Twitabijei na Kwityepeja Amba Kudi Bintu Byoketuyukilepo

1. Le Yehova i mwitupange na bukomo’ka, ne mwanda waka?

YEHOVA i mwitupange na bukomo bwa kulanga, kuyuka bintu, kwivwanija myanda, ne kulonga bintu na tunangu. Mwanda waka i mwitupange uno muswelo? Usakanga tutane “buyuki bwa Leza” ne kumwingidila na bukomo bwetu bwa kulanguluka.—Nki. 2:​1-5; Loma 12:1.

2. (a) Le i mikalo’ka yotudi nayo? (Yoba 37:​23, 24) (Tala ne kifwatulo.) (b) Le tumwenanga namani mu kwitabija mikalo yetu?

² Nansha byotudi na bukomo bwa kufunda bintu kampanda, ino tudi na mikalo mu byotuyukile. (Tanga Yoba 37:​23, 24.) Tubandaulei’ko kimfwa kya Yoba. Yehova wāmwipangwile bipangujo bivule bine byāmukweshe evwanije amba kudi bintu bivule byakayukilepo. Ino mīsambo yandi na Yehova yāmukweshe etyepeje ne kulemununa mulangilo wandi. (Yoba 42:​3-6) Batwe netu tumwenanga mu kuyuka na kwityepeja’mba kudi bintu byoketuyukilepo. Kuno kwityepeja kuketukwasha tukulupile amba Yehova uketusokwela bine byotufwaninwe kuyuka pa kukwata butyibi bwa tunangu.—Nki. 2:6.

3. Le i bika byotusa kubandaula mu kino kishinte?

³ Mu kino kishinte, tusa kubandaula’mo bintu kampanda byoketuyukilepo ne makambakano abwanya kulupuka ku kubulwa kwibiyuka. Kadi tusa kubandaula mwanda waka i biyampe kuleka kuyuka bintu kampanda. Kubandaula ino myanda kukaningija kikulupiji kyetu mudi Yehova, “Yewa mubwaninine mu buyuki,” mwine ubwanya kwitulombola bine byotufwaninwe kuyuka.—Yoba 37:16.

KETUYUKILEPO KITATYI KISA KUFIKA MFULO

4. Mungya Mateo 24:​36, le i bubine’ka boketuyukilepo?

⁴ Tanga Mateo 24:36. Ketuyukilepo kitatyi kisa kufula ino ngikadilo ya bintu. Enka ne Yesu paādi pano pa ntanda, kādipo uyukile “difuku ne nsá mine.”a Mwenda mafuku wāsapwidile batumibwa bandi amba, Yehova Mwinē Bitatyi, uyukile kitatyi kine kikalongeka bino binkumenkume “mu buludiki bwandi aye mwine,” nansha na lupusa lwandi. (Bil. 1:​6, 7) Yehova ke mutūle’ko kala kitatyi kya kufudija ino ngikadilo ya bintu, ino batwe ketuyukilepo kitatyi kine kyoikafula.

5. Le kubulwa kuyuka kitatyi kisa kufika mfulo kudi na lupusa’ka potudi?

⁵ Mungya byānenene Yesu, ketuyukilepo bulampe bwa kitatyi kyotufwaninwe kwilaija kumeso kwa mfulo kufika. Kino kibwanya kwitulengeja tubulwe kitūkijetyima nansha kutyumukwa mutyima, nakampata shi kepadi myaka mivule yotwilaija’nka kwilaija difuku dya Yehova. Kadi kūminina kwetu kubwanya kutūlwa pa ditompo shi bantu ba mu kyetu kisaka nansha bantu bakwabo betufutulula. (2 Pe. 3:​3, 4) Tubwanya enka ne kulanga’mba shi twadi tuyukile kitatyi kisa kufika mfulo, twadi ba kupēlelwa kwikala na kitūkijetyima ne kūminina kafutululo.

