Buswe bwa Leza Bulādilanga Nyeke

1-2. Le i kikoleja’ka kikondanga na bene Kidishitu bavule?

MONA’PO mu ñeni botyi udi mu bukata bwa kivula kikatampe. Mabimbi keebusunkanya koku ne koku. Shi muntu kelelepo ñanga, mabimbi akasunkanya botyi konsokonso. Ñanga ukalengeja botyi ekale pamo ne kuleka kusunkanibwa na kivula kikatampe.

² Kitatyi kyoūminina makambakano makatampe, ubwanya kwiivwana pamo bwa uno botyi udi mu bukata bwa kivula. Milangwe yobe ibwanya kusunkanibwa koku ne koku. Difuku dimo wakulupila’mba Yehova ukusenswe kadi ukukwatakanyanga; ino difuku dilonda’ko kowiipangula shi Yehova umwene makambakano opita’mo. (Ñim. 10:1; 13:1) Padi balunda babwanya kukusapwila binenwa bisenga, kupwa weivwana’ko biyampe mu kitatyi kampanda. (Nki. 17:17; 25:11) Nansha nankyo, ubwanya kushilula monka kutatana. Ubwanya enka ne kulanga’mba Yehova i mukwele. Le kitatyi kyowikonda na makambakano, ubwanya kushimatyija namani pamo bwa ñanga? Nansha le i muswelo’ka obwanya kwendelela kukulupila’mba Yehova ukusenswe kadi ukukwatakanyanga?

3. Mungya Ñimbo ya Mitōto 31:7 ne 136:​1, le ‘buswe bwa ndamatyidile’ i bika, ne mwanda waka tubwanya kunena’mba Yehova i kimfwa kifike’po mu kwibulombola? (Tala ne kifwatulo.)

³ Muswelo umo otubwanya kushimatyija pamo bwa ñanga mu makambakano, i na kuvuluka buswe bwa ndamatyidile bwa Yehova. (Tanga Ñimbo ya Mitōto 31:7; 136:1.) Binenwa ‘buswe bwa ndamatyidile’ bileta mulangwe wa kwilamata kukatampe kadi kulādila nyeke kwine kudi pa bukata bwa bantu babidi. Yehova i kimfwa kifike’po mu kulombola buswe bwa ndamatyidile. O mwanda Bible unena pādi amba, i “muyule buswe bwa ndamatyidile.” (Div. 34:​6, 7) Kadi Bible unena monka padi Yehova amba: “Wi muyulwe buswe bwa ndamatyidile ku boba bonso bakwita.” (Ñim. 86:5) Kino kishintulula’mba: Yehova kelangapo nansha dimo bengidi bandi ba kikōkeji! Kuvuluka’mba Yehova i wa lulamato, kubwanya kukushimatyija pamo bwa ñanga kitatyi kyowikonda na makambakano makatampe.—Ñim. 23:4.

VULUKA’MBA BUSWE BWA YEHOVA BUBADILWA MU BUFUNDIJI BWA KYALWILO BWA MU BIBLE

4. Leta bimfwa bya bufundiji bwa kyalwilo bwa mu Bible, ne kushintulula mwanda waka twibukulupile bininge.

⁴ Muswelo mukwabo otubwanya kushimatyija pamo bwa ñanga kitatyi kyotwikonda na makambakano i kuvuluka’mba buswe bwa Yehova bubadilwa mu bufundiji bwa kyalwilo bwa mu Bible. Le i bika bikwiyanga mu ñeni kitatyi kyoivwana musemwa wa amba, “bufundiji bwa kyalwilo bwa mu Bible”? Padi uvulukanga bubine bwa kyalwilo bowefundile mu Kinenwa kya Leza. Kimfwa, wefundile amba dijina dya Leza i Yehova, Yesu i Mwanā Leza wa bunka, bafwe kebayukilepo kintu nansha kimo, ne amba bantu bakekala mu paladisa pano pa ntanda nyeke ne nyeke. (Ñim. 83:18; Mus. 9:5; Yoa. 3:16; Kus. 21:​3, 4) Tamba’tu na powaitabije buno bufundiji, webukulupile bya binebine. Mwanda waka? Mwanda wajingulwile amba buno bufundiji bwimanine pa myanda ya bine. Kuyuka’mba buswe bwa Leza bubadilwa mu bufundiji bwa kyalwilo bwa mu Bible, kubwanya kukukwasha utalule milangwe ya amba Yehova kakuyukilepo kadi katelepo mutyima ku makambakano owikonda nao. Namani?

