Muswelo wa Kutalula Kutatana

1-2. (a) Le i kutatana’ka kumokumo kubwanya kwikala na bengidi ba Yehova? (b) I bika byotusa kubandaula mu kino kishinte?

BANTU ba myaka yonso bekalanga na kutatanaa kyaba kimo. Kimfwa, fwatakanya’po nkasampe Kamoni wiipangula shi Yehova umutele binebine mutyima. Kino kibwanya kumulengeja aleke kubatyijibwa. Nansha kadi langulukila pa tutu ke mutame mwine watongele kulondalonda tumweno twa Bulopwe mu bunkasampe bwandi pa kyaba kya kukimba lupeto luvule mu ino ntanda. Pano pakadi mutame udi’tu enka na lupeto lwa kuvuija bisakibwa bya kyandi kisaka. Ubwanya kwiipangula shi wakwete butyibi buyampe paakidi nkasampe. Kadi fwatakanya’po kaka mununu mwine kadi na bukomo butyetye. Ubwanya kutyumukwa mutyima mwanda kakibwanyapo kulonga bintu byaadi ulonga mafuku kunyuma. Lelo nobe kodi mwiipangule bipangujo pamo bwa bino bya amba: ‘Lelo bine Yehova undyukile? Le bintu byonso byonalongele mu mwingilo wa Yehova i bya mvubu? Le nekidi na mvubu ku meso a Yehova?’

² Shi tushiye bino bipangujo pampikwa kutana malondololo, kino kibwanya kuzozeja lwitabijo lwetu mudi Yehova, padi enka ne kuleka’byo kumutōta. Mu kino kishinte, tusa kumona’mo muswelo ubwanya kwitukwasha misoñanya ya mu Bible kitatyi kyotutatana’mba (1) Yehova ketutelepo mutyima, (2) ketwakwetepo butyibi buyampe mafuku kunyuma, nansha amba (3) ketukidipo na mvubu ku meso a Yehova.

MUSWELO WA KUTALULA KUTATANA KOBE

3. Le i muswelo’ka umo bidi otubwanya kutalula kutatana kwetu?

³ Muswelo umo bidi otubwanya kutalula kutatana kwetu, i na kunyemena ku Kinenwa kya Leza mwanda wa kutana malondololo ku bipangujo byetu. Shi tulonge namino, tukakomejibwa, tukaningija kipwano kyetu na Yehova, kadi tukabwanya ‘kwimanija pototo mu lwitabijo.’—1 Ko. 16:13.

4. Le i muswelo’ka ‘otujingululanga senene bintu byonso’? (1 Bene Tesalonika 5:21)

⁴ Tanga 1 Bene Tesalonika 5:21. Bible witukankamika’mba “jingululai senene bintu byonso.” Le i muswelo’ka otubwanya kulonga kino? Tubwanya kujingulula’mba bintu byotwitabije i bya bine na kwibidingakanya na byobya binena Bible. Kimfwa, langulukila pa nkasampe kakulupilepo amba udi na mvubu ku meso a Yehova. Le ufwaninwe’tu kwitabija uno mulangwe amba i wa bine? Aa, ufwaninwe ‘kujingulula senene bintu byonso’ na kwivwanija milangwe ya Yehova pa uno mwanda.

5. Le i muswelo’ka ‘otwivwananga’ malondololo a Yehova ku bipangujo byetu?

⁵ Potutanga Kinenwa kya Leza “twivwananga” Yehova wisamba netu. Inoko pa kwivwanija milangwe yandi ku kipangujo kampanda bitulomba kulonga bukomo. Mu butangi bwetu bwa Bible tunenwe kutanga myanda iketukwasha tutane malondololo ku kipangujo kyetu. Tubwanya kulongela bukimbi pa mwine mwanda’wa na kwingidija mabuku alupwilwe na bulongolodi bwa Yehova. (Nki. 2:​3-6) Tubwanya kulomba Yehova etuludike potulonga bukimbi ne kwitukwasha tutane milangwe yandi ku kipangujo kyetu. Kupwa tubwanya kukimba misoñanya ya mu Bible ne myanda ya kamweno ikwatañene na ngikadilo yotudi’mo. Kadi tubwanya kumwena mu kubandaula nsekununi ya mu Bible ya bantu bātenwe mu ngikadilo na yotudi’mo.

