2 | “Kusengwa na Bisonekwa”

BIBLE UNENA’MBA: “Byonso byālembelwe pa kala byālembelwe mwanda wa kwitufundija, amba pa kūminina kwetu ne pa kusengwa na Bisonekwa twikale na lukulupilo.”—BENE LOMA 15:4.

Mobishintulwila

Mu Bible mudi milangwe isenga ibwanya kwitukwasha tūminine potwikonda na milangwe mibi. Kadi musapu wa mu Bible witupa lukulupilo lwa amba panopano ponka misongo ya mu ñeni isa kupwa.

Mubwanya Kukwashisha Buno Busengi

Batwe bonso twivwananga misanshi mu bitatyi bimobimo; ino boba bekonda na njia nansha na kuzumbija mutyima bekondanga na misanshi ya mu malango difuku ne difuku. Le Bible ubwanya kwibakwasha namani?

Mu Bible mudi milangwe mingi kadi miyampe yobwanya kupingakanya na mibi ikwiya. (Bene Fidipai 4:8) Nabubine ubwanya kuyuja mu ñeni yobe milangwe isenga ne itūkija mutyima, mine ibwanya kukukwasha wikale na lupusa pa mwiivwanino obe.—Ñimbo ya Mitōto 94:18, 19.
Shi wimonanga bu wa mpikwa mvubu, Bible ubwanya kukukwasha uleke kwimona nankyo.—Luka 12:6, 7.
Mu Bible mudi mavese mavule etukulupija’mba ketudipo bunka, ne amba Leza Umpangi wetu, uyukile ne pa mfulo motwiivwanina.—Ñimbo ya Mitōto 34:18; 1 Yoano 3:19, 20.
Bible imulaye’mba Leza usa kupwija misanshi yonso. (Isaya 65:17; Kusokwelwa 21:4) Uno mulao ubwanya kwitupa bukomo kitatyi kyotwikonda na misongo ya kujinwa ñeni ne ya mu malango.

Mukwashishanga Bible Jessica

Njia Moikadilanga na Lupusa Pondi

“Ponabwenye myaka 25, nashilwile kwivwana bulanda bininge ku mutyima, bankwata misongo ya kujinwa ñeni. Ponadi mvuluka myanda mibimibi yamfikile mu būmi, ñeni yadi imvutakana. Badokitele banshintulwila’mba njia yami i milupuke ku kulangalanga myanda mibi yauntene mu būmi. Nakakimbile ne badokitele batala misongo ya mu ñeni banshintulwile bya kulonga pa misongo yami.”

Munkwashishanga Bible

“Njia poyadi indemenena bininge, nadi ngivwana moyo mpata, nzumbija mutyima ne kubulwa tulo. Divule bufuku nadi ngivwanika moyo mupite’byo kipimo. Enka munenena’kyo Ñimbo ya Mitoto 94:19, Leza ubwanya kwitusenga ne kwitukwasha tutukije mutyima potuzumbija mutyima. O mwanda ntūlanga kubwipi na butanda bwami, Bible ne ponembanga Bisonekwa bikankamika. Kitatyi kyadi kinketeka tulo nadi mbūka kentange Bible. Uno o muswelo wadi unsenga Yehova.

“Bible witukankamika tuleke kulangulukila pa myanda mishile na yotuyukile padi Leza. Mu mafuku kunyuma nadi nkulupile na mutyima wami onso amba nkidipo na mvubu, i kutupu muntu ubwanya kunsanswa kadi ne wa bule. Nefundile amba kulanga namino i kwitupe na binena Bible. Mwanda Bible ushintulula’mba Leza i Tata wa buswe ne wa lusa, kadi utele muntu ne muntu mutyima. Nashilwile kutādila milangwe yami pa kyaba kya kwiileka ayo intādile. Naanza ne kwimona mumwena Leza. Kulonga namino kwaunkweshe bininge nshinte milangwe mibi ya monadi nemwena.

“Ntengele na kipyupyu kitatyi kisa kutalulwa’ko misongo yonso ya mu ñeni. Ndyukile’mba kumeso’ku ketusapo kubēla misongo ya mu ñeni. Kino kinkwashanga ñuminine, kadi ntengēle na sangaji mafuku a kumeso ponsa kukoma ku misongo yami ya mu ñeni.”