Le Yehova Ukalondolola Milombelo Yami?

1-2. Mwanda waka tubwanya kulanga’mba Yehova kalondololangapo milombelo yetu?

“LOELELWA bininge mudi Yehova, nandi ukakupa bisakasaka mutyima obe.” (Ñim. 37:4) Bine uno i mulao wa kutendelwa! Ino le tufwaninwe kutengela Yehova etupe kiponka na ponka bintu byonso byotumulomba? Mwanda waka i kya mvubu twiipangule kino kipangujo? Tutalei bino bimfwa bilonda’ko. Kaka nkungakaji ulombela mwanda wa kukafunda Masomo a Basapudi ba Bulopwe. Inoko myaka mivule ibapite’po kwitwa mpika. Tutu nkasampe ulomba Yehova amukomeje ku misongo mikatampe mwanda wa amwingidile bininge mu kipwilo. Inoko kukoma mpika. Bambutwile bene Kidishitu balombela’mba wabo mwana ashale nyeke mu bubine. Inoko mwana wakwata butyibi bwa kuleka kwingidila Yehova.

² Padi nobe walombele Yehova kintu kampanda, inoko kwikitambula mpika. Kino kibwanya kukulengeja ulange amba Yehova ulondololanga milombelo ya bantu bakwabo, inoko kalondololangapo yobe. Nansha padi ubwanya kulanga’mba kudi kintu kibi kyolongele. Ye mweivwanine ne kaka umo witwa bu Janice.b Aye ne wandi mulume badi balombela Yehova ebakwashe bakengile ku Betele. Kaka Janice unena’mba: “Nadi nkulupile amba baketwita bukidi bonka.” Inoko papityile myaka mivule bano ba mulume ne mukaji kwitwa mpika. Janice unena’mba: “Neivwene bibi ne kuvutakanibwa ñeni. Nadi neipangula i bika byonongele ku meso a Yehova. Nalombēle bininge mwanda wa kukengila ku Betele. Mwanda waka Yehova kalondolwelepo milombelo yami?”

3. I bika byotusa kwisambila’po mu kino kishinte?

³ Kitatyi kimo, tubwanya kwiipangula shi Yehova utejanga milombelo yetu. Enka ne bengidi bamo ba Yehova ba kikōkeji ba pa kala bēipangwile namino. (Yoba 30:20; Ñim. 22:2; Hab. 1:2) Le i bika bibwanya kukukulupija’mba Yehova ukalondolola milombelo yobe? (Ñim. 65:2) Pa kutana malondololo ku kino kipangujo, tusa kulondolola bidi bino bipangujo bilonda’ko: (1) Le i bika byotubwanya kutengela kudi Yehova? (2) Le i bika bitengēle Yehova kotudi? (3) Mwanda waka bibwanya kwitulomba kujadika bintu bimo byotulomba? Bino ye byotusa kwisambila’po mu kino kishinte.

LE I BIKA BYOTUBWANYA KUTENGELA KUDI YEHOVA?

4. Le kukwatañana na Yelemia 29:​12, Yehova i mulaye kulonga bika?

⁴ Yehova i mulaye amba ukateja milombelo yetu. (Tanga Yelemia 29:12.) Leza wetu usenswe batōtyi bandi ba kikōkeji, o mwanda utanga nyeke mutyima ku milombelo yabo. (Ñim. 10:17; 37:28) Inoko, kino kekishintululapo amba uketupa byonso byotumulomba. Bintu bimo byotulomba pano bibwanya kuketupebwa enka mu ntanda mipya.

5. Le i bika bibandaulanga Yehova pateja milombelo yetu? Shintulula.

⁵ Yehova ubandaulanga bintu byotulomba shi bikwatañene na mpango yandi. (Isa. 55:​8, 9) Mu ino mpango, mubadilwa kudinga pano pa ntanda bana-balume ne bana-bakaji badi mu bumo kadi mu nsangaji, munshi mwa buludiki bwandi. Inoko Satana wānenene amba, bantu bakekala biyampe shi beendeja abo bene. (Ngo. 3:​1-5) Pa kulombola’mba byānenene Satana i bya bubela, Yehova wālekele bantu beludike abo bene. Ino buludiki bwa bantu, bo buletele makambakano mavule otwikonda nao dyalelo. (Mus. 8:9) Nanshi tubaivwanija’mba Yehova kasapo kutalula’ko makambakano onso mu kino kitatyi. Shi weatalwile’ko, bamo badi ba kulanga’mba buludiki bwa bantu i buyampe, ne amba bubwanya kupwija makambakano a bantu.

