Le pa Bano Bendeji Utonga’po Wepi?—Le Bible Unena’po Namani?

Kumeso’ku, kusa kwikala mavote mu matanda mavule. Mu kitatyi kya mavote, bantu bekalanga na butongi bwa mvubu bwa kutonga i ani wa kwibendeja.

Le Bible unena’po namani?

Bantu bendeja badi na mikalo

Bible i mutele mikalo idi na bantu bonso bendeja.

• “Kemwakikulupilai bamfumu nansha mwanā muntu kabwanyapo kuleta lupandilo. Umpuya wandi utambanga, aye wajokela ku biloba; enka mu dine difuku’dya milangwe yandi yaoneka.”—Ñimbo ya Mitōto 146:3, 4, kunshi kwa dyani.

Enka ne bendeji bayampe bene bafulanga ku kufwa. Kadi bidi, kebabwanyapo kulonga bukomo amba boba bakebapingakana bendeleje byobya biyampe byobadi balonga.—Musapudi 2:18, 19.

Bible ulombola patōka’mba bantu kebāpangilwepo na bukomo bwa kwiludika abo bene, aa.

• “Muntu wenda kadipo na lupusa lwa kōlola ditabula dyandi.”—Yelemia 10:23.

Pene’pa le kudi muntu ubwanya kwendeja bintu senene dyalelo?

Tala mwendeji mwitabijibwe na Leza

Bible ulombola’mba Leza i mutonge’ko mwendeji umo muyuke’byo kupita bonso kadi ukulupilwa. Uno mwendeji i Yesu Kidishitu. (Ñimbo ya Mitōto 2:6) Yesu ye Mulopwe wa Bulopwe bwa Leza, umbikalo waludika tamba momwa mūlu.—Mateo 6:10.

Le uketabija Yesu akuludike? Bible ulombola patōka mwanda waka uno muludiki i mufwaninwe:

• “Lēmekai mwana [Yesu Kidishitu], kutyina’mba Leza wakafītwa, nabya mukafwila mwishinda, mwanda bulobo bwandi bwakanga bukidibukidi. Ba nsangaji i boba bonso banyemena kwadi.”—Ñimbo ya Mitōto 2:12.

Kino kyo kitatyi kyobe kya kutonga. Bupolofeto bwa mu Bible bulombola’mba Yesu uludikanga tamba mu mwaka wa 1914 ne amba panopano ponka Bulopwe bwa Leza busa kupingakana maludiki onso a bantu.—Danyele 2:44.

Shi usaka kuyukila’ko bivule pa muswelo obwanya kukwatakanya buludiki bwa Yesu, tanga kishinte kinena’mba, “Kwatakanya Bulopwe bwa Leza Tamba’nka Pano!”