Miswelo ya Kutandabula Mwingilo Obe

YESU pa kutuma bandi bana ba bwanga bakengile bu basapudi ba Bulopwe, wēbanenene amba: “Mwangulo i mukatampe, ino bengidi i batyetye.” Kwādi mwingilo mukatampe wa kwingila, o mwanda wābwejeje’ko amba: “Abijai Mwinē mwangulo atume bengidi mu mwangulo wandi.” (Mat. 9:37, 38) Yesu wālombwele bana ba bwanga mwa kwingidila mwingilo wabo. Binenwa byandi byādi bilomba kulonga bintu na kampeja-bukidi, wānenene amba: “Kemukapupo kujokoloka bibundi byonso bya Isalela aye Mwanā muntu kufika mpika.”​—Mat. 10:23.

² Dyalelo nadyo kukidi bivule bya kulonga mu mwingilo wa budimi. Ino myanda miyampe ya Bulopwe ifwaninwe kusapulwa kumeso kwa mfulo kufika, kadi kitatyi kyendanga kipwa! (Mako 13:10) Budimi byoidi i ntanda, netu tudi mu ngikadilo iifwene na yoya yādi’mo Yesu ne bandi bana ba bwanga, inoko mu ludingo lukatampe mpata. Batwe netu twi batyetye shi twidingakanye na midiyala ne midiyala ya bantu badi mu ino ntanda, ino tukulupile amba Yehova uketukwasha. Myanda miyampe ya Bulopwe ikasapulwa pa ntanda ponso, kadi mfulo ikafika mu kitatyi kitungwe na Yehova. Lelo tukatangidija Bulopwe bwa Leza kumeso mu būmi bwetu mwanda wa kuvuija ne pa mfulo mwingilo wetu? Le i bitungo’ka bya kiteokratike byotukokeja kulondalonda mwa kuvuijija’o?

³ Yesu wālombwele byobya bilomba Yehova kudi bengidi Bandi bepāne, amba: “Sanswa Yehova Leza obe na mutyima obe onso, na muya obe onso, na ñeni yobe yonso, ne na bukomo bobe bonso.” (Mako 12:30) Batwe bonso tunenwe kwingila mwingilo wa Leza na muya wetu onso. Ko kunena’mba tulombolanga bupyasakane bwetu bukatampe ne bubinebine bwa kwipāna kwetu na kwingila na bukomo bonso mu mwingilo wa Yehova. (2 Tm. 2:15) Kadi batwe bonso tudi na mikenga mivule, mungya ngikadilo ne bwino bwa muntu ne muntu. Tala bidi mikenga imoimo yotudi nayo, kupwa yuka i bitungo’ka bya kiteokratike byokalondalonda pa kuvuija mwingilo obe.

KWINGILA BU MUSAPUDI PA KIPWILO

⁴ Bonso betabija bubine badi na dyese dya kusapula myanda miyampe. Uno o mwingilo mwine wāpēle Yesu bandi bana ba bwanga kwingila. (Mat. 24:14; 28:19, 20) Mwanā bwanga wa Yesu Kidishitu ushilulanga divule na kusapwila bantu bakwabo myanda miyampe pa kupwa’tu kwiivwana. Mo mwālongele ba Andele, Fidipa, Konilusa, ne bakwabo. (Yoa. 1:40, 41, 43-45; Bil. 10:1, 2, 24; 16:14, 15, 25-34) Lelo kino kishintulula’mba muntu ukokeja kushilula kala kusapwila bakwabo myanda miyampe aye kabatyijibwe? I amo! Shi muntu wabwanya’tu bisakibwa bya kwikala musapudi wa kubulwa kubatyijibwa mu kipwilo, upebwanga mukenga wa kusapula bukamoni ku njibo ne njibo. Kadi ukokeja kutambila ne mu miswelo mikwabo ya mwingilo wa busapudi mungya bwino ne ngikadilo yandi.

⁵ Shi musapudi wapu kubatyijibwa, nabya kakabulwepo kulonga bukomo bwandi bonso mwanda wa kukwasha bakwabo befunde myanda miyampe. Bana-balume ne bana-bakaji bene, bonso badi na dyese dya kutambila mu mwingilo wa busapudi. Tweselwanga potwendeleja nansha’tu bityetye tumweno twa Bulopwe bwa Leza kumeso. Yewa ense utandabula mwingilo wandi, kubadila’mo ne miswelo mikwabo ya mingilo, bine ukekala na nsangaji.

