Endelela Kwifunda Myanda Mipya mu Bufundiji bwa Kyalwilo bwa mu Bible

1. Le bufundiji bwa mu Bible bwaikele na lupusa’ka podi kitatyi kyowefundile’bo dibajinji?

BUFUNDIJI bwa kyalwilo bwa mu Bible bwashintyile būmi bwetu. Kimfwa, potwefundile amba dijina dya Leza i Yehova, twatabwile matabula mabajinji mwanda wa kupwana nandi. (Isa. 42:8) Kadi kitatyi kyotwefundile ngikadilo idi’mo bantu bafwe, ketwakidipo twiipangula monka shi baswe betu bafwile basusukanga. (Mus. 9:10) Ne kadi kitatyi kyotwefundile mulao wa Yehova utala Paladisa pano pa ntanda, ketwakidipo tuzumbija mutyima pa būmi bwa kumeso. Twaikele na kikulupiji kya amba būmi bwetu kebukekalapo’tu bwa kakitatyi katyetye—kimfwa bwa myaka 70 nansha 80—ino bwa nyeke.—Ñim. 37:29; 90:10.

2. Le 2 Petelo 1:​12, 13 ulombola namani amba enka ne bene Kidishitu batame ku mushipiditu bamwenanga mu bufundiji bwa kyalwilo?

² Ketufwaninwepo kumona nansha dimo bufundiji bwa kyalwilo bu bwa mvubu mityetye. Mukanda wandi wa bubidi, mutumibwa Petelo wālembēle’o bene Kidishitu bādi ‘bashimatyije senene mu bubine.’ (Tanga 2 Petelo 1:​12, 13.) Inoko pano, bādi bekonda na byaka bya ku mushipiditu mu bukata bwa kipwilo, mwine mubadilwa mfundijo ya bubela ne bantu bampikwa bwine Leza. (2 Pe. 2:​1-3) Petelo wādi ukimba kukomeja batutu ne bakaka mwanda wa kwibakwasha bakomene ano makambakano. Pa kulonga namino, wēbavulwije bufundiji kampanda bobādi kebefunde kala. Buno bufundiji bwādi bwa kwibakwasha balame nyeke bululame bwabo kufika ne ku mfulo.

3. Leta kimfwa kilombola mwanda waka bene Kidishitu bonso bafwaninwe kwendelela kulangulukila pa bufundiji bwa kyalwilo.

³ Bene Kidishitu batame ku mushipiditu babwanya kuboila ñeni mipya ku bufundiji bwa kyalwilo. Kimfwa: Mutēki wa bwino ne yewa ukīfunda kutēka babwanya kwingidija bisombelwa bimo byonka pa kutēka byakudya. Inoko uno mutēki wa bwino, ukengidija bino bisombelwa mwanda wa kutēka byakudya bya munsonso, mwanda ke mwifunde kwibingidija mu bula bwa kitatyi kilampe. Muswelo umo onka, shi ketudi bengidile Yehova mu bula bwa kitatyi kilampe, tubwanya kuboila ñeni ku bufundiji bwa kyalwilo mu miswelo mishileshile kutabuka muntu ukishilula kwifunda Bible. Padi tamba potwabatyijibwe, ngikadilo yetu yashintyile kadi twaikele na biselwa bivule mu bulongolodi bwa Yehova. Kitatyi kyotwingidija bufundiji botwefundile mafuku kunyuma mu ngikadilo yotudi’mo pano, tubwanya kusokwela’ko ñeni mipya kadi ya kamweno. Tutalei’ko myanda ibwanya kwifunda bene Kidishitu batame ku mushipiditu mu bufundiji busatu bwa kyalwilo bwa mu Bible.

YEHOVA I UMPANGI

4. Le kwifunda’mba Yehova i Umpangi kwaikele na lupusa’ka potudi?

⁴ Bible unena’mba, “Mwine wāubakile bintu byonso i Leza.” (Bah. 3:4) Tuyukile amba ntanda yetu ne byonso bidi’po, byāpangilwe na Umpangi wa tunangu tukatampe kadi mwinē bukomo bonso. Aye ye wētupangile, nanshi wituyukile senene shē! Kadi kiyampe kutabuka, uvuijanga bisakibwa byetu. Uyukile biyampe byotusakilwa. Kuyuka buno bubine bupēla bwa amba Yehova i Umpangi wetu, kwaikele na lupusa mu muswelo mukatampe potudi, ne kwitulengeja twikale na būmi buyampe kadi bwa kitungo.

