Muswelo Otubwanya Kukomeja Lwitabijo Lwetu mu Mulao wa Yehova wa Ntanda Mipya

1-2. Le i bika byotufwaninwe kulonga pano potutengēle ntanda mipya?

TUSENSWE bininge mulao wa Yehova wa kupingakanya ino ngikadilo ya bintu na ntanda mipya ya boloke. (2 Pe. 3:13) Nansha byoketuyukilepo kitatyi kisa kufika ntanda mipya, inoko bintu bilongeka mu ino ntanda bilombola’mba keidi pabwipi.—Mat. 24:32-34, 36; Bil. 1:7.

² Pano’ko bidi, nansha shi ketudi beje bininge mu bubine, batwe bonso tusakilwa kukomeja lwitabijo lwetu mu uno mulao. Mwanda waka? Mwanda nansha ke lwitabijo lukomo lubwanya kuzoza. Mutumibwa Polo wāityile kubulwa lwitabijo bu “bubi bwitutyinya bukidi bonka.” (Bah. 12:1) Pa kulama lwitabijo lwetu lukomo, tufwaninwe kubandaula kitatyi ne kitatyi bintu bilombola’mba ntanda mipya isa kwikala’ko panopano.—Bah. 11:1.

3. I bika byotusa kwisambila’po mu kino kishinte?

³ Mu kino kishinte, tusa kubandaula miswelo isatu yotubwanya kukomeja’mo lwitabijo lwetu mu mulao wa Yehova wa ntanda mipya: (1) na kulangulukila pa kinkūlwa, (2) na kubandila bukomo bwa Yehova, ne (3) na kuvudilwa mingilo ya ku mushipiditu mu būmi. Kupwa tusa kwisambila ne pa musapu obāpele Habakuka kudi Yehova moubwaninya kukomeja lwitabijo lwetu dyalelo. Tushilulei bidi na kubandaula myanda imoimo yotubwanya kutanwa nayo, mine ilomba lwitabijo lukomo mu mulao wa ntanda mipya.

MYANDA ILOMBA LWITABIJO LUKOMO

4. Le i butyibi’ka bulomba lwitabijo lukomo?

⁴ Difuku ne difuku, tukwatanga butyibi bwitulomba lwitabijo lukomo. Kimfwa, tukwatanga butyibi mu mwanda utala balunda, kwipwija mukose, masomo, busongi, bana, ne kaji. I biyampe twiipangule amba: ‘Le butongi bwami bulombola bu nkulupile amba ino ngikadilo ya bintu i ya lupito ne isa kutalulwa’ko panopano ponka? Nansha ne mongolwe na bantu balanga’mba lufu yo mfulo ya bintu byonso?’ (Mat. 6:19, 20; Luka 12:16-21) Tukakwata butyibi buyampe kutabuka shi tukomeja lwitabijo lwetu lwa amba ntanda mipya ibafwena.

5-6. Mwanda waka tusakilwa lwitabijo lukomo mu bitatyi bya tusua? Leta kimfwa.

⁵ Kadi tutanwanga ne na makambakano alomba lwitabijo lukomo. Tubwanya kutanwa na kupangwapangwa, misongo ya zenzeka, nansha na bintu bibwanya kwitutyumuna mutyima. Shi makambakano akishilula, tubwanya kwiominina. Ino shi abaije kupita motwadi tulangila—bibwanya kwitulomba lwitabijo lukomo pa kwiominina ne kwendelela kwingidila Yehova na nsangaji.—Loma 12:12; 1 Pe. 1:6, 7.

⁶ Kitatyi kyotudi mu makambakano, tubwanya kulanga’mba ntanda mipya ya Yehova keisapo kufika. Le ko kunena’mba lwitabijo lwetu lubatyepa? Ke amopo. Tulete kimfwa: kitatyi kya mashika makomo mu buyo, tubwanya kulanga’mba bushipo kebusapo kwiya. Inoko abwa bwiya. Netu shi twi batyumukwe mutyima bininge, tubwanya kulanga’mba ntanda mipya keisapo kufika. Inoko lwitabijo lukomo, lwitukwashanga tuyuke amba milao ya Leza isa kufikidila. (Ñim. 94:3, 14, 15; Bah. 6:17-19) Na kino kikulupiji kyonso, tukendelela kutūla butōtyi bwa Yehova pa kifuko kibajinji mu bwetu būmi.

