Le Bible Unena Bika pa Busongi bwa Bantu ba Nkoba Mishile?

Bilondolola Bible

Leza witabije busongi bwa ba mwana-mulume ne mwana-mukaji ba nkoba mishile mwanda nkoba yonso idi mu ludingo lumo ku meso andi. Bible unena’mba: “Leza kadipo ne walemekele ne wapelwile, enhe . . . nansha tu [ke] wa muzo ungi.”—Bilongwa 10:34, 35, Myanda Miyampe ku Bonso.

Tala misoñanya mikwabo ya mu Bible īsambila pa busongi ne kulombola’mba nkoba idi mu ludingo lumo.

Nkoba yonso i mitambe kuntu kumo

Bantu bonso i batambe kudi muntu mubajinji, Adama, ne wandi mukaji Eva, mwine obatela mu Bible bu “inandya bōmi bonso.” (Ngalwilo 3:20) Pa buno bubinga, Bible unena’mba Leza, “wālupwile ku muntu umo mizo yonso ya bantu.” (Bilongwa 17:26) Bantu bonso badi mu kisaka kimo kete nansha shi badi na lukoba’ka. Ino le ukalonga namani shi kusansanya bantu nansha kwisañuna i kutāle koshikete?

Bantu ba tunangu ‘besambilanga pamo’

Nansha busongi bwa bantu ba nkoba mishile byo bwitabijibwe na Leza, inoko bantu bamo kebetabije’bopo. (Isaya 55:8, 9) Shi ukimba kwisonga na muntu wa lukoba lungi, abe ne yewa osaka kwisonga nandi mufwaninwe kulondolola bino bipangujo:

• Le mukalonga namani pa bibwanya kwimunena bantu ba mu kibundi nansha ba mu kisaka?

• Le mukakwasha benu bana namani baleke kwikala na mboloji?

‘Kwisambila pamo’ uno muswelo kubwanya kukwasha busongi bwenu bwendeke.—Nkindi 13:10; 21:5.