Lelo Bulopwe bwa Leza I Bika?
Bilondolola Bible
Bulopwe bwa Leza i buludiki budi’ko bine, bushimikilwe na Yehova Leza. “Bulopwe bwa Leza” i butelwe ne bu “Bulopwe bwa mūlu” mu Bible, mwanda buludikilanga mūlu. (Mako 1:14, 15; Mateo 4:17) Nansha byowiifwene na imbikalo ya bantu mu bintu bivule, inoko abo i butabuke ino imbikalo mu mwanda o-onso.
Baludiki. Leza i mutonge Yesu Kidishitu bu Mulopwe bwa Bulopwe, kadi i mumupe lupusa lukatampe kupita lupusa ludi na muntu e-ense ubikele. (Mateo 28:18) Yesu wingidijanga luno lupusa mu muswelo muyampe, mwanda wēlombwele kala’mba i Muludiki ukulupilwa kadi wa lusa. (Mateo 4:23; Mako 1:40, 41; 6:31-34; Luka 7:11-17) Pa kuludikwa na Leza, Yesu i mutonge bantu ba mu mizo yonso, “bakabikalanga bu balopwe pa ntanda” pamo nandi momwa mūlu.—Kusokwelwa 5:9, 10.
Kitatyi. Kwishila na imbikalo ya bantu, ipingakana ou ke ou, ino Bulopwe bwa Leza abo “kebukonakanibwapo nansha dimo.”—Danyele 2:44.
Babikalwa. Muntu yense ulonga byobya bisaka Leza ubwanya kwikala mubikalwa wa Bulopwe bwa Leza, nansha shi i wa kwepi ne mubutwilwe kwepi.—Bilongwa 10:34, 35.
Bijila. Bijila (nansha mbila) ya Bulopwe bwa Leza kebikankejepo’tu enka bibi kete. Bikwashanga babikalwa bekale na mwikadila muyampe. Kimfwa, Bible unena’mba: “‘Sanswa Yehova Leza obe na mutyima obe onso, na muya obe onso, ne na ñeni yobe yonso.’ Ino’i yo mbila itabukile bukatampe kadi yo mibajinji. Ya bubidi, iifwene nayo, i ino: ‘Sanswa mukwenu mowisanshilwe abe mwine.’” (Mateo 22:37-39) Buswe bwa kusanswa Leza ne bakwabo butononanga babikalwa ba Bulopwe balonge bintu mwanda wa kamweno ka bakwabo.
Bufundiji. Nansha Bulopwe bwa Leza byobutūdīle’ko babikalwa babo misoñanya ya peulu, ino kadi bufundijanga bantu mwa kwingidijija ino misoñanya.—Isaya 48:17, 18.
Mwingilo. Bulopwe bwa Leza kebupetejangapo baludiki pa mutwe wa babikalwa. Inoko, bukavuija kiswa-mutyima kya Leza, ne kufikidija mulao wa amba boba bamusenswe bakekala na būmi bwa nyeke mu paladisa pano pa ntanda.—Isaya 35:1, 5, 6; Mateo 6:10; Kusokwelwa 21:1-4.