7. Le i mulangilo’ka otufwaninwe kwepuka?

⁷ Mu mwanda mukwabo motusakilwa lwitabijo lukomo i mu mwingilo wa busapudi. Bantu bavule botusapwila balañanga’mba “myanda miyampe” ya ntanda mipya ya Leza ke ya binepo. (Mat. 24:14; Ezk. 33:32) Ketusakengapo nansha dimo kongolwa na uno mulangilo wabo. Pa kusaka’mba kino kileke kwitufikila, tufwaninwe kukomeja lwitabijo lwetu. Tubandaulei’ko miswelo isatu ibwanya kwitukwasha.

KULANGULUKILA PA KINKŪLWA

8-9. Le kulangulukila pa kinkūlwa kukomejanga namani lwitabijo lwetu?

⁸ Muswelo umo bidi otubwanya kukomeja lwitabijo lwetu i na kulangulukila pa kinkūlwa. Kinkūlwa kitukulupijanga’mba milao ya Leza isa kufikidila. Potulangulukila na katentekeji pa kine kyāpāninwe kinkūlwa ne byokyālombele, tukomejanga lwitabijo lwetu lwa amba mulao wa Leza wa kwitupa būmi bwa nyeke mu ntanda milumbuluke usa kufikidila. Mwanda waka tubanena namino?

⁹ Le kinkūlwa kyālombele bika? Yehova wātumine wandi Mwana mubajinji muswedibwe, mulunda nandi wa pabwipi, atambe mūlu ne kubutulwa pano pa ntanda bu muntu mubwaninine. Yesu paādi pano pa ntanda, wāuminine makambakano a miswelo yonso. Kupwa wāsusulwa ne kufwa lufu lusansa. Bine i mfutwa mikatampe yāfutyile Yehova! Leza wetu wa buswe kādipo wa kuleka nansha dimo wandi Mwana asusuke ne kufwa mwanda’tu wa kwitupa būmi buyampe inoko bwa mafuku matyetye. (Yoa. 3:16; 1 Pe. 1:18, 19) Kufuta kwaāfutyile ino mfutwa mikatampe namino, kulombola’mba Yehova ukalonga bukomo bwandi bonso amba twikale’ko nyeke mu ntanda mipya.

KUBANDILA BUKOMO BWA YEHOVA

10. Mungya Bene Efisesa 3:20, le Yehova ubwanya kulonga bika?

¹⁰ Muswelo wa bubidi otubwanya kukomeja lwitabijo lwetu i na kubandila bukomo bwa Yehova. Aye udi na bukomo bwa kufikidija bintu byonso byalaile. Na bubine, bantu babwanya kumona’mba mulao wa būmi bwa nyeke keubwanyapo kufikidila. Inoko divule dine Yehova ulayanga bintu kebibwanyapo kulonga bantu. Aye i Mwine Bukomo Bonso. (Yoba 42:2; Mako 10:27) O mwanda ketutulumukangapo shi wetulaya bintu bya kutendelwa.—Tanga Bene Efisesa 3:20.

11. Leta kimfwa kya mulao umo wa Leza wa kutendelwa. (Tala kapango “Milao Imo ya Kutendelwa Yāfikidile.”)

¹¹ Tubandaulei’ko milao imo yālaile Yehova bengidi bandi ba pa kala yādi imweka bu keikafikidilapo. Wākulupije ba Abalahama ne Sala amba bakabutula mwana nansha byobādi ke banunu. (Ngo. 17:15-17) Kadi wāsapwidile Abalahama amba lutundu lwandi lukapebwa ntanda ya Kenani. Uno mulao wāmwekele bu keukafikidilapo mwanda lutundu lwa Abalahama, lwālongele myaka mivule mu bupika mu Edipito. Inoko uno mulao wāfikidile. Mu myaka ya katwa kabajinji Yesu kaile, Yehova wālaile Edisabeta mununu amba ukabutula mwana. Kadi wāsapwidile ne Madia mujike amba, ukabutula wandi Mwana. Kino kyādi kya kufikidija mulao wālaile Yehova mu budimi bwa Edena papo kepadi myaka tununu! Mu ino myanda yonso, Yehova wāfikidije byaālaile—Ngo. 3:15.

