Divita dya mu Ikrene Dibatwela mu Mwaka Wadyo wa Bubidi—Le I Lukulupilo’ka Luleta’po Bible?

Dya Butano, Mafuku 24 Kweji 2, 2023, i difuku dya kivulukilo kya bulanda—mwanda mwaka mutuntulu ubabwana na pashilwile divita dya mu Ikrene. Mungya malapolo amo, kudi kintu kya basola 300 000 bene Ikrene ne bene Rusi baipailwe nansha kutapwa bilonda, kadi bimweka bu kudi kintu kya basivile 30 000 bafwile ku dino divita. Inoko, buvule bonso bubwanya kupita’nka ne buno bwatelwa’bu.

Kya bulanda, bimweka bu divita kedyafikile ku mfulo.

• “Pabapite kintu kya mwaka mutuntulu kashā basola ba Rusi batwela mu Ikrene, ne kekudipo kilomboji nansha kimo kilombola’mba luno lwana keludi ku mfulo, aa. I kutupu mutamba nansha umo umweka bu ubwanya kunekenya mukwabo mu bulwi, kadi kekudipo nansha umo udi na mutyima wa kulonda byobya byobomvwañana bya mwa kupwila divita.”—NPR (National Public Radio), 19 Kweji 2, 2023.

Bantu bavule i bavutakanibwe ñeni pa misanshi ne masusu bileta dino divita ne mavita makwabo pa bantu bampikwa mwanda kujokoloka ntanda yonso. Le Bible uleta’po lukulupilo’ka? Le mavita akapwa?

Kudi divita dikapwa mavita onso

Bible utela divita dimo dikapandija bantu, pa kyaba kya kwibonakanya. Dino divita dītwanga bu Amakedona, kadi i beditele ne bu “divita dya difuku dikatampe dya Leza Mwinē Bukomo Bonso.” (Kusokwelwa 16:14, 16) Na dino divita, Leza usa kufudija imbikalo ya bantu mine ikolomona mavita mavule a kyonakanya. Shi usaka kuyuka muswelo ukaleta Amakedona ndoe ya nyeke, tanga bino bishinte:

• “Le Divita dya Amakedona I Bika?”

• “Amakedona I Mwanda Muyampe!”