KWINGIDILA KOKWA KUSAKIBWA BENGIDI BAVULE

⁶ Kekubulwe padi mwaba wa kipwilo kyenu wingilwanga’mo kyaba ne kyaba ne kusapulwa’mo senene. Shi bidi namino, ukokeja kumona’mba i biyampe kutandabula mwingilo obe na kuvilukila kokwa kusakilwa bengidi bavule mu budimi. (Bil. 16:9) Shi wi mukulumpe nansha mwingidi wa mingilo, kubwanya kwikala kipwilo kikwabo kikasangela bukwashi bobe. Mutadi wenu wa kipindi ukokeja kukupa’ko milangwe ya mwa kukwashisha kipwilo kikwabo kya mu kipindi kyenu. Shi usaka kukengidila mu kibundi kikwabo mu yenu ntanda, bilo ya musambo ikakupa’po milangwe ya kukukwasha.

⁷ Le usakanga kukengila mu ntanda ingi? Shi i amo, bandaula bya binebine myanda kumeso kwa kuviluka. Le ubulwe’po kwisamba uno mwanda na bakulumpe ba pa kyenu kipwilo? Na bubine kuno kuviluka kukashinta myanda mivule mu būmi bobe ne bwa muntu ense omwenda nandi. (Luka 14:28) Ino, shi kusakilepo kukekala’ko mafuku mavule, nabya i kipite buya kukimba kwa kwingidila’nka mu yenu ntanda.

⁸ Mu matanda amo, batutu bengidijibwa bu batadi bakidi bapya mu bubine. Batutu betyepeje ba mu kibundi’kya betabijanga na mutyima umo kuleka bakulumpe ba bwino bavilukila mu kyabo kipwilo batangidile mingilo. Shi wi mukulumpe kadi ulañanga kuvilukila ku ntanda kampanda, yuka’mba kitungo kyobe ke kwingilapo pa kyaba kya batutu bokatana. Ino i kwingila nabo pamo. Wibakankamike bakimbe biselwa mu kipwilo ne kwitabija’byo. (1 Tm. 3:1) Tūkija mutyima shi bintu bimobimo kebiloñwangapo na mobilongelwanga mu yenu ntanda. Ingidija bwino bobe bwa bu mukulumpe mwanda wa kukwasha bya binebine batutu. Nabya, shi kosake kuviluka ne kujokela ku yenu ntanda, bakulumpe ba mu kibundi’kya bakabwanya kukwatakanya kipwilo senene.

⁹ Kumeso kwa bilo ya musambo kukutumina majina a bipwilo bikokeja kumwena mu bukwashi bobe, Komite wa Mingilo wa pa Kipwilo kyenu ukatuma bidi mukanda wa kukuyukanya. Uno mukanda udi na mvubu nansha shi wingilanga bu mukulumpe, bu mwingidi wa mingilo, bu pania, nansha bu musapudi. Komite wa mingilo ukatuma mukanda wa kukuyukanya pamo ne mukanda wa kulomba kobe ku bilo ya musambo wa mu ntanda yosaka kukengidila’mo.

KUSAPULA MU LUDIMI LUNGI

¹⁰ Pa kutandabula mwingilo obe, padi ukasaka kwifunda ludimi lungi, kubadila’mo ne ludimi lwa batumama. Shi udi na kitungo kya kufunda mwa kusapwila mu ludimi lungi, ubulwe’po kwisamba na bakulumpe ne na mutadi wa kipindi? Bakokeja kukupa’ko milangwe kampanda ne kukukankamika mobifwaninwe. Na kulonda buludiki bwa bilo ya musambo, bipindi bimobimo biteakanyanga’ko tulasa twa kwifunda ndimi mwanda wa kufundija basapudi ne bapania ba bwino mwa kusapwila mu ludimi lungi.

MWINGILO WA BUPANIA

¹¹ Basapudi bonso bafwaninwe kuyuka senene bisakibwa bilombwa pa kwingila bu pania mukwashi, wa lonso, ne wa pa bula ne miswelo mikwabo ya mwingilo wa kitatyi kyonso. Pania ufwaninwe kwikala mwine Kidishitu mubatyijibwe uleta kimfwa, udi mu ngikadilo imupa muswelo wa kupityija kibalwa kitungwe kya mansá mu kusapula myanda miyampe. Komite wa Mingilo wa pa Kipwilo witabijanga mafomu a balomba mwingilo wa bu pania mukwashi ne wa lonso, ino bapania ba pa bula batoñwanga na bilo ya musambo.

