Mwanda Waka Politike I Mikalañanye Bantu Bininge?—Le Bible Unena’po Namani?

Ntanda yonso, mizo i milalulule pa mwanda wa politike. Kukwatañana na bukimbi bwalongelwe na kisumpi kītwa bu Pew Research Center mu 2022, “bantu batame 65 pa katwa mu matanda 19, balombwele amba mu matanda abo mudi kubulwa kumvwañana kukatampe pa bukata bwa bantu bakwatakenye bisumpi palapala bya politike.”

Le nobe umwene amba komushikete bantu i beabanye bininge pa mwanda wa politike? Mwanda waka i beabanye? Le bikapwa namani? Tala binena’po Bible.

Ngikadila ikalañanya bantu

Bible wālaile amba mu kino kyetu kitatyi, kitelwa ne bu “mafuku a mfulo,” bantu bavule bakekala na ngikadila keilengejapo bantu bekale mu bumo.

• “Mu mafuku a mfulo kukekalanga bitatyi bya makambakano bikomo ne mwa kulongela. Mwanda bantu bakekala ba kwisanswa abo bene, . . . bapela kumvwañana ko-konso.”—2 Temote 3:1-3.

Bantu bavule baloñanga bukomo amba maludiki endeje biyampe, inoko kebabwenyepo. Bantu ba milangwe mishile na ya buludiki bwendeja, bamonanga’mba i bikomo nansha’mba kebibwanikapo kwingidila nabo pamo mwanda wa kupwija makambakano. Byobya bilupuka’ko bifikidijanga byobya byālaile Bible tamba kala.

• ‘Muntu ubikalanga muntu mwanda wa kumusanshija.’—Musapudi 8:9.

Inoko, Bible ulombola kine kikapwa makambakano—amba i buludiki buludikwa na mwendeji ubwanya kutalula’ko lonso bine bileta makambakano dyalelo.

Mwendeji muyampe utele bantu mutyima

Bible ulombola’mba Yesu Kidishitu ye mwendeji umo kete muyampe. Udi na bukomo, lupusa, ne mutyima wa kuleta bumo ne ndoe mu bantu bonso.

• “Mu mafuku andi, moloke ukamonanga biyampe, kadi ndoe ikavula.”—Ñimbo ya Mitōto 72:7.

• “Mizo yonso ikamwingidila.”—Ñimbo ya Mitōto 72:11.

Yesu i mwendeji muyampe mwanda utele bantu mutyima kadi usakanga kwibakwasha, kutabukidila boba balongelwa bintu na bukondame.

• “Aye ukakūlanga mulanda wabija bukwashi, ne mupēlulwe ne yewa ense wampikwa mukwashi. Ukevwaninanga lusa mupēlulwe ne mulanda, kadi būmi bwa balanda ukebupandijanga. Ukebakūlanga ku malwa ne ku lūma.”—Ñimbo ya Mitōto 72:12-14.

Wifunde myanda mivule itala Bulopwe bwa Leza, ko kunena’mba buludiki bwa mūlu buludikwa na Yesu. Tala muswelo obwanya kumwena mu buno buludiki ne kwibukwatakanya.

• Tala video inena’mba Le Bulopwe bwa Leza I Bika?

• Tanga kishinte kinena’mba “Bulopwe bwa Leza—Umbikalo Wampikwa Majika-Kanwa.”