3 | Mwena mu Bimfwa bya Bantu ba mu Bible

BIBLE WISAMBILA PA . . . Bana-balume ne bana-bakaji ba kikōkeji bātenwe na makambakano “pamo’nka bwa batwe.”—YAKOBA 5:17.

Mobishintulwila

Mu Bible mudi mānga ya bana-balume ne bana-bakaji bādi na mwiivwanino mwishileshile. Potutanga mu Bible myanda yēbatene tubwanya kusokola’mo muntu nansha umo wēkondele na makambakano pamo na etu.

Mobibwanya Kukwashisha

Batwe bonso tusakanga muntu wa kwitwivwana. Ino nakampata shi muntu ubēla misongo ya mu ñeni, po pene usakilwanga muntu wa kumwivwana. Potutanga myanda ya bantu balembelwe mu Bible, tukajingulula’mba myanda yēbatene yēbalengeje balange ne kwiivwana pamo bwa batwe. Tukemwena’mba nanshi ke’nkapo batwe bazumbija mutyima ne kuvutakanibwa ñeni.

Mu Bible mudi binenwa bya mitompwe bya bantu bēmwene bu kebādipo na muntu wa kwibakwasha, kadi bābudilwe kikulupiji. Padi nobe kodi munene amba: ‘Aa, kubapu! Ñeni ibamfule’! Ye mwēivwanine ne Mosesa, Ediya ne Davida.—Umbadilo 11:14; 1 Balopwe 19:4; Ñimbo ya Mitōto 55:4.
Bible utela mwana-mukaji umo witwa bu Hana “wadi na bululu bya mwiko,” mwanda wādi ñumba, kadi mukao nandi wādi umufutulula bisansa mutyima mwanda kādipo ubutula.—1 Samwele 1:6, 10.
Kadi Bible wisambila pa mwana-mulume umo witwa bu Yoba, padi nobe uyukile nsekununi yandi biyampe. Nansha byaādi muntu wa lwitabijo, kyaba kimo wāvutakanibwe ñeni bininge. Difuku dimo wafula ne ku kunena’mba: “Nakwatwa būmi bwami mukenye; nkisakilepo kwikala monka mūmi.”—Yoba 7:16.

Shi twifunde muswelo wānekenye bano bantu ba mu Bible milangwe mibi yobadi bekonda nayo, nabya netu tukanekenya byamalwa bitutana.

Mukwashishanga Bible Kevin

Kujinwa Ñeni Mokunongelanga

“Bankwete misongo ya kujinwa ñeni ponadi kembwanya myaka 50. Kyaba kimo nemonanga bu mbwanya kupwija mwanda o-onso untana. Ino mu kitatyi kityetye’tu, nemona bu būmi bubambipila.”

Munkwashishanga Bible

“Muntu wa mu Bible wāpityile mu makambakano na onekonda nao i mutumibwa Petelo. Wālongele bilubo bivule byāmulengeje eivwane bu wakubulwa mvubu. Pa kyaba kya kwendelela kwimona bu wampikwa mvubu, Petelo wāpwene na bantu bamutele mutyima. Misongo ya mutwe poimbūkanga, mvulukanga bilubo byami byonso nemona bu wakubulwa mvubu. Ino pamo bwa Petelo, nefundile kwikala pabwipi na balunda basaka kunkwasha ndeke kwimona namino mu būmi bwami.

“Muntu mukwabo wa mu Bible unseñanga bininge i Mulopwe Davida. Divule wādi utanwa na myanda imuvutakanya ñeni, kadi kudi bintu byaālongele mu būmi byaēalakenye mwenda mafuku. Nami neivwananga pamo bwa Davida, mwanda nenanga ne kulonga bintu byonealakanya shi nejokeja. Mu Ñimbo ya Mitōto 51 mudi binenwa bya Davida binseñanga bininge. Kimfwa Davida unena mu vese wa 3 amba: ‘Ndyukile biyampe kujilula kwami, kadi bubi bwami budi nyeke ku meso ami.’ Uno vese ushintulula senene moneivwaninanga shi mutwe ubanjina, binkomenanga kumona bintu biyampe mondi. Kadi ntalwa ne na binenwa bya Davida bidi mu vese wa 10 bya amba: ‘Panga mondi mutyima utōka, a Leza, kadi tūla munda mwami mushipiditu mupya, wa kininga.’ Nami nombelanga milombelo pamo bwa ino mwanda wa Leza ankwashe nshinte mumweno wami mubi pondi. Ku mfulo, nseñwanga na vese wa 17, unena’mba: ‘Mutyima mutyumuke ne musonsakane, abe Leza, kukewelapo.’ Uno vese unkulupijanga’mba Leza unsenswe.

“Kuta mutyima ku bimfwa bya mu Bible ne ku bintu binongela Leza pano, kunkwashanga ntengele būmi bwa ku meso na kikulupiji. Kumona milao ya mu Bible bu ya binebine kondi kunkwashanga ñendelele na kūminina.”