6. Mwanda waka tufwaninwe kukulupila’mba Yehova ukalondolola nyeke milombelo yetu mu muswelo wa buswe kadi moloke?

⁶ Yehova ubwanya kulondolola mu muswelo mwishile ku milombelo ya muswelo umo. Kimfwa, Mulopwe Hezekia pawābelele bininge, wāzenzele Yehova amukwashe akome. Yehova nandi wāmukomeja. (2 Ba. 20:​1-6) Inoko, mutumibwa Polo paāzenzele Yehova amutalule “mwiba mu ngitu,” mobimwekela misongo yaādi nayo, Yehova kāmutalwilepo ano makambakano. (2 Ko. 12:​7-9) Kimfwa kikwabo i kya mutumibwa Yakoba ne Petelo. Mulopwe Heloda wādi ukimba kwibepaya abo bonso babidi. Kipwilo kyālombēle pa mwanda wa Petelo, kadi mobimwekela kyālombēle ne pa mwanda wa Yakoba. Inoko, Yakoba wāipaibwa, Petelo aye wapandijibwa mu kingelengele. (Bil. 12:​1-11) Tubwanya kwiipangula amba, ‘Mwanda waka Yehova wāpandije Petelo ino wāleka kupandija Yakoba?’ Bible kanenene’popo kintu.c Ino kyotubwanya kukulupila i kino: mashinda onso a Yehova i ‘ampikwa bukondame nansha patyetye.’ (Kup. 32:4) Kadi tuyukile amba ba Petelo ne Yakoba bādi betabijibwe na Yehova. (Kus. 21:14) Kyaba kimo, Yehova ubwanya kulondolola milombelo yetu mu muswelo oketwadipo tulangila. Inoko byotukulupile amba Yehova ulondololanga nyeke milombelo yetu na buswe ne na boloke, ketutatanangapo muswelo watonga kwitulondolola.—Yoba 33:13.

7. Le tuloñanga bukomo bwa kwepuka bika, ne mwanda waka?

⁷ Tuloñanga bukomo bwa kuleka kudingakanya ngikadilo yetu na ya bantu bakwabo. Kimfwa, tubwanya kulomba Yehova etukwashe mu muswelo kampanda mupotoloke, inoko kwitupa byotumulombele mpika. Mwenda mafuku, twajingulula’mba muntu mukwabo wamulombele enka kintu kimo’kya, Yehova wamupa’kyo. Bino ye byatene ne kaka Anna. Wadi ulombela’mba wandi mulume Matthew, akome ku misongo ya dyaya. Enka mu kine kitatyi’kya, bakaka babidi banunu bene Kidishitu badi nabo babela dyaya. Kaka Anna walombēle pa mwanda wa Matthew ne bano bakaka babidi. Bano bakaka babidi bakoma, inoko Matthew wafwa. Dibajinji, Anna weipangwile shi bano bakaka babidi bakomene pa mwanda wa Yehova webakweshe. Kadi shi i Yehova webakweshe, mwanda waka kalondolwelepo milombelo yandi ya amba wandi mulume akome? Na bubine, ketuyukilepo kyakweshe bano bakaka babidi bakome. Inoko kyotuyukile i amba, Yehova ukafudija lonso makambakano etu, kadi wabilanga kusangula balunda nandi bafwile.—Yoba 14:15.

8. (a) Le kukwatañana na Isaya 43:​2, i muswelo’ka witukwatakanyanga Yehova? (b) Le i muswelo’ka ubwanya kwitukwasha milombelo kitatyi kyotwikonda na makambakano? (Tala video inena’mba, Milombelo Itukwashanga Tunekenye Makambakano.)

⁸ Yehova uketukwatakanya nyeke. Yehova byadi Tata wetu wa buswe, kasakengapo kwitumona tususuka. (Isa. 63:9) Nansha nankyo, ketukiñengapo ku makambakano etu onso, mene abwanya kudingakanibwa na minonga nansha mimbi ya mudilo. (Tanga Isaya 43:2.) Inoko, i mulaye kwitukwasha ‘potupita’mo.’ Kadi kakalekapo makambakano etu etususule bya lonso. Ne kadi Yehova witupanga mushipiditu wandi ujila wa bukomo mwanda wa kwitukwasha tūminine. (Luka 11:13; Fid. 4:13) O mwanda, tubwanya kukulupila’mba tukekala nyeke na bine byotusakilwa pa kūminina, ne pa kushala na kikōkeji kwadi.d

LE I BIKA BITENGĒLE YEHOVA KOTUDI?