5. Lombola muswelo ufulamikwanga bufundiji bwa bubela.

⁵ Le i bika byakukweshe upele bufundiji bwa bubela kitatyi kyowashilwile kwifunda Bible? Ye uno wadingakenye myanda yowadi ufundijibwa ku kyenu kipwilo na bufundiji bwa mu Bible. Tubandaulei’ko’tu kino kimfwa: Langa’po wadi ukulupile amba Yesu ye Leza Mwinē Bukomo Bonso. Washilula kwifunda Bible, kupwa weipangula’mba, ‘Le buno bufundiji i bwa bine?’ Abe pa kupwa kubandaula bubinga bwa mu Bisonekwa, wabwanya kulondolola ku kino kipangujo. Ebiya wapingakanya bufundiji bwa bubela na bubine bwa mu Bisonekwa bwa amba: Yesu i “umbedi wa bipangwa byonso,” kadi i “Mwana wa bunka wa Leza.” (Kol. 1:15; Yoa. 3:18) Na bubine, bufundiji bwa bubela bubwanya kwikala pamo bwa “bishimikwa bikomejibwe” kadi bikomo kufulamika. (2 Ko. 10:​4, 5) Inoko shi ubafulamika bufundiji bwa bubela, kujokelangapo ku bobwa boshile kunyuma.—Fid. 3:13.

6. Mwanda waka ubwanya kukulupila’mba ‘buswe bwa ndamatyidile bwa Yehova bulādilanga nyeke’?

⁶ Ubwanya kulonga muswelo umo onka ne pa byobya bifundija Bible pa buswe bwitusenswe Yehova. Shi ubashilula kutatana buswe bukusenswe Yehova kitatyi kyowikonda na makambakano, wiipangule amba, ‘Le mulangilo wami i mwendele’mo?’ Dingakanya kutatana kotatana buswe bukusenswe Yehova na binenwa bidi mu Ñimbo ya Mitōto 136:1—kisonekwa kīmanine’po mutwe wetu wa mwanda. Mwanda waka Yehova ulombola’mba buswe bwandi i bwa ‘ndamatyidile’? Mwanda waka binenwa bya amba “buswe bwandi bwa ndamatyidile bulādilanga nyeke” i bipitulukwe misunsa 26 mu luno lwimbo lwa mitōto? Monka motwekimwenanga, buswe bwa Yehova bwa ndamatyidile ku bantu bandi bubadilwa mu bufundiji bwa kyalwilo bwa mu Bible, pamo’nka bwa bufundiji bukwabo bowaitabije powefundile Kinenwa kya Leza. Mulangwe wa amba Yehova kakumonengapo na mvubu kadi kakusenswepo i wa bubela. Pela na kusumininwa buno bufundiji, enka mowapelele bufundiji bukwabo bwa bubela!

7. Tela bisonekwa bimobimo bitukulupija’mba Yehova witusenswe.

⁷ Mu Bible mudi bisonekwa bikwabo bivule bitukulupija’mba Yehova witusenswe. Kimfwa, Yesu wālombwele balondi bandi amba: “Mudi na bulēme kutabuka misolwe mingi.” (Mat. 10:31) Kadi Yehova wāsapwidile bantu bandi amba: “Nkakukomeja, bine, nkakukwasha, bine, nkakukwata na kuboko kwami kwa lundyo kwa boloke.” (Isa. 41:10) Bine, bino binenwa bisenga’po kashā. Yesu kanenenepo amba, ‘Padi mudi na bulēme kutabuka,’ kadi Yehova kanenenepo amba, ‘Mbwanya kukukwasha.’ Inoko abo bonso banena’mba: “Mudi na bulēme kutabuka” ne “nkakukwasha.” Kitatyi kyowikonda na makambakano kotatana’mba Yehova kakusenswepo, bino bisonekwa bikakukwasha wiivwane biyampe mpata; ne kukukwasha ukulupile amba Yehova ukusenswe. Bino bisonekwa bimanine pa bubine bukulupilwa. Kulombela na kininga ne kulangulukila pa bino bisonekwa kukakukwasha ukulupile bya binebine binenwa bidi mu 1 Yoano 4:16 binena’mba: “Tubayuka ne kwitabija buswe bwitusenswe Leza.”a

8. Le i bika byobwanya kulonga shi kitatyi kimo kotatana buswe bukusenswe Yehova?

⁸ Le penepo bikekala namani shi kitatyi kimo ukitatana buswe bukusenswe Yehova? Dingakanya mwiivwanino obe na byoyukile padi Yehova. Mwiivwanino keubwanyapo kukulupilwa pamo bwa bubine, ino buswe bwitusenswe Yehova botwifundile mu Bisonekwa bwimanine pa myanda ya bine. Shi ketukulupilepo buswe bwitusenswe Yehova, nabya tutatananga ngikadila yandi mikatampe—ke buswe bwandi kadi.—1 Yo. 4:8.

