Le Bible Unena Bika pa Bwanapabo bwa Kwitongela? Le Leza Ukutungīle bya Kukufikila?
Bilondolola Bible
Leza i mwitulēmeke pa kwitupa bwanapabo bwa kwitongela, bukomo bwa kukwata butyibi batwe bene pa kyaba kya Leza kwitukwatyila’bo nansha kwitutungila bya kulonga. Tala bifundija Bible.
Leza wāpangile bantu mu kyelekejo kyandi. (Ngalwilo 1:26) Kwishila na banyema, balonga bintu’nka na kitetyima, batwe twifwene Umpangi wetu kitatyi kyotumwekeja ngikadila pamo bwa buswe ne boloke. Kadi pamo bwa Umpangi wetu, tudi na bwanapabo bwa kwitongela.
Tubwanya kuyuka mu ludingo kampanda mukekadila būmi bwetu bwa ku meso. Bible witukankamika “kutonga būmi . . . kwivwana diwi dyandi [Leza],” ko kunena’mba kutonga kukōkela misoñanya yandi. (Kupituluka mu Bijila 30:19, 20) Kunena uno muswelo, kwadi kwa kwikala kwampikwa mvubu kadi kubi shi ketwadipo na bwanapabo. Pa kyaba kya kwituningila tulonge byanena, Leza wituzenza’mba: “Yō, shi watele’tu mutyima ku mbila yami! Longa ndoe yobe yadi ya kwikala pamo bwa munonga.”—Isaya 48:18.
Kwikala na būmi buyampe ne kubulwa’bo kekwitutungilwepo. Shi tusaka kwikala na būmi buyampe tufwaninwe kwielela’ko. Bible unena’mba: “Kyonso kibwanya kulonga kuboko kobe, wikilonge na bukomo bobe bonso.” (Musapudi 9:10) Kadi unena’mba: “Mpango ya muntu wa kininga bine ikendeka.”—Nkindi 21:5.
Bwanapabo bwa kwitongela i kyabuntu kilēme kitupele Leza, kitulengejanga tumusanswe na ‘mutyima wetu onso,’ mwanda twi batonge kumusanswa.—Mateo 22:37.
Le Leza ye uludika bintu byonso?
Bible ufundija’mba Leza i mwine bukomo bonso, ne amba i kutupu muntu ubwanya kumukankaja kulonga kintu. (Yoba 37:23; Isaya 40:26) Inoko, kengidijangapo bukomo bwandi mwanda wa kuludika kintu kyo-kyonso. Kimfwa, Bible unena’mba, Leza ‘wēfudile’ kulwa na Babiloni wa kala, walwana na bantu bandi. (Isaya 42:14) Mo monka ne dyalelo, kakankajangapo bantu bengidija bibi bwanapabo bwabo bwa kwitongela mwanda wa kususula bakwabo. Inoko Leza kakebalekapo lonso.—Ñimbo ya Mitōto 37:10, 11.