6. Mwanda waka kubulwa kuyuka kitatyi kisa kufika mfulo kudi na kamweno kotudi?

⁶ Yehova byaketusapwidilepo kitatyi kisa kufika mfulo, i mwitupe mukenga wa kumulombola’mba tumwingidilanga pa mwanda wa buswe botumusenswe kadi tumukulupile. Ketwingidilangapo Yehova na kulama difuku kampanda mu ñeni, kebidi pamo bwa batwe bamwingidilanga pa mwanda wa dino difuku. Pa kyaba kya kwikambakanya na kukimba kuyuka kitatyi kikāya “difuku dya Yehova,” i biyampe tute mutyima pa byabuyabuya bikalongeka mu dino difuku. Kulonga namino kuketukwasha twendelele kwingidila Leza ne kulonga bukomo bwetu bonso mwanda wa kumusangaja.—2 Pe. 3:​11, 12.

7. Le i bika byotuyukile?

⁷ I biyampe tute mutyima pa byotuyukile. Tuyukile amba mafuku a mfulo ashilwile mu 1914. Yehova i mulembeje mu Bible bupolofeto bwisambila pa uno mwaka, kadi bulombola kamo ne kamo ka mwadi mwa kwikadila bintu tamba mu 1914. Kino i kitulengeje tukulupile amba “difuku dikatampe dya Yehova dibafwena.” (Zef. 1:14) Kadi tuyukile amba Yehova usaka tusapwile bantu bavule “myanda miyampe ya Bulopwe.” (Mat. 24:14) Uno musapu usapulwanga mu kintu kya matanda 240 ne mu ndimi 1000 ne kupita. Ketusakilwapo kuyuka “difuku ne nsá mine” pa kwingila na bupyasakane uno mwingilo wa mvubu.

KETUYUKILEPO BIBWANYA KULONGA’PO YEHOVA

8. Le “mwingilo wa Leza wa bine” ufunkila pa bika? (Musapudi 11:5)

⁸ Ketuyukangapo nyeke “mwingilo wa Leza wa bine.” (Tanga Musapudi 11:5.) Uno mwingilo ufunkila pa byobya biloñanga Yehova nansha byobya byalekanga bilongeke mwanda wa kufikidija kiswa-mutyima kyandi. Ketubwanyapo kuyuka kine kyalengeja Yehova aleke mwanda kampanda ulongeke nansha kuyuka byabwanya kulonga’po mwanda wa kwitukwasha. (Ñim. 37:5) I bikomo kotudi kwivwanija myanda na ino, monka mobikadile bikomo kwivwanija muvungulukilanga mwana mu difu dya inandi, kintu kine kekyaivwanije senene enka ne befundi ba sianse.

9. Le kubulwa kuyuka bikalonga’po Yehova kubwanya kwikala na lupusa’ka potudi?

⁹ Kubulwa kuyuka bikalonga’po Yehova mwanda wa kwitukwasha, kubwanya kwitulengeja twikake kukwata butyibi kampanda. Tubwanya kwikaka kutandabula mwingilo wetu, pamo bwa kupēleja būmi mwanda wa kwenda kokwa kusakilwa basapudi ba Bulopwe. Kadi kubulwa kufikila pa bitungo byetu mu bulongolodi bwa Yehova, kubulwa kwimwena bipa bilupuka ku mwingilo wetu mukomo, nansha kutanwa na bikoleja mu mwingilo wa Leza, kubwanya kwitulengeja tulange amba Leza ketwitabijepo.

10. Le kubulwa kuyuka bikalonga’po Yehova kwitukwashanga tutamije ngikadila’ka ya mvubu?

¹⁰ Kubulwa kuyuka bikalonga’po Yehova kwitukwashanga tutamije ngikadila ya mvubu, pamo bwa kwityepeja ne butūkanye. Kadi kwitukwashanga twivwanije amba milangwe ya Yehova ne mashinda andi adi pangala pa etu. (Isa. 55:​8, 9) Ne kadi kwitukwashanga twikale na kikulupiji kikomo kya amba Yehova uketukwasha. Potwimwenanga bipa biyampe bilupuka mu mwingilo wa busapudi nansha mu mingilo mikwabo ya mu bulongolodi bwa Yehova, tupanga Yehova mitendelo imufwaninwe. (Ñim. 127:1; 1 Ko. 3:7) Shi bintu kebilongekelepo mungya motwadi twibilangila, tuvulukei amba Yehova uyukile byasa kulonga’po. (Isa. 26:12) Batwe tulongei byotubwanya, kadi tukulupilei nyeke amba Yehova ukavuya bishele. Ne kadi tukulupilei amba Yehova uketuludika senene, nansha shi kakebilongapo mu kingelengele na mwaādi ulongela kitatyi kimo pa kala.—Bil. 16:​6-10.