5. Le i bubine’ka bubwanya kwitukwasha twikale betyepeje? (Isaya 45:​9-12)

⁵ Bubine bwa amba Yehova i Umpangi bubwanya kwitukwasha twikale betyepeje. Yoba pa kwita mutyima bipitepite ne kuta’o pa bintu byādi bimunena bantu, Yehova wāmuvulwije amba aye ye Umpangi mwinē bukomo bonso. (Yoba 38:​1-4) Kino kivulujo kyākweshe Yoba amone amba mashinda a Yehova adi pangala bininge kutabuka a bantu. O mwanda mwenda mafuku mupolofeto Isaya wālembele pangala pa uno mwanda’mba: “Le dilongo dikanena Umbumbi amba: ‘I bika byolonga?’”—Tanga Isaya 45:​9-12.

6. Le i kitatyi’ka kyotubwanya kulangulukila pa kitenta kya kutendelwa kya Yehova kya bu Umpangi wetu? (Tala ne bifwatulo.)

⁶ Kitatyi kyenda kikala mwine Kidishitu na bwino, ubwanya kushilula kukulupila bininge milangwe yandi pa kyaba kya kulomba Yehova amukwashe nansha kuleka Kinenwa kyandi kimuludike. (Yoba 37:​23, 24) Ino le bikekala namani shi muntu kalangulukila bininge pa tunangu tukatampe twa Yehova ne pa Umpangi wandi mukatampe? (Isa. 40:22; 55:​8, 9) Buno bubine bwa kyalwilo bukamukwasha ekale nyeke mwityepeje ne kuyuka’mba milangwe ya Yehova idi pangala pa yandi.

7. Le i bika byalongele Rahela pa kwitabija kushinta kwa mu bulongolodi?

⁷ Rahela, ushikatanga mu Sloveni, wajingulwile amba kulangulukila padi Umpangi wandi kwamukweshe etabije kushinta kwa mu bulongolodi. Unena’mba: “Kitatyi kimo, kebyaumpēlelepo kwitabija butyibi bwakwete batutu betutangidile. Kimfwa, enka ne ponapwile kutala Mapya 8 Atamba ku Kitango Kyendeji mu 2023, natenekelwe pa kumona musunsa mubajinji tutu mushiye myevu unena mwisambo. O mwanda nalombele Yehova ankwashe ngitabije kuno kushinta.” Rahela wajingulwile amba Yehova Umpangi wa diulu ne ntanda byadi mubwaninine, ubwanya kuludika bulongolodi bwandi mwanda wa bulete bulombodi buyampe. Shi ubakolelwa kwivwanija mwivwanino mupya nansha kwitabija bulombodi bupya, ubulwepo kulangulukila na kwityepeja pa tunangu tukatampe ne pa bukomo budi na Umpangi wetu?—Loma 11:​33-36.

KINE KILEKELE’KO LEZA MASUSU

8. Le kwifunda kine kilekele’ko Leza masusu kwitukwashanga namani?

⁸ Mwanda waka Leza ulekele’ko masusu? Bantu bamo kebayukilepo malondololo a kino kipangujo bakalabelanga Leza ne kufula ku mulangwe wa amba kadi’kopo! (Nki. 19:3) Inoko abe wefundile amba bubi botwāpyene ne kubulwa kubwaninina, byo byāletele masusu, ino ke Yehovapo. Kadi wefundile amba kitūkijetyima kya Yehova i kilengeje bantu midiyo ne midiyo bamuyuke ne kwivwanija’mba ukafudija makambakano lonso. (2 Pe. 3:​9, 15) Buno bubine bwakusengele ne kukufwenya pabwipi na Yehova.

9. Le i mu ngikadilo’ka motufwaninwe kuvuluka kine kilekele’ko Yehova masusu?

⁹ Tubaivwanija mwanda waka tusakilwa kwikala na kitūkijetyima pano potwilaije Yehova afudije masusu. Inoko kitatyi kisusuka baswe betu, kyobalongelwa bintu na bukondame, ne kyobafwa, tubwanya kwiipangula mwanda waka Yehova waije kutalula’ko makambakano. (Hab. 1:​2, 3) Mu bitatyi pamo bwa bino, i biyampe tulangulukile pa kine kilekēle Yehova boloke basusuke.a (Ñim. 34:19) Kadi i biyampe tulangulukile ne pa mpango yakwete’ko mwanda wa kufudija makambakano onso kadi bya lonso.

