Kipupo kya Kwimona bu Udi Bunka—Le I Muswelo’ka Obwanya Kulwa Nakyo?

• “Kisengele kipindi kimo kya pa bipindi bibidi bya bantu batame ba mu États-Unis balombola’mba bekondanga na milangwe ya kwimona bu badi bunka, kadi kino i kivule bininge ku bansongwalume.”—Kipupo Kyetu kya Kwimona bu Udi Bunka ne Kwitolwela: Byanenene Dokitele Shayuka pa Kundapwa kwa Makambakano Alupuka ku Muswelo Wikele Bantu na Bantu Bakwabo, mu 2023.

• “[Kitango kya Ntanda Kitala Bukomo bwa Ngitu] kyalombwele amba kibatūla’ko Kisumpi Kitala Mwikadile Bantu na Bantu Bakwabo, mwanda wa kulwa na milangwe ya kwimona bu udi bunka bu kyaka kikatampe ku bukomo bwa ngitu, kukankamika bantu bekale mu kipwano kiyampe na bantu bakwabo, ne kukimba’ko miswelo miyampe ya kundapa milangwe ya kwimona bu udi bunka mu matanda onso, nansha shi i malanda namani.”—Kitango kya Ntanda Kitala Bukomo bwa Ngitu, mu mafuku 15 Kweji 11, 2023.

Bible witupa madingi mayampe etukwasha mwa kwikadila biyampe na bakwetu.

Misoñanya ya mu Bible ibwanya kwitukwasha

Tyepeja mingilo ikulengeja witolwele na bantu bakwabo. Muno mubadilwa ne kwingidija bininge malezo a mīsambo. Ino kimba’ko mikenga ya kupityija kitatyi pamo na bantu mpala na mpala ne kupwana na balunda ba bine.

• Musoñanya wa mu Bible: “Mulunda wa bine ulombolanga buswe kitatyi kyonso kadi i mwanenu mubutulwe mwanda wa bitatyi bya tusua.”—Nkindi 17:17.

Kimba’ko mikenga ya kukwasha bantu bakwabo. Kulongela bantu bakwabo bintu biyampe kekwitulengejangapo’tu enka tupwane nabo kete, ino kwitulengejanga netu twiivwane biyampe mu malango.

• Musoñanya wa mu Bible: “Nsangaji ya kupāna itabukile ya kupebwa.”—Bilongwa 20:35.

Shi usaka kuyukila’ko madingi makwabo a kamweno a mu Bible pa mwa kusambila bulunda buyampe, twela pa site yetu.