Komeja Kikulupiji Kyobe mu Bulongolodi bwa Yehova

1. Le bantu ba Yehova bādi balongololwe namani mu myaka katwa kabajinji?

KITATYI kyonso kipānga Yehova bantu bandi mwingilo wa kwingila, usakanga bewingile mu ndudi. (1 Ko. 14:33) Kimfwa, Leza usakanga’mba myanda miyampe isapulwe pa ntanda yonso ikelwe na bantu. (Mat. 24:14) Yehova i mutonge Yesu bu wa kuludika uno mwingilo. Yesu uloñanga bukomo amba uno mwingilo wingilwe mu ndudi. Pāshimikilwe bipwilo mu bifuko palapala mu myaka katwa kabajinji, kwātongelwe bakulumpe mwanda wa kuleta bulombodi ne kutangidila kumeso. (Bil. 14:23) Kitango kya bakulumpe mu Yelusalema kyādi kīmanine mwingilo kine kyādi kibundilwe na batumibwa ne bana-balume banunu, kyākwete’ko butyibi kampanda bwādi bunenwe kulondwa na bipwilo byonso. (Bil. 15:2; 16:4) Batutu ne bakaka byobākōkele buno bulombodi, “bipwilo byadi bininga mu lwitabijo ne kwivudija.”—Bil. 16:5.

2. Le Yehova wendejanga namani bantu bandi ne kwibapa byakudya bya ku mushipiditu tamba mu 1919?

² Yehova wendelelanga kulongolola bantu bandi enka ne dyalelo. Tamba mu 1919, Yesu wingidijanga kisumpi kityetye kya bana-balume bashingwe māni, mwanda wa kulongolola mwingilo wa busapudi ne kuleta byakudya bya ku mushipiditu ku balondi bandi.a (Luka 12:42) Na bubine, i kimweke patōka’mba Yehova weselanga mwingilo wa kino kisumpi.—Isa. 60:22; 65:​13, 14.

3-4. (a) Leta kimfwa kilombola muswelo otumwenanga mu kwikala balongololwe. (b) I bika byotusa kubandaula mu kino kishinte?

³ Shi ketwadipo balongololwe, ketwadipo ba kubwanya kwingila mwingilo wētupele Yesu kwingila. (Mat. 28:​19, 20) Kimfwa, langa’po bidi shi kekwadipo myaba yotupelwe kusapula’mo; muntu ense wadi wa kusapula konso kwasaka. Mu myaba imo mwadi mwa kusapulwa bininge kudi basapudi beshileshile, inoko mu mikwabo kusapulwa’mo mpika. Le ubwanya kuvuluka’ko miswelo mikwabo yotumwenanga mu kwikala balongololwe?

⁴ Monka mwālongolwedile Yesu balondi bandi paādi pano pa ntanda, ye mwaendelelanga kulongolola ne bantu ba Leza dyalelo. Mu kino kishinte, tusa kubandaula’mo kimfwa kitushidile Yesu ne muswelo ulondanga bulongolodi kimfwa kyandi. Tusa kwisambila’mo ne pa muswelo otubwanya kulombola’mba tukulupile bulongolodi bwa Yehova.

BULONGOLODI BWETU BULONDANGA KIMFWA KYA YESU

5. Le i muswelo’ka umo bidi otulondanga kimfwa kya Yesu? (Yoano 8:28)

⁵ Yesu wēfundile kudi Tata wandi wa mūlu byafwaninwe kulonga ne kunena. Bulongolodi bwa Yehova bulondanga kimfwa kya Yesu na kwingidija Kinenwa kya Leza mwanda wa kwitukwasha tuyuke kiyampe ne kibi, ne kwitupa bulombodi bwa mwa kwiendejeja mu būmi. (Tanga Yoano 8:28; 2 Tm. 3:​16, 17) Betuvulujanga kitatyi ne kitatyi kutanga Kinenwa kya Leza ne kwingidija byotwifunda’mo. Le tumwenanga namani mu kulonda ano madingi?

