondelelwa kukwatañana na muswelo obakeendeja pa kupwa kusangulwa.—w22.09, p. 18.

Le i bika byakankamikile tutu Rutherford na nsangaji ku kitango kya mu Kweji 9, 1922?

Wanenene ku kitango kya mu Cedar Point, mu Ohio, mu États-Unis, amba: “Talai, Mulopwe wabikala! Banwe bo bandi bedi ba lubila. Shi ke pano, sapulai, sapulai, sapulai Mulopwe ne Bulopwe bwandi!”—w22.10, p. 3-5.

Le Isaya shapita 30 ulombola miswelo’ka isatu itukwashanga’mo Leza amba tūminine?

Uno shapita ulombola’mba (1) utejanga milombelo yetu ne kwiilondolola, (2) wituludikanga, kadi (3) witweselanga madyese dyalelo ne mu mafuku āya kumeso.—w22.11, p. 9.

Mwanda waka tubwanya kufula ku kunena’mba binenwa bidi mu Ñimbo ya Mitōto 37:10, 11, 29 byāfikidile pa kala kadi bikafikidila ne mu mafuku a kumeso?

Binenwa bya Davida bilombola ngikadilo miyampe yādi’ko mu Isalela, kimfwa mu buludiki bwa Solomone. Yesu wēsambīle pa paladisa ya mu mafuku a kumeso ne kupituluka mu binenwa bidi mu vese 11. (Mat. 5:5; Luka 23:43)—w22.12, p. 8-10, 14.