Kupwana Batwe Bene na Bene I Kuyampe Kotudi!

1-2. Le i kintu’ka kya mvubu mpata kudi Yehova, ne i bika byaetusakilanga kulonga?

MUSWELO otulongela bantu bakwabo bintu i wa mvubu mpata kudi Yehova. Yesu wētufundije amba, tufwaninwe kusanswa bakwetu motwisanshilwe batwe bene. (Mat. 22:​37-39) Muno mubadilwa ne kulombola kanye ku boba boketutōtangapo nabo. Shi tulombola kano kanye, twiulanga Yehova mwine “utambijanga dyuba dyandi ku babi ne ku bayampe kadi unokejanga mvula ku boloke ne ku bakondame bene.”—Mat. 5:45.

² Nansha Yehova byasenswe bantu bonso, ino usenswe nakampata boba balonga bintu biyampe. (Yoa. 14:21) Usakanga netu tumwiule. O mwanda witusoñanya ‘tusanswe bininge’ batutu ne bakaka ne kwibalombola “kisanso kya ku mutyima.” (1 Pe. 4:8; Loma 12:10) Kitatyi kyotulangulukila pa muswelo wa kulombola muntu kampanda buswe nansha kisanso kya ku mutyima, tulangulukilei pa muswelo otusenswe babutule betu nansha mulunda netu.

3. Le i bika byotufwaninwe kuvuluka pa mwanda utala buswe?

³ Pamo’nka bwa mutyi mukunwe usakilwa kudishibwa senene pa kutama, buswe nabo bufwaninwe kudishibwa senene pa kutama. Mutumibwa Polo wādingile bene Kidishitu amba: “Buswe bwenu bwa bu bana na bana bwendeende.” (Bah. 13:1) Yehova usakanga twendelele kusanswa bakwetu. Mu kino kishinte, tusa kubandaula’mo muswelo otufwaninwe kupwana na batōtyi-netu ne muswelo otubwanya kwendelela kulonga namino.

MWANDA WAKA TUFWANINWE KUPWANA BATWE BENE NA BENE?

4. Monka mulombwela’kyo Ñimbo ya Mitōto 133:​1, i muswelo’ka otubwanya kwendelela kukwatakanya bumo bwetu bwa bu bana na bana? (Tala ne bifwatulo.)

⁴ Tanga Ñimbo ya Mitōto 133:1. Netu twitabije byobya byālembele kaimba wa mitōto amba, bulunda bwa bine na boba basenswe Yehova i ‘buyampe’ kadi ‘busangaja.’ Monka kemubwaninyapo muntu kutulumunwa na mutyi mukatampe wamona difuku ne difuku, netu tubwanya kutunya kumona munengedile bumo budi mu bene Kidishitu. Twimonanga divule na batutu ne bakaka, padi misunsa mivule mu yenga. Le i muswelo’ka otubwanya kwendelela kwibamona na mvubu? Buswe botusenswe batutu ne bakaka bukaningila’ko shi twitūdila’ko kitatyi kya kulangulukila pa mvubu idi na muntu ne muntu mu kipwilo ne kotudi.

5. Le buswe botusenswe banabetu bubwanya kwikala na lupusa’ka pa bantu bakwabo?

⁵ Bantu bamo batanwanga ku kupwila kwetu musunsa mubajinji batulumunwanga bininge na buswe botwisenswe batwe bene na bene. Kupityila’tu ku buno buswe, babwanya kufula ku mulangwe wa amba abasokola bubine. Yesu wānenene amba: “Pa kino bonso bakayuka’mba mwi bami bana ba bwanga—shi mudi na buswe umbukata mwenu.” (Yoa. 13:35) Tubandaulei’ko kimfwa kya Kaitra ufundanga ku iniveleshite, mwine wadi wifunda Bible na Batumoni ba Yehova. Waitabije lwito lwa kukatanwa ku kitango kya ntanda. Aye pa kupwa kutanwa’ko difuku dibajinji bya mpala na mpala, wasapwila wadi umufundija Bible amba: “Kashā! Bambutwile bami kebampambile bīpa nansha dimo. Inoko ku kyenu kitango, baumpambile’ko bīpa misunsa 52 mu difuku’tu dimo! Nemwenine buswe bwa Yehova kupityila ku kino kisaka kya ku mushipiditu. Nami nsaka kutwela mu kino kisaka.” Kaitra waendelele biyampe wabatyijibwa mu 2024. Bine, kitatyi kīmwena bapya mingilo yetu, mwine mubadilwa buswe botwisenswe batwe bene na bene, divule kino kibatononanga bashilule kwingidila Yehova.—Mat. 5:16.