LANGULUKILA PA “KISANSO KIKATAMPE” KIKUSENSWE YEHOVA

9-10. Le Yesu wādi wisambila pa bika paānenene amba “Tata mwine wimusenswe kisanso kikatampe,” monka mokilembelwe mu Yoano 16:​26, 27? (Tala ne kifwatulo.)

⁹ Tubwanya kuboila ñeni mivule pa buswe bwitusenswe Yehova na kubandaula binenwa bya Yesu byaāsapwidile balondi bandi amba: “Tata mwine wimusenswe kisanso kikatampe.” (Tanga Yoano 16:​26, 27.) Yesu kānenenepo bino binenwa mwanda’tu wa kulengeja bandi bana ba bwanga beivwane biyampe. Inoko myanda īsambilwe’po ilombola’mba kādipo wisambila pa muswelo obādi beivwana mu kine kitatyi’kya. Ino wādi wisambila pa mwanda mukwabo—ke milombelo kadi.

¹⁰ Yesu wādi ufundija’tu bandi bana ba bwanga’mba bafwaninwe kulombela mu dijina dyandi, ino ke kwandipo kobafwaninwe kulombela. (Yoa. 16:​23, 24) Kyādi na mvubu bayuke uno mwanda. Yesu pa kupwa kusangulwa, bana ba bwanga ye bano bādi bakimba kulombela kwadi. Kadi bāyukile amba Yesu i mulunda nabo. Padi bālangile amba buswe bwaebasenswe bubwanya kumutonona evwane bikoleja byabo ne kufikija kulomba kwabo kudi Tata wandi. Inoko Yesu wēbanenene baleke kulanga uno muswelo. Mwanda waka? Mwanda wēbasapwidile amba: “Tata mwine wimusenswe kisanso kikatampe.” Uno mwanda ubadilwa mu bufundiji bwa kyalwilo bwa mu Bible butala milombelo. Tala kino mokishintulwila kodi: Kupityila ku kifundwa kyobe kya Bible, wimuyuke Yesu senene ne kumusanswa. (Yoa. 14:21) Ino pamo bwa bana ba bwanga ba mu myaka katwa kabajinji, ubwanya kulombela na kikulupiji kudi Leza, koku uyukile amba aye “mwine [ukusenswe] kisanso kikatampe.” Ulombolanga’mba ukulupile bino binenwa kitatyi kyonso kyolombela kudi Yehova.—1 Yo. 5:14.

JINGULULA KUTAMBA KUTATANA

11. Mwanda waka Satana usangalanga shi ketutatana buswe bwitusenswe Yehova?

¹¹ Le kutatana buswe bwitusenswe Yehova kutambanga kwepi? Shi ubalondolola’mba Satana ye kalenga-byanzwe, kwitupilepo mwanda nandi ubadilwa’mo. Dyabola ‘ukimbanga kwitubokota,’ kadi usangalanga shi tubashilula kutatana buswe bwitusenswe Yehova. (1 Pe. 5:8) Buswe bwitusenswe Yehova, bo bwāmutonwene etupe kinkūlwa—inoko Satana ubwanya kwitulengeja twimone amba ketubwanyapo kumwena mu kino kinkūlwa. (Bah. 2:9) Le i ani umwenanga’mo shi tutatana buswe bwitusenswe Yehova? I Satana. Kadi le i ani ukasangala shi tubaleka kwingidila Yehova kitatyi kyotudi mu makambakano? I Satana. Tala mwanda waka Satana uloñanga bukomo bwa kwitulengeja tutatane buswe bwitusenswe Yehova. Satana ye muntu mubajinji wājimije buswe bobādi bamusenswe kudi Yehova. Manwa amo a “bukosoke” engidijanga Satana i a kwitulengeja twiivwane amba Yehova ketusenswepo kadi i mwitwele. (Ef. 6:11) Shi tubajingulula biloñanga walwana netu, tukasumininwa bininge mwanda wa ‘kulwa na Dyabola.’—Yak. 4:7.

