Kuvudila’ko kwa Makambakano a Kwimona bu Udi Bunka—Le Bible Unena’ po Namani?

Mungya lapolo imo ya panopano ntanda yonso,a kupwipi kwa muntu umo pa bantu baná, wimonanga bu udi bunka.

• “Kwimona bu udi bunka kubwanya kususula muntu ense, wa myaka yo yonso, ne wa ku kifuko kyo kyonso.”—Chido Mpemba, mukwashi wa mwimaniji wa Mwingilo Utala Bipwano, wa ku Kitango kya Ntanda Kitala Bukomo bwa Ngitu.

Bamo balañanga’mba, kwimona bu udi bunka kususulanga enka banunu ne bantu badi kwa bunka. Ino ako kususulanga ne bankasampe, ne boba kebabelabelapo, bafuke ku makasa, enka ne besongele bene. Kwikala mwitolwele ne kwimona bu udi nka kubwanya kwitubeleka ku ngitu ne mu malango.

• “Kwimona bu udi bunka i kwishile bininge na kwiivwana’tu bibi.” Ye mwanenene Vivek Murthy, Dokitele umo mu États-Unis. Ubweja’ko amba: “Kwitolwela pafula kuletanga kyaka kya lufu mu ludingo lumo na kyokya kitamba ku muntu utoma mfwanka bilole 15 pa difuku.”

Binena’po Bible

Umpangi wetu kasakangapo twikale bantu betolwele. Leza usakanga nyeke bantu basangele biyampe ne kwikala na balunda.

• Musoñanya wa mu Bible: “Leza wānena’mba: ‘Ke biyampepo muntu ekale’nka bunka bwandi.’”—Ngalwilo 2:18.

Leza usakanga twikale balunda nandi. I mulaye amba uketufwena shi tulonge bukomo bwa kufwena kwadi.—Yakoba 4:8.

• Musoñanya wa mu Bible: “Ba nsangaji i boba bayukile amba kudi byobasakilwa ku mushipiditu, mwanda Bulopwe bwa mūlu i bwabo.”—Mateo 5:3.

Leza usakanga tumutōte pamo na bantu bakwabo. Shi tulonga namino, tukekala na nsangaji mivule.

• Musoñanya wa mu Bible: “Twitei mityima batwe bene na bene mwanda wa kwikankamikila ku buswe ne ku mingilo milumbuluke, ne kuleka’byo kwibungila pamo kwetu mpika, . . . ino twikankamikei batwe bene na bene.”—Bahebelu 10:24, 25.

Pa kuyukila’ko bivule bitala pa mwa kulwila na makambakano a kwimona bu udi bunka, tanga kishinte “La solitude à l’ère de la communication.”