9. Kukwatañana na Yakoba 1:​6, 7, mwanda waka tufwaninwe kukulupila’mba Yehova uketukwasha?

⁹ Yehova utengēle tumukulupile. (Bah. 11:6) Kyaba kimo, tubwanya kumona’mba makambakano etu abetupite mutwe. Tubwanya enka padi ne kushilula kutatana shi Yehova uketukwasha. Inoko Bible witukulupija’mba na bukomo bwa Leza, tubwanya “kukanda lubumbu.” (Ñim. 18:29) Nanshi pa kyaba kya kushilula kutatana, tufwaninwe kulomba Yehova na lwitabijo, koku tukulupile amba ukalondolola milombelo yetu.—Tanga Yakoba 1:​6, 7.

10. Leta kimfwa kilombola muswelo otubwanya kulonga bintu kukwatañana na milombelo yetu.

¹⁰ Yehova utengēle tulonge bintu kukwatañana na milombelo yetu. Kimfwa, tutu ubwanya kulomba Yehova amukwashe bamupe konje ku kaji mwanda wa akatanwe ku kitango kya ntanda. Le Yehova ubwanya kulondolola namani ino milombelo? Ubwanya kupa uno tutu bukankamane bwasakilwa pa kukamona mukulu wandi wa kaji. Inoko uno tutu ufwaninwe kwenda kukamona mukulu wandi wa kaji ne kumulomba. Bibwanya kumulomba kwisamba nandi misunsa mivule. Ubwanya enka ne kulomba kushinta kitatyi kyandi kya kwingila na kya mwingidi mukwabo. Kadi shi bibwanika, ubwanya ne kulomba konje wa mafuku a kumutyiba lupeto.

11. Mwanda waka tufwaninwe kwendelela kulombela pangala pa makambakano etu?

¹¹ Yehova utengēle twendelele kumulomba pangala pa makambakano etu. (1 Ts. 5:17) Yesu wālombwele amba, bintu bimo byotulomba kebiketupebwapo ponka na ponka. (Luka 11:9) Nanshi kokakōka! Endelela kulomba na mutyima umo. (Luka 18:​1-7) Kitatyi kyotwendelela kulomba pa mwanda kampanda, tulombolanga Yehova amba bintu byotumulomba i bya mvubu mpata kotudi. Kadi tulombolanga lwitabijo mu bukomo bwandi bwa kwitukwasha.

MWANDA WAKA BIBWANYA KWITULOMBA KUJADIKA BINTU BIMO BYOTULOMBA?

12. (a) Le i kipangujo’ka kyotufwaninwe kwiipangula pangala pa byotulomba, ne mwanda waka? (b) Le milombelo yetu ibwanya kulombola namani amba tulēmekele Yehova? (Tala kapango “Le Bintu Byonomba Bilombola’mba Ndēmekele Yehova?”)

¹² Shi ketutambwilepo bintu byotulomba mu milombelo, tubwanya kwiipangula bino bipangujo bisatu. Kibajinji, ‘Le nombelanga pa mwanda wa bintu byendele’mo?’ Divule tulañanga’mba tuyukile byobya biyampe kotudi. Inoko byotulomba bibwanya kwikala byampikwa kamweno kotudi. Shi tulombela pangala pa makambakano kampanda, kubwanya kwikala muswelo muyampe wa kupwija makambakano’a kutabuka owa otulangila’mba o muyampe. Kadi bintu bimo byotulomba bibwanya kuleka kukwatañana na kiswa-mutyima kya Yehova. (1 Yo. 5:14) Kimfwa, tubandaulei’ko kimfwa kya bambutwile botwesambilanga’po ku ngalwilo. Balombēle Yehova akwashe wabo mwana ashale nyeke mu bubine. Bimweka’mba kulomba kwabo i kwendele’mo. Inoko, Yehova kaningilangapo muntu kumwingidila. Witusakilanga batwe bonso, kubadila’mo ne betu bana, tutonge kumutōta. (Kup. 10:​12, 13; 30:​19, 20) Nanshi bambutwile badi bafwaninwe kulomba Yehova ebakwashe batenge mutyima wa wabo mwana, amba asanswe Yehova ne kwikala mulunda nandi.—Nki. 22:6; Ef. 6:4.

