Leza Ukutele Mutyima
MU BIBLE mudi madingi mayampe etutala mwanda i mutambe kudi Leza. Nansha byokedidipo dibuku dya kiñanga, dibwanya kukwasha muntu mu bitatyi bikomo, pajinwa ñeni, pādi na bulanda ku mutyima, ne shi wabēla ku ngitu nansha mu ñeni.
Kya mvubu mpata, Bible witukulupija’mba Yehova Leza, Umpangi wetu,a wivwanijanga milangwe yetu ne motwiivwanina kupita muntu ye-yense. Udi na kipyupyu kya kwitukwasha tulwe na makambakano o-onso etutana. Kimfwa, tala’ko’tu bidi bino bisonekwa bibidi bya mu Bible bikankamika:
“Yehova udi pabwipi na boba ba mityima mityumuke; upandijanga boba ba mushipiditu musonsakane.”—ÑIMBO YA MITŌTO 34:18.
“Mwanda ami, Yehova Leza obe, nkwete kuboko kobe kwa lundyo, mwine ukunena’mba, ‘kokakwatwa moyo. Nkakukwasha.’”—ISAYA 41:13.
Penepo, le i muswelo’ka ubwanya kwitukwasha Yehova tulwe na makambakano a misongo ya mu ñeni? Tanga bishinte bilonda’ko, wimwene myanda palapala ilombola’mba Yehova witutele mutyima bya binebine.
a Yehova i dijina dya Leza.—Ñimbo ya Mitōto 83:18.