Le Mavita Akapwa Kitatyi’ka?—Lelo Bible Unena’po Namani?

“Kino kyo kitatyi kya kwidingila ne kwilēmeka kutyina bintu byakonekelela. Kino kyo kitatyi kya kwifula ne pa mfulo,” mo mwanenene Mulembi wa Bumo bwa Mizo, António Guterres, pa mwanda wa ntanda ya Iran yatambile’dyo Isalela patōkelela mu Dya Mposo mafuku 13 Kweji 4, 2024.

Mavita a mu matanda a mu Moyen Orient i kilomboji’tu kimo kya malwi alwibwa koku ne koku pano pa ntanda.

“Tamba Divita dya Bubidi dya Ntanda, kekulwibwe mavita mavule mabi bininge, kadi bantu midiyala ibidi, ko kunena’mba muntu umo mu bantu baná bekele pano pa ntanda, i batengwe na ano malwi.”—Kitango kya Madingi kya Mizo Kitala Mutyima-ntenke, mafuku 26 Kweji 1, 2023.

Mu matanda mulongekele ano mavita mabimabi mubadilwa ne Isalela, Ngaza, Shidea, Azerbaidja, Ikrene, Sudan, Efiopya, Nijer, Myamar, ne Haiti.a

Le mavita akapwa kitatyi’ka? Le balopwe ba ino ntanda babwanya kuleta ndoe? Lelo Bible unena’po namani?

Ntanda ya mavita

Mavita ayudile pa ntanda dyalelo alombola’mba panopano ponka mavita onso keasa kupwa. Ano malwi afikidijanga bupolofeto bwa mu Bible bwisambila pa kitatyi kyotudi’mo. Bible utela kino kitatyi bu “mvuyo ya ngikadilo ya bintu.”—Mateo 24:3.

• “Mukevwananga mavita ne myanda ya mavita. . . . Muzo ukatamba muzo mukwabo ne bulopwe nabo bulopwe bukwabo.”—Mateo 24:6, 7.

Tanga kishinte “Le Kiyukeno kya “Mafuku a Mfulo,” Nansha “Kyaba kya ku Mfulo” I Kiyukeno’ka?” umone muswelo ufikidila bupolofeto bwa mu Bible pa mavita dyalelo.

Divita dikafudija mavita onso

Bible i mulaye amba mavita a bantu akapwa. Le akapwa namani? Ke na bukomopo bwa bantu, ino i kupityila ku Amakedona, “divita dya difuku dikatampe dya Leza Mwinē Bukomo Bonso.” (Kusokwelwa 16:14, 16) Dino divita dikalengeja Leza afikidije mulao wandi wa kuletela bantu ndoe keidi mpwilo.—Ñimbo ya Mitōto 37:10, 11, 29.

Shi usaka kuyukila’ko bivule pa muswelo ukapwa mavita onso kupityila ku divita dya Leza, tanga kishinte “Le Divita dya Amakedona I Bika?”