¹² Bapania bakwashi bakokeja kutongwa mwanda wa kwingila kweji umo, myeji kampanda milondakane, nansha bya nselelele mu bula bwa kitatyi kampanda, mungya ngikadilo yobadi’mo. Basapudi bavule ba Bulopwe basangelanga kwingila bu bapania bakwashi mu bitatyi bya pa bula, kimfwa mu kitatyi kya Kivulukilo nansha mu kweji wa bupempudi bwa mutadi wa kipindi. Bakwabo bengilanga mu myeji ya makonje. Basapudi babatyijibwe bakyenda ku masomo bakokeja kwilembeja bu bapania bakwashi mu kitatyi kyobadi mu konje. Basapudi babwanya kutonga kwingila bu pania mukwashi bwa mansá matyetye mu Kweji 3 ne Kweji 4 ne mu kweji wa bupempudi bwa mutadi wa kipindi. Nansha shi udi mu ngikadilo’ka, shi udi na ngikadila ne bibidiji biyampe, shi ukokeja kwitūdila’ko mpangiko ya kufikila pa nsá ilombelwe, ne ukulupile amba ukokeja kwingila kweji umo nansha myeji mivule bu pania mukwashi, nankyo bakulumpe bakasangela kubandaula fomu obe wa kulomba kolomba dino dyese dya mwingilo.

¹³ Pa kubwanya bisakibwa bya kutongwa bu pania wa lonso, ufwaninwe kala kwikala mu ngikadilo yobwanya kufikila pa nsá ilombelwe ku mwaka ne mwaka. Shi wi pania wa lonso, bikulomba kwingila pamo na kipwilo kyenu. Bapania bapyasakane i dyese ku kipwilo, bashinsakanyanga buzanzamuke bwa kwingila mwingilo wa budimi ne kadi bakankamikanga bakwabo nabo bengile mwingilo wa bupania. Ino kumeso kwa kulomba bu pania wa lonso, ufwaninwe kwikala musapudi uleta kimfwa kiyampe, mubatyijibwe ke papite myeji isamba.

¹⁴ Bapania ba pa bula batoñwanga divule mu bapania ba lonso belombola’mba bengilanga biyampe mwingilo wabo. Kadi babwanya kwingila konso kusaka kwibatuma bilo ya musambo. Divule, batumwanga ku bifuko bitolwele kobakokeja kutana bantu basangela musapu ne kushimika bipwilo bipya. Dimodimo bapania ba pa bula batumwanga ku bipwilo bisakilwa bukwashi pa kusambakanya myaba yabyo. Bapania ba pa bula bamo bengila bu bakulumpe batumwanga kukakwasha bipwilo bityebitye, nansha shi kekusakilwapo bengidi bavule mu budimi. Bapania ba pa bula bapebwanga kalupeto katyetye ka kupota tubintu twibasakilwa mu būmi. Bapania ba pa bula bamo batoñwanga kwingila mu kakitatyi katyetye.

BAMISHONELE BATUMWA MU BUDIMI

¹⁵ Komite wa Mingilo wa Kitango Kyendeji ye utoñanga bamishonele batumwa mu budimi, kupwa batumwa na Komite wa Musambo wa mu ntanda’ya kukengidila mu myaba mudi bantu bavule bininge. Bengilanga bininge mu kujadika ne kuningisha mwingilo wa busapudi ne mingilo ya pa kipwilo. Divule, bamishonele batumwa mu budimi bafundijibwanga ku Masomo a Basapudi ba Bulopwe. Bapebwanga mobo ne kalupeto katyetye ka kupota tubintu twibasakilwa mu būmi.

MWINGILO WA MU KIPINDI

¹⁶ Boba batongwa bu batadi ba bipindi na Kitango Kyendeji bafundijibwanga ne kwikala na bwino na kwingila dibajinji bu batadi ba bipindi bampingakani. Bano bana-balume basenswe mwingilo ne banababo. I bapania bapyasakane, befundi ba Bible batakamane, kadi i baneni ne bafundiji bayampe. Bayukene bu bantu balombola patōka bipa bya mushipiditu, ne kwikala na bujalale, mutyima unekena, ne kusansanya. Shi tutu i musonge, wandi mukaji pania i kaka uleta kimfwa kiyampe mu bilongwa ne muswelo waikele na bakwabo. I musapudi muyampe. Kadi wivwanije mwingilo wandi wa bu mukaji mwine Kidishitu ukōkelelela, kesambengapo pa kyaba kya wandi mulume nansha kutādila mīsambo. Batadi ba bipindi ne babo bakaji badi na mpangiko mikomo, o mwanda boba bakimba uno mwingilo bafwaninwe kwikala bakomo mu ngitu biyampe. Bapania kebalombengapo abo bene bu mutadi wa kipindi. Ino, balombolanga mutadi wabo wa kipindi amba badi na mutyima wa kwingila mu kipindi, nandi webapa’ko milangwe.

