1 | Milombelo ‘Ela Kuzumbazumba Kobe Konso Kwadi’

BIBLE UNENA’MBA: “Mwela kuzumbazumba kwenu konso [kudi Leza], mwanda aye wimutele mutyima.”—1 PETELO 5:7.

Mobishintulwila

Yehova Leza witwita tumulombole myanda yo-yonso itulēmena mu ñeni ne mu mutyima. (Ñimbo ya Mitōto 55:22) Twikale na myanda mikatampe nansha mityetye, tumulombolei’yo mu milombelo. Shi tudi na mwanda witusansa ku mutyima, usansanga ne Yehova. Mwanda Yehova witutele mutyima kadi utele’o ne ku motwiivwanina. Kulombela kwadi i ditabula dya mvubu mpata pa kwikala na ndoe ya mutyima.—Bene Fidipai 4:6, 7.

Mukwashishanga Milombelo

Shi muntu wajinwa ñeni, wiivwananga bu udi bunka. Mwanda ke ponsopo pevwanijanga bantu makambakano awikonda nao. (Nkindi 14:10) Ino Yehova, i Leza witūlanga pa kyaba kya bakwabo ne kwibevwana, nanshi mulombole mu milombelo monso mowiivwanina. Aye witumwene, o mwanda uyukile misanshi yotudi nayo ne makambakano otwikonda nao, kadi usakanga twisambe nandi mu milombelo ne kumulombola myanda yonso yotudi nayo.—2 Bilongwa bya Mafuku 6:29, 30.

Kwisamba na Yehova mu milombelo kukomejanga kikulupiji kyotudi nakyo kya amba witutele mutyima. Milombelo ibwanya kwitukwasha twiivwane na mwēivwanine mulembi wa Mitōto wālombele amba: “Ubamone byamalwa byami; uyukile tusua twami tukatampe.” (Ñimbo ya Mitōto 31:7) Kuyuka’tu amba Yehova uyukile senene makambakano otwikonda nao, kubwanya kwitukwasha twendelele na kūminina mu bitatyi bya makambakano. Inoko aye uloñanga’po ne kintu, kupita kuyuka’tu makambakano etu. Kadi Yehova witukwashanga tutane myanda ya mu Bible itukankamika ne kwitusenga.

Mukwashishanga Bible Julian

Kuzumbija Mutyima Mokwikadilanga na Lupusa Pondi

“Nekondanga na kuzumbija mutyima ne misongo ya kujinwa ñeni. Divule kuzumbija mutyima kungiyanga’tu mu kitulumukila. Ngikalanga’tu neshiketyile, ino enka na mu kukopa kwa diso kala naanza kuzumbija mutyima pampikwa nansha bubinga. Nakampata nzumbijanga mutyima pondi mu kibumbo kya bantu. Neakamwanga bininge pa byobabwanya kumfwatakenya.

“Balunda nami bonso bayukile misongo yombēla, baloñanga bukomo bwa kunkwasha. Shako kyaba kimo banenanga bintu binsansa ku mutyima. Ino nansha nankyo nsangelanga bininge bukomo bobaloñanga mwanda wa kunkwasha.

“Mafuku onzumbijanga mutyima ne kujinwa ñeni, binkomenanga kulombela. Mwanda binombanga kulonga bukomo buvule pa kujadika ñeni ne kwisamba na Yehova mu milombelo. Ñeni injiminanga mu kavutakanya—o mwanda kyaba kivule ngilwanga ne bya kunena bine. Kitatyi kinjiminanga ñeni, binkomenanga kusokola bishima bya kushintulula moneivwanina.”

Muswelo Unkwashanga Bible

“Ponadi nefunda Bible nayukile amba pa kusaka Leza evwane milombelo, kebilombepo ikale’nka milamila nansha ya bishima bikutakane. Kitatyi kyonkomenwanga kushintulula moneivwanina, nombelanga’tu mu kīpi amba: ‘A Yehova! Nakwisāshila, nkwashe’ko.’ Yehova ungivwananga ne kulondolola milombelo yami na kumpa pa kitatyi kifwaninwe bintu byonsakilwa. Nkilombelangapo’nka bitupu, ino bakañundapanga ne ku lupitalo. Nsangelanga bininge muswelo unkwashanga milombelo ne bundapi boñundapwa, mwanda pano kendi’ko bidi biyampe. Nansha byobinombanga bukomo buvule pa kwisamba na Tata wami wa mūlu, nebuloñanga mwanda ndyukile amba unsenswe kadi wabilanga kunkwasha.”