6. Le i muswelo’ka umo wa mvubu otumwenanga mu kwifunda Bible?

⁶ Tumwenanga’mo bininge kitatyi kyotwifunda Bible na kwingidija mabuku etu. Kimfwa, tubwanya kudingakanya bufundiji bwa mu Bible na bulombodi botutambula ku bulongolodi. Kitatyi kyotumona’mba bulombodi botutambula bwimanine pa Bisonekwa, kikulupiji kyetu mu bulongolodi bwa Yehova kiningilanga’ko.—Loma 12:2.

7. Le i musapu’ka wāsapwile Yesu, ne bulongolodi bwa Yehova bulondanga namani kimfwa kyandi?

⁷ Yesu wāsapwile “myanda miyampe ya Bulopwe bwa Leza.” (Luka 4:​43, 44) Kadi Yesu wāsoñenye bandi bana ba bwanga basapule myanda ya Bulopwe. (Luka 9:​1, 2; 10:​8, 9) Dyalelo bonso belunga ku bulongolodi bwa Yehova basapulanga musapu wa Bulopwe, ekale bashikatanga kwepi nansha badi na biselwa’ka mu bulongolodi.

8. Le i dyese’ka dyotudi nadyo?

⁸ Tudi na dyese dikatampe dya kusapwila bantu bakwabo bubine butala Bulopwe bwa Leza! Ke muntupo yense udi na dino dyese. Kimfwa, kitatyi kyādi Yesu pano pa ntanda, kālekelepo mishipiditu mibi isapule bukamoni pādi. (Luka 4:41) Dyalelo kumeso kwa muntu kusapula pamo na bantu ba Yehova, ufwaninwe kubwanya bisakibwa. Tulombolanga’mba tukwete na bulēme dino dyese dya kusapula, na kupāna bukamoni mu kitatyi kyo-kyonso ne mu kifuko kyo-kyonso mungya motubwaninya. Pamo bwa Yesu, kitungo kyetu i kya kukuna ne kusangila nkunwa ya bubine bwa Bulopwe mu mityima ya bantu.—Mat. 13:​3, 23; 1 Ko. 3:6.

9. Le bulongolodi bwa Yehova i buyukanye namani dijina dya Leza?

⁹ Yesu wāyukenye dijina dya Leza. Mu milombelo yaālombēle Tata wandi wa mūlu, Yesu wānenene’mo amba: “Nayukanya dijina dyobe.” (Yoa. 17:26) Bulongolodi bwa Yehova bwiulanga kimfwa kya Yesu na kulonga byonso byobubwanya mwanda wa kukwasha bantu bakwabo bayuke dijina dya Leza. Muswelo umo bidi i kupityila ku Bisonekwa Bijila Bwalamuni bwa Ntanda Mipya. Buno bwalamuni i bwaluje mu Bible dijina dya Leza ponso podyādi. Pesambwa pano, uno Bible mutuntulu nansha kipindi ke mwalamunwe mu ndimi 270 ne kupita. Mu Mbwejo A4 ne A5 mu buno bwalamuni, usa kutana’mo myanda ilombola muswelo ujokejibwe dijina dya Leza mu Bible. Mbwejo C itanwa mu Bible wa Kwifunda wa Falanse, ilombwela’ko bubinga bukwabo bwa amba dijina dya Leza difwaninwe kutanwa mu Bisonekwa bya Kingidiki bya bwine Kidishitu misunsa 237.

10. Le i bika byowefunda ku byanenene lolo umo ushikatanga mu Myamar?

¹⁰ Pamo bwa Yesu, tusakanga kukwasha bantu bavule bayuke dijina dya Leza. Lolo umo wa myaka 67 wa mu Myamar paefundile amba Leza udi na dijina, wasumije’nka ne impolo, wanena’mba: “Uno o musunsa wami mubajinji kwivwana’mba dijina dya Leza i Yehova. . . . Mubamfundija kintu kya mvubu mpata kyonadi nkyayukile kashā.” Monka mwalombwela’kyo kino kimfwa, kuyuka dijina dya Leza kubwanya kushinta bininge bantu ba mityima miyampe.