MASOMO A KITEOKRATIKE

¹⁷ Masomo a Basapudi ba Bulopwe: Kusakilwa bininge basapudi ba Bulopwe mwanda wa kusambakanya myaba keisapulwanga’mopo bininge ne kukwatakanya bipwilo ku mushipiditu. O mwanda, batutu bankungulume, bakaka bankungakaji, ne boba besongele babwanya kutambula bufundiji bwa pa bula ku Masomo a Basapudi ba Bulopwe. Kupwa kwa masomo, boba batambula mapolome batumwanga kwingila bu bapania ba lonso kokwa kusakilwa basapudi bavule mu yabo ntanda. Inoko, boba bemwekeja’mba basakanga kwingila babwanya kupebwa mingilo mikwabo mu yabo ntanda nansha mu ntanda ingi. Batyetye kete babwanya kutumwa kwingila bu bapania ba pa bula ba kakitatyi katyetye nansha ba lonso. Bapania basaka kufunda ano masomo babwanya kuyuka bisakibwa na kutanwa ku lenyo īsambila pa ano masomo iloñwanga ku kitango kya ntanda.

¹⁸ Masomo a Kwifunda Bible a Ngileade a Watchtower: Batutu bankungulume, bakaka bankungakaji, ne boba besongele batongwa kukafunda ano masomo i boba besambanga Angele, bengila bu bengidi ba pa bula ba kitatyi kyonso. Badi na bwino bwa kuningisha ne kujadika mwingilo wa budimi nansha bulongolodi bwa musambo. I belombole kala’mba basangelanga kwingidila banababo ne kukwasha bakwabo mu muswelo muyampe amba bafunde ne kulonda senene buludiki bwa Bisonekwa ne bwa kiteokratike. Komite wa Musambo wa mu yenu ntanda ye wa kutonga boba babwanya kukafunda badinge mafomu. Boba batambula mapolome ku ano masomo batumwanga mu budimi nansha ku bilo ya musambo mu ntanda ingi nansha mu yabo ntanda.

MWINGILO WA KU BETELE

¹⁹ Kwingila ku Betele i dyese dya pa bula. Dijina Betele dishintulula’mba “Njibo ya Leza,” ne uno mwityilo i mufwaninwe bya binebine kwitwa bino bité bya mwingilo wa kiteokratike. Batutu ne bakaka bengila ku Betele bengilanga mwingilo wa mvubu mpata wa kulupula, kwalamuna, ne kwabanya mabuku esambila pa Bible. Mwingilo wabo udi na mvubu ku Kitango Kyendeji, kine kitala ne kuludika bipwilo ntanda yonso. Bantu bavule ba ku Betele bengila bu balamuni bashikete ne kwingidila mu bifuko bya mu mwaba wa musambo mwisambwa ludimi lwine lobalamuna. Kino kibakwashanga bevwanije muneneno wisambwanga difuku ne difuku. Kadi babwanya kwimwena abo bene shi bantu bevwananga biyampe muneneno wingidijibwe mu mabuku obalamuna.

²⁰ Mingilo mivule ingilwa ku Betele ilombanga bukomo bwa ngitu. O mwanda divule boba betwanga kukengidila ku Betele i batutu bepāne, babatyijibwe kadi bakidi bansongwalume, bakomo mu ngitu, beteleke mu bidyoma. Shi kusakibwa bengidi ku musambo utala ntanda yenu ne usaka nobe kukengila ku Betele, ukokeja kuyukila’ko bisakibwa bikwabo kupityila ku bakulumpe ba kyenu kipwilo.

MWINGILO WA LŪBAKO

²¹ Lūbako lwa mobo a kiteokratike lubadilwa mu mingilo ijila, lwiifwene na mwingilo wa lūbako lwa tempelo ya Solomone. (1 Ba. 8:13-18) Batutu ne bakaka bavule bamwekejanga bupyasakane butendelwa pa kupāna na mutyima tō kitatyi kyabo ne bintu byabo mwanda wa kwingila uno mwingilo.

²² Le nobe ubwanya kwela’ko kuboko? Shi wi musapudi mubatyijibwe ne udi na mutyima wa kwingila uno mwingilo, nabya batutu batala lūbako mu wenu mwaba bakasangela bukwashi bobe kadi badi na mutyima wa kukufundija nansha shi udi na bwino butyetye. Ubulwe’po kusapwila bakulumpe ba mu kyenu kipwilo amba usakanga kukakwasha’ko? Basapudi bamo babatyijibwe babwenye bisakibwa baendele kukakwasha na mutyima umo ku mwingilo wa lūbako lwa mobo a kiteokratike mu matanda makwabo.

