Le Bibwanika Kupwa Bukondame mu Myanda ya Misokwe?
Bantu ba mu matanda mavule i batankuke mu bipito, bapela bukondame bumweka mu myanda ya misokwe. Bukondame mu myanda ya misokwe i buvudile’ko muno mu kipupo kya COVID-19, ne kulengeja bantu kutomboka, pano pekele myanda ya kwishityila pamo, kipupo kya nzala, ne kusakana kwa bundapi, kubweja’ko kina pa bukata bwa mpeta ne mulanda.
Lelo uno mwanda wa misokwe ukambakanya ntanda ubwanya kupwa? En-en, ubwanya kupwa. Bible ulombola bine bikalonga Leza pa kupwa uno mwanda’u.
Byobya bikalonga Leza pa kupwija myanda ya misokwe
Mwanda: Bantu i bakomenwe kutūla’ko mumweno wa misokwe uvuija bisakibwa bya bantu bonso.
Moukapwila: Leza ukapingakanya imbikalo ya bantu na wandi, witwa bu Bulopwe bwa Leza. Ukaludika ntanda yonso ao mūlu.—Danyele 2:44; Mateo 6:10.
Bikalupuka’ko: Bulopwe bwa Leza byobukaludika ntanda yonso, bukendeja myanda ya bantu mu muswelo mubwaninine. Bantu kebakikabikalwapo na bulanda nansha na kukoma kwa misokwe. (Ñimbo ya Mitōto 9:7-9, 18) Ino, bakemwena mfutwa ya mingilo yabo kadi bisaka byabo bikekala mu būmi bwa kuloelelwa. Bible ulaya’mba: “Bakobakanga mobo ne kwikala’mo, kadi bakadimanga madimi a mañanza ne kudya bipa byao. Kebakobakapo amba muntu ungi ekale’mo, nansha kudima’mba bantu bakwabo badye.”—Isaya 65:21, 22.
Mwanda: Bantu kebabwanyapo kwepuka bintu bileta masusu ne bufudile.
Moukapwila: Leza, kupityila ku Bulopwe bwandi, ukafundula bintu byonso bilengeja moyo ne kubulwa mutyima-ntenke.
Bikalupuka’ko: Mu buludiki bwa Leza, bantu kebakatanwapo monka na bintu bibanyoñomona bisakibwa byabo. Kimfwa, mavita, kipupo kya nzala ne kya misongo kebikekala’kopo monka. (Ñimbo ya Mitōto 46:9; 72:16; Isaya 33:24) Leza unena’mba: “Bantu bami bakekala mu kifuko kya ndoe kya nyeke, mu bīkalo bya mutyima-ntenke ne mu bifuko bya kukōkolokwa bya ku matwi talala.”—Isaya 32:18.
Mwanda: Bantu bavudile kumwenwa pa mutwe na bantu ba kwisakila ne ba lwiso.
Moukapwila: Babikalwa ba Bulopwe bwa Leza bakefunda kubadikija tumweno twa bakwabo kumeso kwa twabo.—Mateo 22:37-39.
Bikalupuka’ko: Mu Bulopwe bwa Leza, muntu ense ukamwekeja buswe bwa bwine Leza, bwine “kebukimbangapo tumweno twa abo bwine.” (1 Bene Kodinda 13:4, 5) Bible unena’mba: “Kebakasanshijapo nansha dimo nansha konakanya mu lūlu lwami lonso lujila, mwanda ntanda ikayula buyuki bwa Yehovaa bya binebine pamo bwa mema apūta dijiba.”—Isaya 11:9.
Bible ulombola’mba tudi mu mafuku a mfulo a ino ngikadilo ya bintu ne amba panopano ponka Leza usa kufikidija mulao wandi wa kufudija makambakano onso a misokwe.b (Ñimbo ya Mitōto 12:5) Pano’ko bidi, ubwanya kulwa na makambakano a misokwe na bukwashi bwa misoñanya ya mu Bible. Kimfwa, tala bishinte binena’mba, “Mwa Kwiendejeja na Lupeto Lutyetye mu Būmi” ne “L’argent et vous.”
a Yehova dyo dijina dya Leza monka modilombwedilwe mu Bible.—Ñimbo ya Mitōto 83:18.
b Pa kuyuka mwanda waka ubwanya kukulupila binena Bible, tala kishinte kinena’mba, “Bible—Nsulo ya Bubine Ikulupilwa.”