10. Le Anne wasengelwe namani kitatyi kyafwile inandi?

¹⁰ Kuyuka kine kilekele’ko Leza masusu kubwanya kitukwasha tūminine. Anne, ushikatanga pa kisanga kya Mayotte, pa Dijiba dya India, unena’mba: “Neivwananga bibi bininge tamba mama ufwa pano kepadi myaka mityetye. Inoko mvulukanga kitatyi ne kitatyi amba ke Yehovapo wituletelanga masusu. Aye udi na kipyupyu kya kutalula’ko masusu onso ne kusangula baswe betu. Kulangulukila pa buno bubine kwankankamikile ne kumpa ndoe ya mutyima.”

11. Le kuyuka kine kilekele’ko Leza masusu kubwanya kwitukwasha namani twendelele kusapula?

¹¹ Kuyuka kine kilekele’ko Leza masusu kubwanya kwitutonona twendelele kusapula. Pa kupwa kunena’mba kitūkijetyima kya Yehova kishintulula lupandilo ku boba besāsa, Petelo wālembele amba: “Talai shi mufwaninwe kwikala bantu ba muswelo’ka mu bilongwa bijila bya mwikadilo ne mingilo ya bwine Leza.” (2 Pe. 3:11) Mu ino “mingilo ya bwine Leza” mubadilwa ne mwingilo wetu wa kusapula. Pamo’nka bwa Tata wetu, netu tusenswe bantu. Tusakanga’mba nabo bakekale mu ntanda mipya myoloke ya Leza. Kitūkijetyima kya Yehova i kipe bantu ba koshikete mukenga wa kumutōta. Bine, i dyese’po kashā kwikala mwingidi wingila pamo na Leza ne kukwasha bantu bavule befunde yandi myanda kumeso kwa mfulo kufika!—1 Ko. 3:9.

TUDI MU “MAFUKU A MFULO”

12. Le kuyuka’mba tudi mu “mafuku a mfulo” kwitukwashanga namani?

¹² Bible i mulombole patōkelela mukekadila bantu mu “mafuku a mfulo.” (2 Tm. 3:​1-5) Bitulomba’tu kutala koku ne koku pa kumona muswelo ufikidila buno bupolofeto. Potumona ngikadila ya bantu ibipila’ko, tukulupilanga bya binebine amba Kinenwa kya Leza kinenanga bubine.—2 Tm. 3:​13-15.

13. Le kukwatañana na kyelekejo kya Yesu kidi mu Luka 12:​15-21, i bipangujo’ka byotufwaninwe kwiipangula?

¹³ Kuyuka’mba tudi mu mafuku a mfulo kwitukwashanga twikale na mutyima wa kampeja-bukidi. Tala ñeni yotubwanya kuboila ku kyelekejo kya Yesu kidi mu Luka 12:​15-21, pa mwanda utala kwikala na mutyima wa kampeja-bukidi. (Tanga.) Mwanda waka uno mwana-mulume mpeta wāityilwe bu “wampikwa ñeni”? Ke pa mwandapo wādi mpeta, ino i mwanda wādi utangidija kumeso bintu byampikwa mvubu. Wēbīkile aye mwine “byabulēme ino kwikala mpeta kudi Leza mpika.” Le i bika byālengeje uno mwanda wikale wa kampeja-bukidi? Leza wāsapwidile uno muntu amba: “Buno bufuku buno’bu basa kukulomba būmi bobe.” Dyalelo, pano penda pafula ino ngikadilo ya bintu, tufwaninwe kwiipangula’mba: ‘Le bitungo byonetungila bilombola’mba mwene kitatyi kyotudi’mo bu kya kampeja-bukidi? Le i bitungo bya muswelo’ka byontungila bami bana? Le ñingidijanga bukomo bwami, kitatyi kyami, ne misokwe yami mwanda wa kwiubakila dibajinji byabulēme byami nansha netūdilanga’byo mūlu?’

14. Monka mulombwela’kyo kimfwa kya Miki, mwanda waka i biyampe tulangulukile pa bubinga bwa mu Bisonekwa bulombola’mba tudi mu mafuku a mfulo?