6. Le kupwila kwitukwashanga namani tutalule kutatana kwetu?

⁶ Kadi ‘twivwananga’ Yehova wisamba netu ku kupwila kwetu. Shi tutanwa ku kupwila kitatyi ne kitatyi, tubwanya kuteja’ko mwanda kampanda mu mwisambo nansha malondololo a tutu nansha kaka mene abwanya kwikala bu bine byotusakilwa pa kutalula kutatana kwetu. (Nki. 27:17) Shi ke pano, tubandaulei’ko muswelo otubwanya kutalula kutatana kumokumo.

KITATYI KYOTATANA AMBA YEHOVA KAKUTELEPO MUTYIMA

7. Le i kipangujo’ka kibwanya kwiipangula bamo?

⁷ Le kodi mwiipangule amba, ‘Lelo bine Yehova undyukile?’ Shi ulanga’mba kudipo na mvubu, ubwanya kumona’mba kebibwanikapo abe kwikala mulunda wa Mupangi wa diulu ne ntanda. Ye uno Mulopwe Davida nandi wāikele na milangwe ya uno muswelo. Wālangile amba i kitulumukwa bininge Yehova kuyuka bantu. Wānenene amba: “A Yehova, le muntu i waka amba umuyuke, mwanā muntu wa kufwa amba umute mutyima?” (Ñim. 144:3) Le i kwepi kobwanya kutana malondololo ku kino kipangujo?

8. Le kukwatañana na 1 Samwele 16:​6, 7, 10-12, i bika bimonanga Yehova mu bantu?

⁸ Bible witufundija’mba Yehova uyukile boba bamonwa na bakwabo bu bampikwa mvubu. Kimfwa, Yehova wātumine Samwele ku njibo ya Yese mwanda wa kushinga māni wandi mwana umo bu mulopwe wa mwenda mafuku wa Isalela. Mu bandi bana bana-balume mwānda, Yese wāityile’mo basamba-babidi mwanda wa betane na Samwele ino wāshiya Davida wandi mwana nkasampe.b Inoko Davida ye wātongelwe na Yehova. (Tanga 1 Samwele 16:​6, 7, 10-12.) Yehova wāmwene mwine mwādi mwikadile muntu wa munda wa Davida. Wādi uyukile amba i nkasampe ukwete na bulēme bintu bya ku mushipiditu.

9. Mwanda waka ubwanya kukulupila’mba Yehova ukutele mutyima? (Tala ne kifwatulo.)

⁹ Langulukila pa muswelo ke mulombole Yehova kala amba ukuyukile. Ukupanga madingi mayampe akwatañene na ngikadilo yodi’mo. (Ñim. 32:8) Le ubwanya kulonga namino shi kakuyukilepo senene? (Ñim. 139:1) Kitatyi kyoingidija madingi a Yehova ne kumona muswelo oakukwasha, ukakulupila’mba Yehova ukutele mutyima. (1 Bi. 28:9; Bil. 17:​26, 27) Yehova umonanga bukomo bolonga mwanda wa kumwingidila ne kumukōkela. Umonanga ngikadila yobe miyampe, kadi usakanga kwikala Mulunda nobe. (Yel. 17:10) Usakanga nobe wikale mulunda nandi.—1 Yo. 4:19.