6. Le kupwana na batutu ne bakaka kwitukiñanga namani?

⁶ Kupwana na batutu ne bakaka kubwanya kwitukinga. Polo wālombwele banababo bene Kidishitu amba: “Mwikankamikei banwe bene na bene difuku ne difuku . . . kutyina’mba muntu nansha umo mu bukata mwenu wakōmijibwa mutyima na bukomo bwa kyongo bwa bubi.” (Bah. 3:13) Shi tubatyumukwa bininge mutyima kadi maulu etu keakimbe kushetemuka mu kashinda ka boloke, Yehova ubwanya kwingidija mutōtyi-netu mwanda wa kwitupa bukwashi botusakilwa. (Ñim. 73:​2, 17, 23) Bukwashi pamo bwa buno i bwa kamweno kotudi.

7. Le i kukwatañana’ka kudi pa buswe ne bumo? (Bene Kolose 3:​13, 14)

⁷ Tudi mu kisumpi kya bantu balonga bukomo bininge bwa kwisanswa abo bene na bene, o mwanda twimwenanga madyese mavule. (1 Yo. 4:11) Kimfwa, buswe bwitutononanga ‘twitūkijije mutyima batwe bene na bene,’ ne kino kituntwilanga ku bumo bwa bwine Kidishitu. (Tanga Bene Kolose 3:​13, 14; Ef. 4:​2-6) Ku kupwila kwetu, twimwenanga’ko nsangaji mine keitanwapo kuntu nansha kumo pano pa ntanda.

MWILĒMEKEI BANWE BENE NA BENE

8. Le Yehova witukwashanga namani twikale mu bumo na banabetu?

⁸ Bumo bwetu bwa ntanda yonso i kingelengele. Yehova i mulengeje twikale mu bumo nansha byotudi ba kubulwa kubwaninina. (1 Ko. 12:​24, 25) Bible unena’mba twi ‘bafundijibwe na Leza kwisanswa batwe bene na bene.’ (1 Ts. 4:9) Kino kishintulula’mba, Yehova wingidijanga Bible mwanda wa kwitulombola bine byotunenwe kulonga pa kupwana batwe bene na bene. Tubwanya ‘kufundijibwa na Leza’ na kubandaula na katentekeji bufundiji bwandi ne kwibwingidija. (Bah. 4:12; Yak. 1:25) Batumoni ba Yehova baloñanga bukomo bwa kulonga namino.

9. Le i bika byotwifunda mu Bene Loma 12:​9-13 pa mwanda utala kwilēmeka batwe bene na bene?

⁹ Le Kinenwa kya Leza kitufundija bika pa mwa kupwanina batwe bene na bene? Tubandaulei’ko byānenene mutumibwa Polo pa uno mwanda, monka mokilembelwe mu Bene Loma 12:​9-13. (Tanga.) Polo wānenene amba “mu kwilēmeka banwe bene na bene namo, ikalai babajinji.” Le ko kunena namani? Ko kunena’mba tufwaninwe kwikala babajinji mu kulombola bakwabo “kisanso kya ku mutyima” na kwibalekela, kwibalombola kizaji, buntu, ne bikwabokwabo. (Ef. 4:32) Kufwaninwepo’nka kwilaija tutu nansha kaka apwane nobe. Abe ‘ikala mubajinji’ kulonga namino. Yesu wānenene amba: “Nsangaji ya kupāna itabukile ya kupebwa.”—Bil. 20:35.