¹⁴ Muswelo otumona būmi ubwanya kushinta kitatyi kyotulangulukila pa bubinga bwa amba tudi mu mafuku a mfulo. Kino ye kyafikīle ne kaka witwa bu Miki. Unena’mba: “Ponapwile masomo a sekondele, nadi nkimba kwingila kaji kakankwasha mfunde masomo atala myanda ya banyema. Ino kadi nadi na kitungo kya kwingila bu pania wa lonso ne kukakwasha kokwa kusakilwa basapudi bavule. Balunda batame ku mushipiditu baundingīle nangulukile na katentekeji pangala pa kaji konkimba kwingila shi kakankwasha mfikile pa bitungo byami bya ku mushipiditu. Baumvulwije amba panopano ponka ino ngikadilo ya bintu isa kufula, ne amba mu ntanda mipya nkekala’ko nyeke ne kwifunda banyema bonso bonsaka. O mwanda natongele kufunda masomo mēpi ino akankwasha. Kulonga namino kwankweshe nsokole kaji kene kankweshe mu mwingilo wami wa bu pania ne mwenda mafuku navilukila mu Ekwatere, mwine mwadi musakilwa basapudi bavule.” Pano Miki ne wandi mulume bengilanga mu mwingilo wa kipindi mu Ekwatere.

15. Le bantu babwanya kwitabija namani ku myanda miyampe? Leta kimfwa. (Tala ne bifwatulo.)

¹⁵ Ketufwaninwepo kuzoza shi bantu abapele kuteja musunsa mubajinji myanda miyampe. Bantu babwanya kushinta. Tubandaulei’ko kimfwa kya Yakoba mwanabo na Yesu. Wāmwene pādi patama Yesu, pawāikele bu Meshiasa, ne paādi ufundija mu muswelo kewādipo ufundija muntu nansha umo. Nansha nankyo, mu ino myaka yonso’i, Yakoba wādi kashilwile kulonda Yesu. Inoko i pa kupwa kwa Yesu kusanguka pāikele Yakoba bu mulondi wandi mupyasakane!b (Yoa. 7:5; Ngt. 2:9) Nanshi kokatyepeka bukomo bolonga mwanda wa kusapwila babutule bobe kebashilwile kusangela bubine, nansha bukomo bolonga mwanda wa kukajokela boba bapelele musapu wa Bulopwe. Vuluka’mba tudi mu mafuku a mfulo, nanshi mwingilo wetu wa busapudi i wa kampeja-bukidi. Byowibasapwila dyalelo bibwanya kwibakwasha mwenda mafuku, padi enka ne kumeso kwa kyamalwa kikatampe kushilula.c

TULOMBOLEI NYEKE KUFWIJA’KO PA BIVULUJO BYA YEHOVA

16. Le i muswelo’ka omwenine mu bivulujo bya Yehova? (Tala ne kapango “Ingidija Bubine bwa mu Bible pa Kukwasha Bakwabo.”)

¹⁶ Byakudya bimo bya ku mushipiditu byotutambulanga, biteakanibwanga bantu kebaivwene nansha dimo bubine bwa kyalwilo bwa mu Bible. Kimfwa, mīsambo ya bantu bonso ya yenga ne yenga, bishinte ne mavideo amo a pa jw.org, ne mapepala etu a bantu bonso biteakanibwanga dibajinji pa mwanda wa boba ke Batumonipo. Nansha nankyo, netu tumwenanga mu bino bivulujo. Bitukwashanga tuningijije’ko buswe botusenswe Yehova, tuningije lwitabijo lwetu mu Kinenwa kyandi, ne kwitukwasha tufundije senene bantu bakwabo bubine bwa kyalwilo bwa mu Bible.—Ñim. 19:7.

17. Le i mu ngikadilo’ka motufwaninwe kulangulukila pa bufundiji bwa kyalwilo bwa mu Bible?

¹⁷ Batwe Batumoni ba Yehova, tusangalanga kitatyi kijadikwa mwivwanino wetu wa bubine bwa mu Bisonekwa. Inoko kadi tufwijanga’ko pangala pa bufundiji bwa kyalwilo botwefundile, bwine bwetukokēle ku bubine. Shi ketukimbe kulamata ku milangwe yetu pa kyaba kya kwitabija bulombodi buletwa na bulongolodi bwa Yehova, tuvulukei na kwityepeja’mba Umpangi wa tunangu tukatampe kadi mwinē bukomo bonso, ye wendejanga buno bulongolodi. Shi batwe nansha baswe betu twikondanga na makambakano, twikalei na kitūkijetyima ne kulangulukila pa kine kilekele’ko Yehova masusu. Kadi shi ketukwata butyibi bwa mwa kwingidijija kitatyi kyetu ne misokwe yetu, tuvulukei amba tudi mu mafuku a mfulo, kadi kitatyi kyotudi’mo i kya kampeja-bukidi. Nanshi tulekei bivulujo bya Yehova byendelele kwituningija, kwitukankamika, ne kwitupa tunangu.