KITATYI KYOTATANA’MBA KWAKWETEPO BUTYIBI BWA TUNANGU MAFUKU KUNYUMA

10. Le i bipangujo’ka byotubwanya kwiipangula kitatyi kyotulangulukila pa butyibi botwakwete mafuku kunyuma?

¹⁰ Kyaba kimo, bamo babwanya kulangulukila pa butyibi bobakwete mafuku kunyuma ne kutatana’mba kebakwetepo butyibi buyampe. Padi bakwete butyibi bwa kuleka kaji ka lupeto luvule nansha kuleka bya busunga mwanda wa kulonga bivule mu mwingilo wa Yehova. Pano byopapita kitatyi padi enka ne myaka mivule, babwanya kulangulukila pa bantu bamo bobayukile balondelelondele tumweno twabo kadi bamweka pano bu badi na būmi buyampe. Kino kibwanya kwibalengeja beipangule amba: ‘Le nakwete butyibi buyampe bwa kwingidila Yehova? Nansha le nadi mfwaninwe kwingila bininge mwanda wa kwikala na lupeto luvule pano?’

11. Mwanda waka mulembi wa Lwimbo lwa Mitōto lwa 73 wātyumukilwe mutyima?

¹¹ Shi nobe wiipangulanga bino bipangujo, tala mwēivwanine mulembi wa Lwimbo lwa Mitōto lwa 73. Wāmwene bantu kebengidilapo Yehova bamweka bu bampeta, ba būmi buyampe kadi bwampikwa makambakano. (Ñim. 73:​3-5, 12) Paādi wibatala abo ne būmi bwabo bumweka bu buyampe, wāmwene bu butyibi bwaākwete bwa kwingidila Yehova kebwādipo buyampe. Wādi ‘ukambakanibwa difuku dyonso dituntulu’ na ino milangwe ityumuna mutyima. (Ñim. 73:​13, 14) Le wālwile namani na ino milangwe yādi imuvutakanya ñeni?

12. Le kukwatañana na Ñimbo ya Mitōto 73:​16-18, mulembi wa mitōto wātalwile namani malangalanga andi?

¹² Tanga Ñimbo ya Mitōto 73:​16-18. Uno mulembi wa mitōto wāendele ku kipandulwe kya Yehova. Kwine’kwa wābwenye kulanguluka senene. Wājingulula’mba nansha shi bamo bamweka bu badi na būmi buyampe, kebadipo na lukulupilo lwa būmi bwa kumeso. Aye pa kupwa kwivwanija kino, wāikala na ndoe ya mutyima pa kuyuka’mba kwingidila Yehova bo bwādi butyibi buyampe. Wāsumininwa monka kwendelela kumwingidila.—Ñim. 73:​23-28.

13. Le i muswelo’ka obwanya kutana ndoe ya mutyima shi utatana butyibi bowakwete mafuku kunyuma? (Tala ne kifwatulo.)

¹³ Nobe ubwanya kutana ino ndoe ya mutyima na bukwashi bwa Kinenwa kya Leza. Muswelo’ka? Vuluka bulēme bwa bintu byodi nabyo, mwine mubadilwa ne kwitabijibwa na Yehova. Kadi dingakanya kino na byobya bikafikila boba basumininwe kumwena’tu enka mu ino ntanda. Babwanya kukulupila ne pa mfulo mu bintu byobamona mu būmi bwa dyalelo, mwanda kebadipo na lukulupilo lwa būmi bwa kumeso. Inoko Yehova i mulaye kukwesela madyese mavule kutabuka ne pa byofwatakanya. (Ñim. 145:16) Kadi langulukila pa uno mwanda: Lelo bine tuyukile mwadi mwa kwikadila būmi bwetu shi twakwete butyibi bwishile na buno botwakwete? Bubine i amba, boba bakwata butyibi bwimanine pa buswe bobasenswe Leza ne mukwabo, kebabulwangapo kintu nansha kimo kiyampe.

KITATYI KYOTATANA AMBA KUDIPO NA BULĒME KU MESO A YEHOVA

14. Le i ngikadilo’ka idi’mo bamo, ne i kipangujo’ka kyobabwanya kwiipangula?

¹⁴ Bengidi bamo ba Yehova kebabwanyapo kulonga bivule mu mwingilo wandi pa mwanda wa bununu, misongo, nansha makambakano makwabo. Kino kibwanya kwibalengeja balange amba kebadipo na bulēme ku meso a Yehova. Babwanya kwiipangula’mba, ‘Le nakidi na mvubu ku meso a Yehova?’