10. Le i muswelo’ka otubwanya kwikala bankanka mu kwikwasha batwe bene na bene? (Tala ne kifwatulo.)

¹⁰ Kintu kisangaja i amba, Polo pa kupwa kwitulombola twikale babajinji mu kwilēmeka batwe bene na bene, wētukankamikile twikale ‘bankanka ne kuleka kwikala bazoze.’ Shi muntu i nkanka wikalanga mupyasakane kadi wingilanga bininge. Shi abamupe mwingilo wiwingilanga na kininga. Nkindi 3:​27, 28 witusoñanya’mba: “Kokasuminwa biyampe boba bofwaninwe kupa’byo shi udi na bukomo bwa kukwasha.” O mwanda, shi tubamone amba muntu kampanda usakilwa bukwashi, tuloñanga byonso byotubwanya mwanda wa kumukwasha. Ketwilaijangapo; nansha kunena’mba muntu mukwabo usa kumukwasha.—1 Yo. 3:​17, 18.

11. Le i bika bibwanya kwitukwasha tupwane batwe bene na bene?

¹¹ Muswelo mukwabo otubwanya kulēmeka bakwetu, i na kupēlakana kwibalekela shi abetulubila. Bene Efisesa 4:26 unena’mba: “Kemwakashikijai dyuba mwikele’nka na bulobo.” Mwanda waka? Vese 27 unena’mba kulonga namino i kupa “Dyabola mukenga.” Yehova i mwitusapwile misunsa mivule mu Kinenwa kyandi amba tufwaninwe kwilekela batwe bene na bene. Bene Kolose 3:13 witusoñanya twendelele “kwilekela na mutyima umo.” Kulekela bakwetu bilubo i muswelo mukwabo muyampe mpata ubwanya kwitukwasha tupwane nabo. Kulonga namino kwitukwashanga tulame “bumo bwa mushipiditu mu kijimba kya ndoe kilungila pamo.” (Ef. 4:3) Mu kīpi, lulekelo lwitulengejanga twikale mu bumo ne mu ndoe.

12. Le Yehova witukwashanga namani twikale na lulekelo?

¹² Inoko, bibwanya kwitwikadila bikomo kulekela boba betusanshija. Ino tubwanya kwibalekela na bukwashi bwa mushipiditu wa Leza. Pa kupwa kwitusoñanya twisanswe ‘batwe bene na bene kisanso kya ku mutyima’ ne kwikala “bankanka,” Bible witusapwila’mba: “Akai mushipiditu.” Muntu “mwake” umwekejanga “bupyasakane ne buzanzamuke bine bilupuka” ku mushipiditu ujila. (Tala bilembwa bya kwifunda mu Falanse mu Bene Loma 12:11.) Nanshi mushipiditu wa Leza ubwanya kwitukwasha twisanswe batwe bene na bene kisanso kya ku mutyima ne kwilekela batwe bene na bene na mutyima umo. O mwanda, tuzenzanga na mutyima umo Yehova etukwashe.—Luka 11:13.

“KEKWAKIKALA KWILALULULA MU BUKATA MWENU”

13. Le i bika bibwanya kulengeja kwikale kwilalulula motudi?

¹³ Kipwilo i kibundwe na bantu ba “miswelo yonso” bene batambile mu bibidiji bishileshile. (1 Tm. 2:​3, 4) Shi ketutadijepo, kuno kwishila kubwanya kulengeja kwikale kwilalulula mu butongi bwitutala pamo bwa muvwadilo, mwidyangwilo, muswelo wa kwiundapija, nansha potutonga bya kwipwija nabyo mukose. (Loma 14:4; 1 Ko. 1:10) Leza byaefundije kwisanswa batwe bene na bene, tufwaninwe kutadija kutyina twakamwekeja butongi bwetu bu buyampe kutabuka bwa bakwabo.—Fid. 2:3.