13. Le kukwatañana na Bahebelu 4:​16, i kitatyi’ka kiketukwasha Yehova? Shintulula.

¹³ Kipangujo kya bubidi kyotubwanya kwiipangula i kino, ‘Le kyo kitatyi kya Yehova kya kwitupa byotulomba?’ Tubwanya kumona’mba tusakilwa malondololo a kiponka na ponka ku milombelo yetu. Inoko na bubine, Yehova ye uyukile biyampe kitatyi kya kwitukwasha. (Tanga Bahebelu 4:16.) Shi ketutambwilepo kiponka na ponka malondololo ku byotulomba, tubwanya kulanga’mba kilondololwa kya Yehova i kya amba ‘Napele.’ Inoko padi kilondololwa kyandi i kya amba ‘Kitatyi kekyabwene.’ Kimfwa, tulangulukilei monka pa kimfwa kya tutu nkasampe walombele Yehova amukomeje ku misongo. Shi Yehova wamukomeje mu kingelengele, Satana wadi ubwanya kunena’mba uno tutu waendelele kwingidila Yehova mwanda’tu wamukomeje. (Yoba 1:​9-11; 2:4) Kadi, Yehova ke mutunge kala kitatyi kya kutalula’ko misongo yonso. (Isa. 33:24; Kus. 21:​3, 4) Pano’ko bidi, ketubwanyapo kutengela Yehova etukomeje mu kingelengele. Nanshi uno tutu wadi ubwanya kulomba Yehova amupe bukomo ne ndoe ya mutyima, amba ōminine misongo ne kwendelela kumwingidila na kikōkeji.—Ñim. 29:11.

14. Le i ñeni’ka yowaboila ku kimfwa kya Janice?

¹⁴ Tuvulukei kimfwa kya Janice, walombēle Yehova mwanda wa kukengila ku Betele. Myaka itano pa kupita’po, waivwanije amba Yehova walondolwele milombelo yandi, inoko ke mu muswelopo waadi ulangila. Unena’mba: “Yehova waingidije kino kitatyi mwanda wa kumfundija ne kunkwasha ngikale mwine Kidishitu muyampe. Byadi binomba kuningija kikulupiji kyami mwadi. Nadi nenwe kulumbulula bibidiji byami bya kwifunda pa kasuku. Kadi nadi nenwe kwikala na nsangaji ya mutyima mine keilondakanangapo na ngikadilo yotudi’mo.” Mwenda mafuku, Janice ne wandi mulume baityilwe kukengila mu mwingilo wa kipindi. Janice pavuluka’byo unena’mba: “Yehova walondolwele milombelo yami, inoko ke mu muswelopo onadi nangila. Byaunombele kitatyi kampanda pa kwimwena muswelo muyampe walondolwele Yehova milombelo yami, inoko mfwija’ko bininge pa kwimwena buswe ne kanye kandi.”

15. Mwanda waka bibwanya kwitulomba kuleka kulomba tumyanda tonso pa bute pa bute? (Tala ne kifwatulo.)

¹⁵ Kipangujo kya busatu kyotubwanya kwiipngula i kino, ‘Le mfwaninwe kushinta bintu byonomba?’ Nansha shi i biyampe kulomba bintu bipotoloke, tubwanya kujingulula byobya bitusakila Yehova na kuleka kumulomba tumyanda tonso pa bute pa bute. Tubandaulei kimfwa kya kaka nkungakaji wadi ulombela mwanda wa kukafunda Masomo a Basapudi ba Bulopwe. Wadi ukimba kukafunda ano masomo mwanda wa abwanye kukengidila kokwa kusakilwa bukwashi. Nanshi kitatyi kyaadi wendelela kulombela’mba bamwite, wadi ubwanya ne kulomba Yehova amukwashe ajingulule miswelo mikwabo yabwanya kutandabula’mo mwingilo wandi. (Bil. 16:​9, 10) Kupwa wadi ubwanya kulonga bintu kukwatañana na ino milombelo, na kwipangula mutadi wa kipindi shi kubwipi na kwabo kudi kipwilo kisakilwa bapania bavule. Nansha kadi wadi ubwanya kulembela bilo ya musambo mwanda wa kwipangula bamulombole kokwa kusakilwa basapudi ba Bulopwe.e

16. Lelo i bika byotubwanya kukulupila?

¹⁶ Monka motwebimwena, tubwanya kukulupila’mba Yehova ukalondolola milombelo yetu mu muswelo wa buswe kadi moloke. (Ñim. 4:3; Isa. 30:18) Kitatyi kimo ketubwanyapo kutambula kilondololwa kyotwadi tulangila. Inoko Yehova ukata nyeke mutyima ku milombelo yetu. Witusenswe bininge. Kadi kaketwelapo nansha dimo. (Ñim. 9:10) Nanshi endelela ‘kumukulupila kitatyi kyonso,’ kadi musapwile byonso bikudi ku mutyima mu milombelo.—Ñim. 62:8.