ENDELELA KUKULUPILA BULONGOLODI BWETU

11. Le bakulumpe babwanya kulombola namani amba bakulupile bulongolodi bwa Yehova? (Tala ne kifwatulo.)

¹¹ Le i muswelo’ka umo ubwanya kulombola bakulumpe amba bakulupile bulongolodi bwa Yehova? Kitatyi kyobatambula bulombodi, bakulumpe banenwe kwibutanga na katentekeji ne kulonga bukomo bwabo bonso mwanda wa kwibulonda. Kimfwa, batambulanga bulombodi bwa mwa kupityijija bipindi ku kupwila, mwa kulombelela ku meso a kipwilo, ne mwa kulelela mikōko ya Kidishitu. Bakulumpe balonda bulombodi butamba ku bulongolodi, bakwashanga batutu ne bakaka bemone bu bakingwe kadi basanshibwe.

12. (a) Mwanda waka tufwaninwe kwingidila pamo na boba betutangidile kumeso? (Bahebelu 13:​7, 17) (b) Mwanda waka tufwaninwe kuta mutyima pa ngikadila miyampe ya boba betutangidile kumeso?

¹² Kitatyi kitupa bakulumpe bulombodi, tufwaninwe kwibulonda na mutyima tō. Shi tulonga namino, tukebapēleleja mwingilo wabo. Bible witukankamika tukōkele ne kukōkelelela boba betutangidile kumeso. (Tanga Bahebelu 13:​7, 17.) Inoko kyaba kimo kebipēlangapo. Mwanda waka? Mwanda bano bana-balume i ba kubulwa kubwaninina. Inoko shi tute mutyima pa ngikadila yabo mibi pa kyaba kya kuta’o pa ngikadila yabo miyampe, tukekala bwa batwe bakwasha balwana netu. Muswelo’ka? Tukazozeja kikulupiji kyetu mu bulongolodi bwa Leza. Bino byo bitusakila balwana netu. Le i muswelo’ka otubwanya nakampata kujingulula ne kupela myanda ya bubela inena balwana netu?

KOKALEKA BANTU BAKWABO BAZOZEJE KIKULUPIJI KYOBE MU BULONGOLODI BWETU

13. Le balwana na Leza bakimbanga namani kumwekeja bulongolodi bwandi bu bubi?

¹³ Balwana na Leza baloñanga bukomo bwa kumwekeja bintu biyampe bitala bulongolodi bwandi bu bibi. Kimfwa, twi befunde kupityila ku Bisonekwa amba Yehova usakanga batōtyi bandi bekale batōka ku ngitu, mu malango, ne ku mushipiditu. Aye unena’mba muntu ense wa mwiendelejo wa disubi upela kwisāsa, ufwaninwe kupangwa mu kipwilo. (1 Ko. 5:​11-13; 6:​9, 10) Tukōkelanga uno musoñanya wa mu Bisonekwa. Inoko balwana netu bakimbanga kwingidija uno musoñanya mwanda wa kwitunena’mba twi bantu ba kōminija, ba kasuminiji ne bampikwa buswe.

14. Le kalenga-byanzwe wa mfumo ya bubela pa bulongolodi bwa Yehova i ani?

¹⁴ Jingulula mwine witulwa. Satana Dyabola ye kalenga-byanzwe wa ino mfumo ya bubela. I “shandya bubela.” (Yoa. 8:44; Ngo. 3:​1-5) O mwanda tufwaninwe kutengela’mba, Satana ukengidija bantu bandi mwanda wa kusambakanya mfumo ya bubela pa bulongolodi bwa Yehova. Bino byo byālongekele ne mu myaka katwa kabajinji.