12-13. Le ngikadilo ya bubi yotupyene itulengejanga namani tutatane buswe bwitusenswe Yehova?

¹² Kudi kintu kikwabo kitulengejanga tutatane buswe bwitusenswe Yehova. Le i kintu’ka? I ngikadilo ya bubi yotupyene. (Ñim. 51:5; Loma 5:12) Bubi i bupalule bantu kudi Umpangi wabo. Kadi i bonakanye ñeni yabo, mutyima wabo, ne ngitu yabo.

¹³ Bubi i bwitone mu malango, ne kino kilengejanga tutyumukwe mutyima, tuzumbije mutyima, tubulwe mutyima-ntenke, ne kwiivwana bumvu. Tubwanya kwiivwana uno muswelo shi tubalonga bubi. Kadi tubwanya kwiivwana uno muswelo mwanda tuyukile amba tudi nyeke bantu ba bubi—ngikadilo mine keikwatañenepo na muswelo otwāpangilwe. (Loma 8:​20, 21) Motoka wa ditonto disabike keubwanyapo kwenda senene. Ne batwe netu, byotudi bantu ba kubulwa kubwaninina, ketubwanyapo kulonga bintu mu muswelo mubwaninine na motwāpangīlwe. Nanshi ke kyakutulumukapo shi kitatyi kimo ketutatana buswe bwitusenswe Yehova. Shi kino kibetufikila, tufwaninwe kuvuluka’mba Yehova i “Leza mukatampe ne ulenga nzuba . . . [ulombolanga] buswe bwa ndamatyidile ku boba bamusenswe ne balamine mbila yandi.”—Neh. 1:5.

14. Le kulangulukila pa kinkūlwa kubwanya kwitukwasha namani tutalule mulangwe wa amba Yehova kabwanyapo kwitusanswa nansha dimo? (Bene Loma 5:8) (Tala ne kapango “Wilame ku ‘Bukomo bwa Kyongo bwa Bubi.’”)

¹⁴ Na bubine, kitatyi kimo tubwanya kwiivwana’mba ketufwaninwepo kusanshibwa na Yehova. Kadi kunena na bubine, ketufwaninwepo buswe bwa Yehova—ne kino ye kine kilengeje buswe bwandi bwikale bwa pa bula. Yehova ketusenswepo pa mwanda wa kintu kampanda kyotulongele. Inoko, kinkūlwa i kipūte bubi bwetu, kadi Yehova wēkiletele mwanda witusenswe. (1 Yo. 4:10) Vuluka’mba Yesu kāilepo mwanda wa kukūla bantu babwaninine, ino i mwanda wa kukūla babipya-mambo. (Tanga Bene Loma 5:8.) I kutupu muntu nansha umo ubwanya kulonga bintu mu muswelo mubwaninine, kadi Yehova katengelangapo tulonge bintu mu uno muswelo. Shi twivwanije amba ngikadilo yetu ya bubi ibwanya kwitulengeja tutatane buswe bwitusenswe Yehova, tukaningijija’ko kusumininwa kwetu kwa kulwa na milangwe mibi.—Loma 7:​24, 25.

SHALA NYEKE WA LULAMATO

15-16. Shi ubashala nyeke wa lulamato kudi Yehova, le i bika byokakulupila, ne mwanda waka? (2 Samwele 22:26)

¹⁵ Yehova usakanga tutonge butongi buyampe bwa “kumulamata.” (Kup. 30:​19, 20) Shi tulonge namino, tukakulupila’mba nandi ukashala nyeke wa lulamato kotudi. (Tanga 2 Samwele 22:26.) Kitatyi kyonso kyotushala ba lulamato kudi Yehova, tukamwabija bukwashi mu makambakano o-onso abwanya kwitutana mu būmi.

¹⁶ Monka motwesambilanga’kyo, tudi na bubinga bwa kushala bashimatyije mu makambakano pamo bwa ñanga. Tuyukile amba Yehova witusenswe kadi witukwatakanyanga. Ne bino byo bifundija Bible. Shi ketutatana buswe bwaetusenswe, tulangulukilei pa byotuyukile amba byo bya bine pa kyaba kya mwiivwanino wetu umweka bu wa bine. Nanshi tukulupilei nyeke bubine bwa kyalwilo bwa mu Bible bwa amba, buswe bwa ndamatyidile bwa Yehova bulādilanga nyeke.