Anton Petrus/Moment via Getty Images
KESHAI’NKA KUKESHA!
Le Kusa Kulongeka Panopano Divita dya Ntanda Yonso?—Le Bible Unena’po Namani?
Mu bula bwa myaka 30 ipityilei, bantu bavule badi bamona’mba kipwano kya matanda kidi biyampe, ne amba kyendanga kilumbulukila’ko. Inoko bintu bilongeka ano mafuku bimweka bu bilombola bintu bishile na uno mumweno.
“Bantu baselele mutyima kūlu amba divita dya Gaza dibwanya kutenga ne matanda makwabo, mwanda Isalela ne Hezbollah abashilula kwīlwa ku mukalo wa Isalela na Liban.”—Reuters, 6 Kweji 1, 2024.
“Na bisumpi byandi bya basola bitambañana bulwi ku mitamba mivule ne kushilula kwa mpangiko yandi ya kukabija mabombe a nyukilia, ntanda ya Iran ibaikala bu kyaka kikatampe ku matanda a Kushika—kadi pano i mīlunge na Rusi ne Shine.”—The New York Times, 7 Kweji 1, 2024.
“Mabombe a Rusi akyendelela konakanya ntanda ya Ikrene.”—UN News, 11 Kweji 1, 2024.
“Kuvudila’ko bininge kwa misokwe ne kukomena’ko kwa kibumbo kya divita kya Shine, milangwe ya bantu ba mu Taiwane ya kusanswa bininge muzo, ne kubulwa kumvwañana kwa Beijing ne Washington, bilombola’mba bintu byonso bibwanya kukolomona divita kebidi’ko kala.”—The Japan Times, 9 Kweji 1, 2024.
Lelo kudi binena’po Bible pa kubulwa kumvwañana kwa matanda kotumona dyalelo? Le kuno kubulwa kumvwañana kukatwala ku divita dya ntanda yonso?
Bible wālaile binkumenkume byotumona dyalelo
Bible kālailepo pa bute pa bute divita kampanda mu mavita otumona dyalelo. Inoko, wālaile amba kukekala mavita mu kino kyetu kitatyi, mene akatalula’ko “ndoe pano pa ntanda.”—Kusokwelwa 6:4.
Mukanda wa Danyele wālaile amba “mu kitatyi kya ku mfulo,” kukekala kwīlwa kwa imbikalo ya ino ntanda na ’kwitakika,’ nansha kulwa mwanda wa kutādila ntanda. Mu kuno kwīlwa, imbikalo yadi ya kwingidija byabulwi bikomokomo ne kulupula bintu bivule “byabulēme,” nansha lupeto luvulevule.—Danyele 11:40, 42, 43.
Divita dīya
Bible ulombola’mba ngikadilo ya ino ntanda ikabipila’ko bininge kumeso kwa ayo kulumbuluka. Yesu wālaile amba “kukekala kyamalwa kikatampe kekyaikele’ko kashā tamba ku ngalwilo ya ino ntanda.” (Mateo 24:21) Kino “kyamalwa kikatampe” kikafula ku divita dītwa bu Amakedona, “divita dya difuku dikatampe dya Leza Mwinē Bukomo Bonso.”—Kusokwelwa 16:14, 16.
Inoko divita dya Amakedona kedikonakanyapo bantu, ino dikebapandija. Kupityila ku dino divita, Leza ukafudija bwendeji bwa bantu, bwine bulengeje kwikale mavita mavule a kyonakanya. Pa kuyuka mukatwadila divita dya Amakedona ku ndoe ya nyeke, tanga bishinte bilonda’ko: