“Kufwena Kudi Leza I Kuyampe” Kotudi!

1-2. (a) Le i bika byotufwaninwe kulonga pa kupwana na muntu? (b) Le i bika byotusa kwisambila’po mu kino kishinte?

LELO udi na mulunda wa pabwipi bininge? Le i bika byowalongele pa kupwana nandi? Ye uno wapityije kitatyi pamo nandi, wayuka makambakano andi, ne kulonga bukomo bwa kuyuka byasenswe ne byashikilwe. Kadi wasokwele ngikadila yandi miyampe mine yowasakile padi kwiula. Ebiya wasanswa mulunda nobe.

² Pa kupwana na muntu bilombanga kitatyi ne bukomo. Bino ye byotufwaninwe kulonga ne pa kupwana bininge na Yehova Leza. Mu kino kishinte tusa kwisambila’mo pa muswelo otubwanya kufwena kudi Leza wetu ne kumona byabuyabuya bilupukanga mu kulonga namino. Dibajinji, tubandaulei mwanda waka i biyampe kufwena kudi Yehova, Mulunda netu muyampe.

3. Mwanda waka tufwaninwe kulangulukila pa byabuyabuya bilupukanga ku kufwena kudi Yehova? Leta kimfwa.

³ Na bubine kufwena kudi Yehova i kuyampe. Inoko kulangulukila pa bintu biyampe bilupukanga ku kufwena kwadi kuketulengeja tumufwene nyeke. (Ñim. 63:​6-8) Kimfwa, tuyukile amba kudya byakudya biyampe, kwitamuna bidyoma, kukōkolokwa bininge, ne kutoma mema mavule i kwa kamweno kotudi. Nansha nankyo, bantu bavule kebatelepo mutyima bininge ku bino bintu, kadi basūlanga bukomo bwabo bwa ngitu. Ino shi tulangulukila pa byabuyabuya bidi mu kulama bibidiji bitulengeja twikale bakomo mu ngitu, po pene tukendelela kwibilama. Ne batwe netu, tubwanya kuyuka’mba kufwena kudi Yehova i kuyampe kotudi, inoko kulangulukila pa byabuyabuya bilupuka ku kufwena kwadi kuketulengeja tupwane nyeke na uno Mulunda netu.—Ñim. 119:​27-30.

4. Le mulembi wa Ñimbo ya Mitōto 73:​28, wānenene bika?

⁴ Tanga Ñimbo ya Mitōto 73:28. Mulembi wa Lwimbo lwa Mitōto lwa 73 wādi mwine Levi wātongelwe kwingila bu kaimba ku tempelo ya Yehova. Ye uno wātōtele Yehova na kikōkeji mu bula bwa myaka mivule. Nansha nankyo, wāyukile amba i biyampe endelele kwivuluja aye mwine ne kuvuluja bantu bakwabo amba “kufwena kudi Leza” i kuyampe kwadi ne kobadi. Le i byabuyabuya’ka bimo bidi mu kufwena kudi Leza?

“KUFWENA KUDI LEZA” KWITULETELANGA NSANGAJI

5. (a) Mwanda waka kufwena kudi Yehova kwituletelanga nsangaji? (b) Le tunangu twa Yehova tukukwashanga ne kukukinga namani? (Nkindi 2:​6-16)

⁵ Potwenda tufwena bininge kudi Yehova, nsangaji yetu nayo yendanga ivudila’ko. (Ñim. 65:4) Kudi bubinga buvule bubingija uno mwanda. Kimfwa, tumwenanga mu kwingidija tunangu twa kamweno tutanwa mu Kinenwa kya Leza, Bible. Tuno tunangu twitukiñanga ku bintu bibi bibwanya kwitusanshija ne ku kulonga bilubo bikatampe. (Tanga Nkindi 2:​6-16.) O mwanda Bible unena’mba: “Wa nsangaji i yewa muntu utana tunangu ne muntu utambula kusansanya.”—Nki. 3:13.

6. Le i bika byālengeje kaimba wa mitōto abulwe nsangaji?

⁶ Shako, enka ne balunda na Yehova batanwanga na bitatyi bya bulanda. Mulembi wa Lwimbo lwa Mitōto lwa 73 wājimije nsangaji kitatyi kyaāshilwile kulangulukila pa bintu bibi byādi bilongeka. Wēivwene bibi ne kushilula kwabila bantu babi, mwanda wāmwene amba bantu kebengidilapo Leza ne kebakōkelapo misoñanya yandi badi biyampe. Wēongwele na kulanga’mba bantu ba bya lūma ne ba mitatulo bādi nyeke bampeta, ba būmi buyampe, kadi kebādipo basusuka. (Ñim. 73:​3-7, 12) Kitatyi kimo uno kaimba wa mitōto wāvutakanibwe ñeni kalanga’mba kwingidila Yehova kekudipo na kamweno. Mu bulanda bwandi wānenene amba: “Na bubine, ne mulame mutyima wami utōka bya bitupu ne koya makasa ami mu bumpikwa mambo.”—Ñim. 73:13.

7. Shi tubeivwana bibi, le i bika byotubwanya kulonga pa kulama nsangaji yetu? (Tala ne kifwatulo .)

⁷ Kaimba wa mitōto kālekelepo bulanda bwandi bumuzozeje. Wālongele’po kintu. Wātwelele “mu kipandulwe kikatampe kya Leza,” mwine mwaālemunwinwe na Yehova. (Ñim. 73:​17-19) Shi tubeivwana bibi, Yehova, Mulunda netu muyampe uyukanga motwiivwanina. Shi tumulombe etuludike ne kwitabija bukwashi bwaetupa kupityila ku Kinenwa kyandi ne ku kipwilo, tukekala na bukomo botusakilwa pa kūminina makambakano. Yehova wituseñanga ne kwitutalaja nansha ke kitatyi kyotulēmenenwa na kuzumbija mutyima.—Ñim. 94:19.a

“KUFWENA KUDI LEZA” KWITULENGEJANGA TWIKALE NA BŪMI BUYAMPE NE LUKULUPILO

8. Le kufwena kudi Leza i kuyampe kotudi mu miswelo’ka mikwabo ya mvubu?

⁸ Kufwena kudi Leza i kuyampe kotudi mu miswelo mikwabo ibidi ya mvubu. Dibajinji, kwitulengejanga twikale na būmi buyampe. Dya bubidi, kwitupanga lukulupilo lukomo lwa mu mafuku a kumeso. (Yel. 29:11) Shi ke pano, tubandaulei’ko na katentekeji bino byabuyabuya.

9. Le kufwena kudi Yehova kwitulengejanga namani twikale na būmi buyampe?

⁹ Kufwena kudi Yehova kwitulengejanga twikale na būmi buyampe. Bantu bavule dyalelo batuna kwikala’ko kwa Leza balañanga’mba būmi kebudipo na mvubu ne amba mwenda mafuku muzo wa muntu ukatukila pa ntanda. Inoko kwifunda Kinenwa kya Leza i kwitukulupije amba Leza “udi’ko ne amba upalanga mpalo boba bamukimba na mikeketo.” (Bah. 11:6) Enka ne dyalelo, tudi na nsangaji mwanda tuloñanga byobya byotunenwe kulonga—ko kunena’mba kwingidila Tata wetu wa mūlu, Yehova.—Kup. 10:​12, 13.

10. Le Yehova i mulaye bika ku boba bakulupile mwadi? (Ñimbo ya Mitōto 37:29)

¹⁰ Bantu bavule bakulupile enka mu būmi bwa dyalelo—kwenda ku kaji, kulela kisaka, ne kwiteakanya mwa kwikwatakenya shi kebakingilapo. Kebayukilepo bilaile Leza pa mafuku a kumeso. Inoko bengidi ba Yehova bakulupile mwadi. (Ñim. 25:​3-5; 1 Tm. 6:17) Tukulupile mudi Leza otupwene nandi, kadi tukulupile milao yalaile. (Tanga Ñimbo ya Mitōto 37:29.) Mu milao yaetulaile mubadilwa ne mulao wa kumutōta nyeke mu Paladisa.

11. Le i bika bilongekanga shi tubafwena kudi Leza, ne kino kilengejanga Leza eivwane namani?

¹¹ Kufwena kudi Leza i kuyampe kotudi mu miswelo mikwabo mivule. Kimfwa, Yehova i mulaye kulekela babipya-mambo besāsa bene bapwene nandi. (Isa. 1:18) Kino kilengejanga tuleke kwitopekatopeka na mutyima wetu wa mundamunda pa bubi botwalongele mafuku kunyuma. (Ñim. 32:​1-5) Kadi kufwena kudi Yehova kumusangajanga. (Nki. 23:15) Na bubine, ubwanya kulangulukila pa madyese makwabo atamba mu kupwana na Leza. Le penepo, i muswelo’ka obwanya kufwena nyeke kudi Leza?

MUSWELO WA ‘KUFWENA NYEKE KUDI LEZA’

12. Le i bintu’ka byowalongele pa kufwena kudi Leza?

¹² Shi wi mwine Kidishitu mubatyijibwe, kodi kala mufwene kudi Yehova mu ludingo lukatampe. Wefundile bubine buvule butala Yehova Leza ne Yesu Kidishitu, wesāshile bubi bobe bwa pa kala, walombwele lwitabijo lukatampe mudi Leza ne kwikala na būmi bukwatañene na kiswa-mutyima kyandi. Inoko pa kufwena kudi Leza, tufwaninwe kwendelela kulonga bino bintu.—Kol. 2:6.

13. Le i bintu’ka bisatu bibwanya kwitukwasha tufwene nyeke kudi Yehova?

¹³ Le i bika biketukwasha tufwene nyeke kudi Yehova? (1) Tufwaninwe kwendelela kutanga Bible ne kwifunda’ye. Potulonga namino, kitungo kyetu ke kya kwifundapo’tu bubine bwa kyalwilo padi Leza. Inoko tufwaninwe kulonga bukomo bwa kujingulula kiswa-mutyima kya Leza kotudi ne kuludikwa na misoñanya yatūdile mu Kinenwa kyandi. (Ef. 5:​15-17) (2) Tufwaninwe kuningija lwitabijo lwetu na kulangulukila pa bubinga buvule bulombola’mba witusenswe. (3) Tufwaninwe kushikwa nyeke bintu bifītyija mutyima wa Yehova ne kupela kupwana na bantu balonga bino bintu.—Ñim. 1:1; 101:3.

14. Kukwatañana na 1 Bene Kodinda 10:​31, le i bintu’ka bimo byotubwanya kulonga difuku ne difuku pa kusangaja Yehova? (Tala ne bifwatulo.)

¹⁴ Tanga 1 Bene Kodinda 10:31. I kya mvubu mpata kulonga bintu bisangaja Yehova. Kulonga namino kekwimaninepo’tu enka pa kusapula ne kupwila. Mu bintu bisangaja Yehova mubadilwa ne byotulonga difuku ne difuku mu bwetu būmi. Kimfwa, shi twi bampikwa budimbidimbi mu bintu byonso ne kwiabila byotudi nabyo na bantu bakwabo, tusangajanga Yehova. (2 Ko. 8:21; 9:7) Kadi Yehova usakanga tulēmeke bininge kyabuntu kya būmi. Tufwenanga kudi Mwine witupele būmi na kwikala na bujalale mu mwanda utala kudya, kutoma, ne mu bintu bikwabo biketukwasha tulame bukomo bwetu bwa ngitu. Bukomo bonso botulonga mwanda wa kusangaja Yehova enka ne mu tubintu tumweka bu tutyetye bininge, bwitufwenyanga kwadi.—Luka 16:10.

