Le Wadi Uyukile?
Le i kyendwa-nakyo’ka kyādi kikandile’mo ntungu mwine Efiopya pāmufwenene Fidipa?
KISHIMA “dikalo” kingidijibwe mu ludimi lubajinjibajinji, kibwanya kufunkila pa byendwa-nabyo bivule mu Bwalamuni bwa Ntanda Mipya. (Bil. 8:28, 29, 38) Inoko, bimweka bu mwine Efiopya wādi ukende mu dikalo dikatampe kutabuka dyendwanga nadyo ku divita nansha dingidijanga banyemi. Tala bubinga bumobumo bwetulengeja tufule ku uno mulangwe.
Mwine Efiopya wādi mwingidi mukatampe wāendele lwendo lwa makilometele mavule. I “muntu [wādi] mupebwe lupusa kudi Kandase, mulopwe mukaji wa bene Efiopya, wadi utūdilwe pa byabulēme byandi byonso.” (Bil. 8:27) Efiopya wa kala i musele kipindi kya kungala kya Sudan wa dyalelo, ne kipindi kya kunshi bininge kya Edipito wa dyalelo. Nansha padi uno muntu byākadipo wenda mu kyendwa-nakyo kimo mu lwendo ne lwendo, wādi padi na biselwa bivule byaādi wenda nabyo. Byendwa-nabyo bimo byādi bingidijibwa mu myaka katwa kabajinji Y.M. mwanda wa kusela bantu, byādi bya matonto aná kadi bipūte kūlu. Muntu umo unena pangala pa mukanda wa Bilongwa amba, “Bino byendwa-nabyo byādi bisela bintu bivule, bipēleja lwendo, enka ne kulengeja bantu bende lwendo lwa makilometele mavule.”
Mwine Efiopya, wādi utanga pāmufwenene Fidipa. Nsekununi inena’mba, “Fidipa wanyemena’ko kaenda widikunkuja, wamwivwana utanga na diwi ditunduke mukanda wa Isaya, mupolofeto.” (Bil. 8:30) Makalo a kwenda nao, keādipo apungilwe mwanda wa kwenda bukidibukidi. Kuno kwenda kwa bityebitye kwa dikalo kwālengeje ntungu atange, ino kadi kwālengeje ne Fidipa apete dikalo aye lwa panshi.
Mwine Efiopya “wazenza Fidipa ekile, ashikate nandi.” (Bil. 8:31) Mu dikalo dya kunyema nadyo lubilo, banyemi bādi babwanya kwimana. Inoko mu dikalo dyādi dyendwa nadyo, mwādi mubwanya kutanwa pa kushikata ntungu ne Fidipa.
Kukwatañana na myanda ya ku bukomo bwa mushipiditu idi mu Bilongwa shapita 8 ne myanda ya mu mānga idi’ko dyalelo, mabuku etu a panopano i mafwatule ntungu mwine Efiopya ukende mu dikalo dikatampe kutabuka dyendwanga nadyo ku bulwi, nansha dya banyemi.