11. Le i bintu’ka byotuyukile bine bibwanya kwitukwasha?

¹¹ Tuyukile amba Yehova i wa buswe, boloke, ne tunangu. Kadi tuyukile amba umwene na mvubu byonso byotumulongela ne byotulongela banabetu mu lwitabijo. Ne kadi tuyukile amba Yehova upalanga nyeke mpalo boba bonso bamulamete.—Bah. 11:6.

KETUYUKILEPO BIKETUFIKILA DYA KESHA

12. Mungya Yakoba 4:​13, 14, le i bintu’ka byoketuyukilepo?

¹² Tanga Yakoba 4:​13, 14. Bubine i amba ketuyukilepo mukekadila būmi bwetu dya kesha. Kadi “kitatyi ne myanda yampikwa kulaa” bitufikilanga mu ino ngikadilo ya bintu. (Mus. 9:11) Kino kilengejanga tukomenwe kuyuka shi byotukalonga bikendeka ne shi tukekala bōmi pa kwibifikija ku mfulo.

13. Le kubulwa kuyuka biketufikila dya kesha kudi na lupusa’ka potudi?

¹³ Kubulwa kuyuka biketufikila dya kesha kwitulengejanga tukolelwe kūminina. Namani le? Tubwanya kuzumbija mutyima pa bintu biketufikila, ne kino kibwanya kwitujimijija nsangaji yetu. Binkumbulu ne myanda ya mu kitulumukila bibwanya kwitutyumuna mutyima ne kwituletela njia. Kadi shi byotwadi tutengele kebifikidilepo, tubwanya kuzoza ne kutyumukwa mutyima.—Nki. 13:12.

14. Le nsangaji yetu ya endaenda itambanga ku bika? (Tala ne bifwatulo.)

¹⁴ Potūminina makambakano tulombolanga’mba nansha shi tubatanwa na bika, batwe twingidilanga Tata wetu wa mūlu mwanda tumusenswe, ino ke pa mwandapo wa kamweno ketu. Nsekununi ya mu Bible ilombola’mba, ketufwaninwepo kutengela Yehova etukinge ku makambakano etu onso ne amba ketutungilangapo bintu biketutana mu būmi. Uyukile amba nsangaji yetu keitambengapo ku kuyuka bitutengele kumeso, ino itambanga ku kulonda bwendeji bwandi ne ku kumukōkela. (Yel. 10:23) Shi tulombe bukwashi kudi Leza kumeso kwa kukwata butyibi, bidi pamo bwa batwe banena’mba: “Shi Yehova uswile, tukekala bōmi ne kulonga kintu kampanda nansha kintu kansangwa.”—Yak. 4:15.

15. Le i bika byotuyukile pa mafuku a kumeso?

¹⁵ Nansha byoketuyukilepo bibwanya kwitutana difuku ne difuku, ino tuyukile amba Yehova i mwitulaye būmi bwa nyeke mūlu nansha pano pa ntanda. Kadi tuyukile amba Yehova kabwanyapo kubepa ne amba i kutupu kintu kibwanya kumulengeja atunye kufikidija milao yandi. (Tet. 1:2) Aye bunka ye ubwanya “[kulaya] bintu bikafika, ne tamba kala, bintu kebyalongekele.” Bino ye byālongele Yehova pa kala, kadi ye byakalonga ne kumeso’ku. (Isa. 46:10) Tukulupile bya binebine amba i kutupu kintu kibwanya kulengeja Yehova atunye kwitusanswa. (Loma 8:​35-39) Uketupa tunangu, busengi, ne bukomo botusakilwa pa kūminina makambakano onso etutana. Bine, tukulupilei amba Yehova uketukwasha ne kwitwesela.—Yel. 17:​7, 8.