15. Le Yehova usakanga twikale namani na bakwetu?

¹⁵ Yehova udi biyampe na bantu bonso, boloke ne bakondame bene. (Mat. 5:45) Usakanga netu twikale biyampe na bakwetu. Kimfwa, ketufwaninwepo “kunenena muntu nansha umo kibi.” Ino twikale ‘bampikwa lupotopoto,’ ne kwikala “batalala ku meso a bantu bonso.” (Tet. 3:2) O mwanda, nansha shi bantu kebakulupilepo mudi Yehova ketwimonengapo bu bayampe kwibapita. (2 Tm. 2:​23-25) Tufwenanga kudi Yehova na kwikala nyeke biyampe na bantu bonso ne kwibalēmeka.

TUBWANYA KUFWENA “KUDI LEZA” NANSHA SHI TUBALONGA BILUBO

16. Le mulembi wa Lwimbo lwa Mitōto lwa 73 wāshilwile kwiivwana namani kitatyi kimo?

¹⁶ Ino le bikekala namani shi kitatyi kimo komone amba Yehova kakibwanyapo kukusanswa? Monka motwesambilanga’kyo, mulembi wa Lwimbo lwa Mitōto lwa 73 nandi wēivwene namino kyaba kimo. Wātompwele amba: “Maulu ami asakile kusāsuka; matabula ami adi kubwipi na kushetemuka.” (Ñim. 73:2) Wāitabije amba wāikele na mutyima “usosoma” ne “wampikwa milangwe . . . pamo bwa nyema wampikwa ñeni” ku meso a Yehova. (Ñim. 73:​21, 22) Le wāfudile ku mulangwe wa amba kakidipo na mvubu pa mwanda wa kilubo kyandi ne amba Yehova kakibwanyapo kumusanswa?

17. (a) Le kaimba wa mitōto wālongele bika nansha kepaātyumukilwe mutyima bininge? (b) Le i ñeni’ka yotubwanya kuboila ku kimfwa kyandi? (Tala ne bifwatulo)

¹⁷ Shi kaimba wa mitōto wāmwene amba i mupelwe na Yehova, uno mwiivwanino ye uno wādi’tu wa mu kakitatyi katyetye. Mobimwekela, enka ne paātyumukilwe mutyima bininge wāyukile amba ufwaninwe kufwena kudi Yehova. Wālembele amba: “Ino pano ngidi nobe nyeke [Yehova]; ubakwata kuboko kwami kwa lundyo. Uñendejanga na madingi obe, kadi kupwa ukankunkwija ku ntumbo.” (Ñim. 73:​23, 24) Netu tufwaninwe kulomba Yehova etukomeje kitatyi kyotumona’mba lwitabijo lwetu lubazoza, ne kitatyi kyotutyumukwa mutyima pa mwanda wa bilubo byetu. (Ñim. 73:26; 94:18) Nansha shi maulu etu abasāsuka mu kitatyi kityetye, tubwanya kujokela kudi Yehova na kikulupiji kya amba aye ‘kejengapo kulekela.’ (Ñim. 86:5) Kitatyi kyotutyumukwa mutyima bininge, i kya mvubu kufwena kudi Leza wetu.—Ñim. 103:​13, 14.

‘TUFWENEI KUDI LEZA’ NYEKE

18. Mwanda waka kufwena kudi Yehova kekudipo na mfulo?

¹⁸ Kufwena kudi Yehova kekudipo na mfulo, mwanda tukendelela nyeke kwifunda myanda yandi. Bible unena’mba mashinda a Yehova, tunangu twandi, ne buyuki bwandi ‘kebiyukwapo.’—Loma 11:33.

19. Le Ñimbo ya Mitōto itukulupija bika?

¹⁹ Ñimbo ya Mitōto 79:13 inena’mba: “Batwe, bantu bobe kadi luombe lwa mu madyo obe, tukakufwija’ko nyeke; kadi tukasapula mitendelo yobe ku nkongo ne nkongo.” Nobe shi wendelele kufwena kudi Leza, nankyo kukulupila’mba ukeselwa madyese a nyeke kadi ukanena na kikulupiji kyonso amba: “Leza i dibwe dya mutyima wami ne kipindi kyami nyeke.”—Ñim. 73:26.