15. Le i bika byādi bikulupile mulembi wa Lwimbo lwa Mitōto lwa 71?

¹⁵ Mulembi wa Lwimbo lwa Mitōto lwa 71 nandi wēkondele na ino milangwe. Wālombēle amba: “Kokandeka shi bukomo bwami bubapu.” (Ñim. 71:​9, 18) Nansha nankyo, kaimba wa mitōto wāendelele kukulupila’mba shi engidile Yehova Leza na lulamato, ukamuludika ne kumukwatakanya. Monka mwēfundile’kyo uno mulembi wa mitōto, Yehova usangelanga boba balonga bukomo bwa kumwingidila nansha shi kebakibwanyapo kulonga bivule.—Ñim. 37:​23-25.

16. Le i mu miswelo’ka mwikele banunu bu balēme ku meso a Yehova? (Ñimbo ya Mitōto 92:​12-15)

¹⁶ A banunu, monai ngikadilo yomudi’mo mwiimwena Yehova. Yehova ubwanya kwimukwasha mumwingidile na kikōkeji nansha byokemukibwanyapo kulonga bivule. (Tanga Ñimbo ya Mitōto 92:​12-15.) Pa kyaba kya kuta mutyima pa byokemubwanyapo kulonga, tai’o pa byomubwanya kulonga. Kimfwa, mubwanya kukwasha bantu bakwabo na kimfwa kyenu kya kikōkeji ne na kwibata mutyima. Mubwanya kwisambila pa muswelo wemukweshe Yehova mu bula bwa myaka ne pa milao ya mu Bible ya mu mafuku a kumeso yomutengēle na kipyupyu. Kadi kemwakatyepekai nansha dimo milombelo yenu itamba ku mutyima moibwanya kukwashisha bantu bakwabo. (1 Pe. 3:12) Nansha twikale mu ngikadilo’ka, batwe bonso tudi na kintu kyotubwanya kupa Yehova ne bakwetu.

17. Mwanda waka ketufwaninwepo kwidingakanya na bantu bakwabo?

¹⁷ Shi wi mutyumukwe mutyima mwanda’po kukibwanyapo kulonga bivule mu mwingilo wa Yehova, kulupila’mba ukwete na bulēme byonso byobwanya kulonga. Abe ubwanya kushilula kudingakanya byobya byolonga na bilonga bantu bakwabo. Ino kokalonga nankyo! Mwanda waka? Mwanda Yehova kakudingakanyangapo na bantu bakwabo. (Ngt. 6:4) Kimfwa, Madia wāpele Yesu kyabuntu kya māni a mananshi a bei mikande. (Yoa. 12:​3-5) Inoko, mukaji wa kishala mufudile wātūdile ku tempelo kyabuntu kya tubityele tubidi twa bulēme butyetye bininge. (Luka 21:​1-4) Inoko Yesu wāmwene bino byabuntu byonso bibidi bu kilomboji kya lwitabijo. Shandi Yehova ukwete na bulēme bukatampe kintu kyonso kyobwanya kulonga pa mwanda wa kwipāna kowipēne kwadi ne buswe bomusenswe, nansha shi abe mwine wikimona bu kityetye namani.

18. Le i bika biketukwasha tutalule kutatana? (Tala ne kapango “Kinenwa kya Yehova Kibwanya Kukukwasha Utalule Kutatana.”)

¹⁸ Batwe bonso twikalanga na kutatana kyaba kimo. Inoko monka motwekimwena, Bible Kinenwa kya Leza kikulupilwa kya bubine, ubwanya kwitukwasha tutalule kuno kutatana. Nanshi longa bukomo bwa kutalula kutatana, nabya ukekala na kikulupiji pa kyaba kya kuzumbija mutyima. Yehova ukuyukile biyampe. Ukwatanga na bulēme byonso byolonga pa mwanda wa dijina dyandi kadi i mulaye kukupala mpalo. Kulupila’mba Yehova usenswe bengidi bandi bonso ba lulamato kadi wibatele mutyima.