²³ Kudi mikenga mivule ya kwingila na bengila mingilo ya lūbako. Basapudi babatyijibwe baleta kimfwa kiyampe badi na bwino kampanda babwanya kukwatakanya mingilo ingilwa kubwipi na kwabo bakokeja kwingila bu bengidi ba kwilanga ku Bilo ya Lūbako ya mu Wenu Musambo. Bakwabo babwanya kukwatakanya mwingilo wa kulampe bininge mu kitatyi kampanda kadi batoñwanga na bilo ya musambo kwingila bu bōbaki ba kwilanga mu mayenga abidi kutūla ku myeji isatu. Boba batongwa kwingila kitatyi kilampe betwanga bu bengidi ba ku lūbako. Mwingidi wa ku lūbako utumwa kukengidila mu ntanda ingi wingilanga bu mwingidi wa ku lūbako wa mu ntanda ingi. Kisumpi kya Lūbako kibundilwe na bengidi ba ku lūbako ne bōbaki ba kwilanga kyo kimaninanga lūbako ne lūbako kadi kikwashibwanga’ko na bengidi ba kwilanga ba ku Bilo ya Lūbako ya mu Wenu Musambo ne na bōbaki ba kwilanga ba mu bipwilo bitalwa na lwine lūbako’lwa. Bisumpi bya Lūbako bivilukanga kupwa kwa mwingilo, badi koku kebadi koku mu mwaba wa musambo.

BITUNGO BYOBE BYA KU MUSHIPIDITU I BITUNGO’KA?

²⁴ Shi wi mupāne būmi bobe kudi Yehova, nankyo mutyima obe i wa kwingidila Yehova nyeke ne nyeke. Ino bitungo byobe bya ku mushipiditu i bitungo’ka? Kwikala na bitungo bya ku mushipiditu kukakukwasha wingidije bukomo bobe ne bintu bikwabo na tunangu. (1 Ko. 9:26) Kwitungila bino bitungo kukakutamija ku mushipiditu ne kukukwasha ute mutyima ku bintu bya mvubu pokimba kufikila pa madyese makwabo a mingilo.​—Fid. 1:10; 1 Tm. 4:15, 16.

²⁵ Mutumibwa Polo wētushidile kimfwa kilumbuluke kya kwiula mu mwingilo otwingidila Leza. (1 Ko. 11:1) Polo wādi wielela’ko na bukomo bwandi bonso mu mwingilo wa Yehova. Wājingulwile amba Yehova wāmupele mikenga mivule. Polo wālembēle banabetu ba mu Kodinda amba: “Kibelo kikatampe kitwala ku mingilo i kinshitwilwe.” Mwene netu i muswelo umo onka? I amo, tudi na mikenga mivule ya kwingidila Yehova pamo na kipwilo, nakampata mu kusapula myanda miyampe ya Bulopwe. Ino pamo bwa Polo, pa kupityila pa “kibelo kikatampe” bilomba kulwa na “bakinkwa bavule.” (1 Ko. 16:9) Polo wādi na mutyima wa kwīfula aye mwine. Tala byaānenene: “Nkupilanga umbidi wami ne kwiumuna bupika.” (1 Ko. 9:24-27) Le netu tulañanga uno muswelo?

²⁶ Batwe bonso twi bakankamikwe kwielela’ko kufikila pa bitungo bya kiteokratike mungya ngikadilo idi’mo muntu ne muntu. Bavule dyalelo i bepāne mu mingilo imoimo ya kitatyi kyonso mwanda betungīle tamba kala bitungo bya kiteokratike mu būmi bwabo. Nansha kepobadi bakidi banuke, badi bakankamikwa na bambutwile babo ne na bantu bakwabo amba betungile bitungo. O mwanda basangele mpata kwingila kaji ka mvubu mu mwingilo wa Yehova, pampikwa kwialakanya. (Nki. 10:22) Bitungo bikwabo biyampe i bya kusapula yenga ne yenga, kushilula ne kwendeja kifundwa kya Bible, nansha kushia’ko kitatyi kivule kya kuteakanya kupwila. Kintu kya mvubu i kushimatyija pototo ne kuvuija ne pa mfulo mwingilo wetu. Shi tulonge namino, tukalēmeka Yehova ne kukimba kufikila pa kitungo kyetu kya kumwingidila nyeke ne nyeke.​—Luka 13:24; 1 Tm 4:7b, 8.