12. Le Yoshua 23:14 ne Isaya 55:10, 11 betukulupija bika pa bukomo bwa Yehova?

¹² Kitatyi kyotulangulukila pa milao yonso ya Yehova ne muswelo wafikidija’yo, twivwanijanga’mba udi na bukomo bukatampe. Ne kino kiningijanga lwitabijo lwetu mu mulao wandi wa kuleta ntanda mipya. (Tanga Yoshua 23:14; Isaya 55:10, 11.) Kino kituteakanyanga senene mwa kukwashisha bantu bakwabo bevwanije amba mulao wa ntanda mipya ke kilotwapo nansha lwano bitupu. Yehova aye mwine unena pa mwanda utala madiulu mapya ne ntanda mipya amba: “Ino myanda i ya binebine kadi ya bine.”—Kus. 21:1, 5.

VUDILWA MU BŪMI MINGILO YA KU MUSHIPIDITU

13. Lelo kupwila kukomejanga namani lwitabijo lwetu? Shintulula.

¹³ Muswelo wa busatu otubwanya kukomeja lwitabijo lwetu i na kupityija kitatyi mu mingilo ya ku mushipiditu. Kimfwa, langulukila pa muswelo otumwenanga mu kupwila. Anna,b waingile mu mingilo palapala ya mu mwingilo wa kitatyi kyonso mu myaka mivule, unena’mba: “Kupwila kwankweshe nyeke ngikale na lwitabijo lukomo. Nansha shi muneni ke wa bwinopo kadi kela’mopo myanda mipya, ntanga mutyima bininge pa byobya binkwasha ngivwanije senene bubine bwa mu Bible, ne kino kikomejanga lwitabijo lwami.” Na bubine, netu tusangelanga malondololo akomeja lwitabijo aleta banabetu.—Loma 1:11, 12; 10:17.

14. Le mwingilo wa busapudi ukomejanga namani lwitabijo lwetu?

¹⁴ Kadi tukomejanga lwitabijo lwetu kitatyi kyotusapula. (Bah. 10:23) Barbara, wingidilanga Yehova pano kepadi myaka 70 ne kupita, unena’mba: “Monanga nyeke busapudi bu mwingilo ukomeja lwitabijo. Ponsapwila bininge bantu bakwabo milao ya kutendelwa ya Yehova, po pene lwitabijo lwami nalo lukomenanga’ko bininge.”

15. Le kifundwa kya pa kasuku kikomejanga namani lwitabijo lwetu?

¹⁵ Mwingilo mukwabo wa ku mushipiditu ukomejanga lwitabijo lwetu i uno: kifundwa kya pa kasuku. Susan wamwene amba kutandika kitatyi kya kwifunda i kwa kamweno. Unena’mba: “Dya Yenga, ye dyonefundanga kishinte kya Kiteba kya Mulami kya yenga wiya’ko. Dya Mwanzo ne Dya Bubidi nateakanya kupwila kwa mu bukata bwa yenga. Mafuku ashele ke a kifundwa kya pa kasuku.” Susan waendelele kukomeja lwitabijo lwandi, na kwitūdila’ko mpangiko miluji ya kifundwa kya pa kasuku. Irene waingile ku kité kya ntanda mu bula bwa myaka mivule, nandi wamwene amba kwifunda bupolofeto bwa mu Bible kukomejanga lwitabijo. Unena’mba: “Byantulumwije pa kuyuka’mba bupolofeto bwa Yehova i bufikidile mu kanda ne kanda.”c

“KIKAFIKIDILA BINEBINE”