14. Le tufwaninwe kulonga bukomo bwa kwikala bantu ba muswelo’ka, ne mwanda waka?

¹⁴ Tubwanya kulengeja kuleke kwikala kwilalulula mu kipwilo, na kulonga bukomo bwa kutūkija mityima ya banabetu ne kwibakankamika kitatyi ne kitatyi. (1 Ts. 5:11) Mu mafuku a panopano, bantu bavule badi kebakingilangapo pano bengilanga, ne boba badi bafundulwe mu kipwilo nabo i bajoke. Twibatundailanga na nsangaji! (2 Ko. 2:8) Tala byatene kaka umo wakatenwe ku kupwila ku Njibo ya Bulopwe pa kupwa kuleka’byo kwingila mu bula bwa myaka dikumi. Unena’mba, “Bauñimwine na nsangaji ne kunsambija mu makasa.” (Bil. 3:19) Le bino bilongwa’tu bipēla kadi bya kanye byamutengele namani? Unena’mba, “Byaunengeje mone amba Yehova unkwashanga ngikale monka na nsangaji.” Shi twikale bantu bakankamika bakwabo, Kidishitu ubwanya kwitwingidija mwanda wa kutūkija mityima ya boba “baputuma na mingilo ne balēmenenwe.”—Mat. 11:​28, 29.

15. Le i muswelo’ka mukwabo otubwanya kutuntwila ku bumo bwetu? (Tala ne kifwatulo.)

¹⁵ Muswelo mukwabo otubwanya kutuntwila ku bumo bwetu i kupityila ku byotunena. Yoba 12:11 unena’mba: “Lelo kutwi kekutompangapo binenwa na mutompelanga ludimi byakudya?” Pamo’nka na mutompelanga mutēki muyampe byakudya kumeso kwa kupa’byo bantu, batwe netu tufwaninwe kulangulukila na katentekeji pa byotukimba kunena kumeso kwa kwibinena. (Ñim. 141:3) Tusakanga kukulupila nyeke amba byotukimba kunena i byubaka, bitūkija mutyima, kadi ‘bya kamweno ku ba kwivwana’byo.’—Ef. 4:29.

16. Le i bāni bafwaninwe kuta bininge mutyima ku kwikala na binenwa bikankamika?

¹⁶ Balume ne bambutwile bafwaninwe kuta bininge mutyima amba bintu byobanena bikale bikankamika. (Kol. 3:​19, 21; Tet. 2:4) Bakulumpe nabo byobadi bakumbi ba luombe lwa Leza, bafwaninwe kwikala na binenwa bitūkija mutyima kadi bikankamika. (Isa. 32:​1, 2; Ngt. 6:1) Lukindi lumo lwa mu Bible lwituvuluja’mba: “Kinenwa kīsambwa pa kitatyi kifwaninwe—buya’kyo!”—Nki. 15:23.

TWISANSWEI “NA BILONGWA NE BUBINE”

17. Le i muswelo’ka otubwanya kuyuka shi tusenswe batutu ne bakaka buswe bwampikwa budimbidimbi?

¹⁷ Mutumibwa Yoano witukankamika’mba “ketufwaninwepo kusanswa na binenwa ne ludimi bitupu, ino tusanswei na bilongwa ne bubine.” (1 Yo. 3:18) Tusakanga buswe botusenswe batutu ne bakaka butambe ku mutyima. Le i muswelo’ka otubwanya kulonga namino? Shi tupityija kitatyi na batutu ne bakaka, po pene tukapwana batwe bene na bene, kadi buswe botwisenswe batwe bene na bene nabo bukaningila’ko. Nanshi kimba’ko mikenga ya kupityija kitatyi pamo na bantu bakwabo—kimfwa ku kupwila ne mu busapudi. Witūdile’ko kitatyi kya kupempula bakwenu. Shi tulonga namino, tulombolanga’mba ‘tufundijibwanga na Leza kwisanswa batwe bene na bene.’ (1 Ts. 4:9) Kadi tukendelela kwimwena kufikidila kwa binenwa bya amba, “Talai! Mobikadile biyampe kadi bisangaja bana na bana kwikala pamo mu bumo!”—Ñim. 133:1.