KETUBWANYAPO KWIVWANIJA SENENE MWITUYUKILE YEHOVA

16. Le mungya Ñimbo ya Mitōto 139:​1-6, i buyuki’ka budi na Yehova boketubwanyapo kwivwanija ne pa mfulo?

¹⁶ Tanga Ñimbo ya Mitōto 139:​1-6. Umpangi wetu uyukile motupangīlwe kadi uyukile motubumbīlwe ku ngitu, mu malango, ne mu ñeni. I mwitute mutyima nyeke. Uyukile byotunena ne byotusaka kunena, byotulonga ne kine kyalengeja twibilonge. Mulopwe Davida wānenene amba, Yehova i mwitujokoloke mwanda wa kwitulama kadi ketudipo kulampe kwakabwanyapo kwitupeta. Bine, i kitulumukwa kuyuka’mba Mfumu Mwinē Lupusa Lonso kadi mubikadi wa diulu ne ntanda, Umpangi mwinē bukomo bonso mwine wāpangile diulu ne ntanda, witutele mutyima namino! O mwanda Davida wānenene amba: “Buno i buyuki buntulumuja’po kashā. Budi peulu bininge bumpite bungi kuyukidija.”—Ñim. 139:​6, kunshi kwa dyani.

17. Mwanda waka tubwanya kukomenwa kwitabija’mba Yehova wituyukile senene?

¹⁷ Padi kisaka kyotutamīne’mo, bibidiji byetu, nansha nkulupilo yetu ya pa kala, bibwanya kulengeja tukomenwe kumona Yehova bu Tata wetu wa buswe mwine witutele mutyima. Kadi tubwanya kulanga’mba Yehova kakakimbepo nansha kwituyuka kwine pa mwanda wa bilubo byotwalongele mafuku kunyuma, ne amba udi kulampe netu. Bine, enka ne Davida wēivwene namino. (Ñim. 38:​18, 21) Kadi muntu ulonga bukomo bwa kushinta mwiendelejo wandi ne kwiendeja mungya misoñanya myoloke ya Leza ubwanya kwiipangula’mba, ‘Shi bine Leza undyukile senene, mwanda waka ukimba nshinte būmi bonadi ngibidile?’

18. Le i bika byotukamwena’mo shi twitabije amba Yehova wituyukile kupita motwiyukile batwe bene? (Tala ne bifwatulo.)

¹⁸ Bitulomba kwifunda kwitabija’mba Yehova wituyukile senene kupita motwiyukile batwe bene kadi umonanga biyampe bidi motudi byoketubwanyapo kumona. Yehova aye witusenswe nansha byamonanga bilubo byetu ne kwivwanija muswelo otwiivwana ne otulonga bintu. (Loma 7:15) Shi tubaivwanija’mba Yehova umwene biyampe bidi motudi, kino kibwanya kuningijija’ko mutyima wetu wa kumwingidila na kikōkeji ne na nsangaji.

19. Lelo i bika byotuyukile na kikulupiji kyonso padi Yehova?

¹⁹ Tuyukile amba Yehova i buswe. Kadi kekudipo kyotutatena uno mwanda. (1 Yo. 4:8) Tuyukile amba misoñanya yandi myoloke imwekejanga buswe bwaetusenswe ne amba usakanga nyeke twikale biyampe. Ne kadi tuyukile amba Yehova usakanga tukekale na būmi bwa nyeke. O mwanda i mwitupe kala kinkūlwa mwanda wa tukebumone. Kyabuntu kya kinkūlwa kitukulupija’mba tubwanya kunekenya bulwi bwetu nansha byotudi bampikwa kubwaninina. (Loma 7:​24, 25) Kadi tuyukile amba “Leza i mukatampe kupita mityima yetu kadi uyukile bintu byonso.” (1 Yo. 3:​19, 20) Yehova uyukile byonso bitutala, kadi ukulupile amba tukalonga kiswa-mutyima kyandi.

20. Le i bika biketukwasha tuleke kuzumbija mutyima bipitepite?

²⁰ Yehova ketufilepo myanda mine yotusakilwa kuyuka. Shi twitabije na kwityepeja uno mwanda, nabya tukepuka kuzumbija mutyima bipitepite pa bintu byoketudipo na kyotubwanya kulonga’po, ino tukata mutyima pa myanda ya mvubu mpata. Shi tulonge namino, nabya tubalombola’mba tukulupile ne pa mfulo mudi Yehova, “Yewa mubwaninine mu buyuki.” (Yoba 36:4) Nansha byokudi myanda kampanda yoketuyukilepo pano, batwe tutengelei būmi bwa nyeke bwine buketupa mukenga wa kwifunda myanda mipya iketufundija Leza wetu Mukatakata ne yotukefunda pādi.—Mus. 3:11.