15. Le bendeji ba bipwilo bālongele Yesu ne balondi bandi bika?

¹⁵ Mu myaka katwa kabajinji, Satana wāingidije bantu bamo banene myanda ya bubela padi Mwanā Leza mubwaninine, mwine wālongele ne bingelengele bya kutendelwa. Kimfwa, bendeji ba bipwilo bālombwele bantu amba bukomo bwa Yesu bwa kupanga bandemona butambanga kudi “mulopwe wa bandemona.” (Mako 3:22) Kitatyi kyādi kisambijibwa Yesu, bendeji ba bipwilo bāmubepele amba utukanga Leza ne kusoñanya bibumbo bilombe kwipaibwa kwandi. (Mat. 27:20) Mwenda mafuku, kitatyi kyādi kisapula balondi ba Kidishitu myanda miyampe, boba bādi bebalwa “bakela bantu ba mizo bulobo ne kwibasoñanya bibi” bapangepange bano bene Kidishitu. (Bil. 14:​2, 19) Kiteba kya Mulami kya difuku 1 Kweji 12, 1998, kishintulula pangala pa Bilongwa 14:2 amba: “Bayuda bakinkwa kebākadikilepo’nka pa kupela musapu kete, ehe, ino bēkwete’ko na kulonga kampanye ka kusalaja lubābo, basonshila Bajentaila bashikwe bene Kidishitu.”

16. Le i bika byotufwaninwe kuvuluka kitatyi kyotwivwana mfumo ya bubela?

¹⁶ Ne dyalelo, Satana ukyendelelanga kubepa bubela. “Ongolanga ntanda yonso ikelwe na bantu.” (Kus. 12:9) Shi ubaivwana mfumo ya bubela itala bulongolodi nansha batutu betutangidile kumeso, vuluka balwana na Leza mobābepedile Yesu ne bana ba bwanga ba mu myaka katwa kabajinji bubela. Dyalelo bantu ba Yehova bapangwapangwanga ne kubepelwa bubela monka mwālaile’kyo Bible. (Mat. 5:​11, 12) Mfumo ya bubela keiketongolapo shi tuyuke mwine wiisambakanya ne kulonga’po kintu kiponka na ponka. Le i bika byotufwaninwe kulonga’po?

17. Le i muswelo’ka otubwanya kwepuka kongolwa na mfumo ya bubela? (2 Temote 1:13) (Tala ne kapango “Bya Kulonga’po Poivwana Mfumo ya Bubela.”)

¹⁷ Pela mfumo ya bubela. Mutumibwa Polo wālombwele patōkelela byotufwaninwe kulonga potwivwana mfumo ya bubela. Wālombwele Temote asoñanye “bantu bamobamo baleke . . . kuta mutyima ku mfumo ya bubela” ne kupela “mfumo ya bubela ya mutonko.” (1 Tm. 1:​3, 4; 4:7) Nansha mwana mutyetye byabwanya kuboya kintu panshi ne kwikyela mu kanwa, muntu mutame wivwanije kyaka kabwanyapo kulonga kino nansha dimo. Netu tupelanga mfumo ya bubela mwanda tuyukile mwine wiisambakanya. Tutejanga enka “binenwa biyampe” bya bubine.—Tanga 2 Temote 1:13.

18. Le i muswelo’ka otubwanya kulombola’mba tukulupile bulongolodi bwa Yehova?

¹⁸ Tubabandaula’ko’tu miswelo isatu iulanga’mo bulongolodi bwa Leza kimfwa kya Yesu. Powifunda Bible, tala miswelo mikwabo iulanga’mo bulongolodi bwa Leza kimfwa kya Yesu. Kwasha bakwabo mu kipwilo bakomeje kikulupiji kyabo mu bulongolodi bwa Leza. Kadi endelela kulombola’mba wibukulupile na kwingidila Yehova na kikōkeji, ne kulamata ku bulongolodi bwandi bwine bwaingidija mwanda wa kulonga kiswa-mutyima kyandi. (Ñim. 37:28) Twendelelei kufwija’ko pa dyese dyotudi nadyo dya kubadilwa mu bantu ba Yehova ba buswe kadi ba lulamato.