16. Mwanda waka netu dyalelo tumwenanga mu binenwa byobāsapwidile Habakuka kudi Yehova? (Bahebelu 10:36, 37)

¹⁶ Bengidi ba Yehova bamo bakungilanga mfulo ya ino ngikadilo ya bintu pano kepadi myaka mivule. Mungya mumweno wa bumuntu, bibwanya kumweka’mba mulao wa Leza ubaije kufikidila. Inoko Yehova uyukile mwiivwaninanga bengidi bandi, o mwanda wākulupije mupolofeto Habakuka amba: “Kimonwa kikidi kya mu kitatyi kyakyo kitungwe, kadi kyendanga lubilo ku mfulo yakyo, kekikabepapo. Nansha shi kibaije, kungila’kyo! Mwanda kikafikidila binebine. Kekikejepo!” (Hab. 2:3) Le Habakuka kete ye wādi wa kumwena mu bino binenwa bya Leza’ni, nansha tumwenanga’mo ne batwe dyalelo? Kupityila ku mushipiditu ujila, mutumibwa Polo wāingidije bino binenwa ne ku bene Kidishitu batengēle ntanda mipya. (Tanga Bahebelu 10:36, 37.) Bine, tubwanya kukulupila’mba nansha shi mulao wa kunyongololwa ubamweka bu ubaije, ao ‘ukafikidila binebine. Keukejepo!’

17. Le kaka umo waingidije namani madingi obāpele Habakuka kudi Yehova?

¹⁷ Bengidi bavule ba Yehova i bengidije madingi andi a amba, “kungila!”—nansha shi kebakungile mu bula bwa myaka mivule. Kimfwa, kaka Louise washilwile kwingidila Yehova mu 1939. Unena’mba: “Mu kine kitatyi’kya, nadi nanga’mba Amakedona isa kwiya nkyapwile masomo a sekondele. Inoko keyafikilepo. Myaka pa kupita’po, namwene amba i biyampe ntange myanda yonadi ngita bu ‘nsekununi ya bantu bākungīle—ko kunena’mba mānga ya mu Bible ya Noa, Abalahama, Yosefa, ne bantu bakwabo bākungīle kitatyi kilampe kumeso kwa kutambula mpalo yobēbalaile kudi Yehova. Kwendelela kukungila i kunkwashe ami ne bantu bakwabo tute mutyima ku bubine bwa amba ntanda mipya keidi pabwipi.” Bine, ne bengidi ba Yehova bakwabo bavule ke beje, betabije kino!

18. Le kubandila bupangi kubwanya kukomeja namani lwitabijo lwetu mu ntanda mipya īya’i?

¹⁸ Na bubine, ntanda mipya keyafikile. Inoko tala bintu bimo bidi’ko pano—ñenyenye, mityi, banyema, ne bantu. I kutupu muntu nansha umo ubwanya kutatana’mba bino bintu byonso kebidi’kopo. Inoko kitatyi kimo nenki kebyādi’kopo. Pano byobi bidi’ko mwanda Yehova wēbipangile. (Ngo. 1:1, 26, 27) Leza wetu udi ne na mpango ya kutūla’ko ntanda mipya. Ukafikidija ino mpango. Mu ntanda mipya, bantu bakekala na būmi bwampikwa mfulo ne bukomo bwa ngitu bubwaninine. Pa kitatyi kitungile Leza, ntanda mipya isa kwikala’ko enka mwikadile’ko diulu ne ntanda byotumona dyalelo.—Isa. 65:17; Kus. 21:3, 4.

19. Le i muswelo’ka obwanya kukomeja lwitabijo lobe?

¹⁹ Pano’ko bidi, kwatakanya mikenga yonso yodi nayo mwanda wa kukomeja lwitabijo lobe. Tamija mutyima wa kufwija’ko pa kinkūlwa. Bandila bukomo bwa Yehova. Vudilwa bya kulonga mu mingilo ya ku mushipiditu. Shi ulonge namino, ukabadilwa mu “boba bakapyana milao kupityila ku lwitabijo ne kitūkijetyima.”—Bah. 6:11, 12; Loma 5:5.