Mwanda Waka Batumoni ba Yehova Kebendangapo ku Mavita?
Batumoni ba Yehova kebendangapo ku mavita pa mwanda wa bubinga bulonda’ko’bu:
Bakōkelanga Leza. Bible unena’mba, bengidi ba Leza “bakafula bipete byabo ke nkasu” ne kadi “kebakefundepo monka divita.”—Isaya 2:4.
Bakōkelanga Yesu. Yesu wālombwele mutumibwa Petelo amba: “Aluja kipete pokyadi, mwanda boba bonso batekuna kipete bakafwa ku kipete.” (Mateo 26:52) Mu uno muswelo, Yesu wālombwele amba balondi bandi kebakaselapo byabulwi ne kwenda ku divita.
Balondi ba Yesu bakōkelanga mbila yandi ya kuleka kwikala ‘ba ino ntanda’ na kusumininwa kuleka kwikupa ku mutamba o-onso mu myanda ya politike. (Yoano 17:16) Kebalungapo bilonga basola nansha kukankaja boba basaka kutwela mu busola.
Basenswe bakwabo. Yesu wāpele bandi bana ba bwanga mbila ya amba, ‘besanswe abo bene na bene.’ (Yoano 13:34, 35) Mu uno muswelo, bādi ba kubunda kisaka kya ntanda yonso kya bana na bana mwine kemudipo muntu nansha uno wa kulwa divita na mwanabo.—1 Yoano 3:10-12.
Balondanga kimfwa kya bene Kidishitu babajinji. Dibuku Encyclopedia of Religion and War dinena’mba: “Balondi ba Yesu babajinji bādi bapela kulwa divita ne kutwela mu mwingilo wa busola,” kadi bādi bamona bino bilongwa bu “kebikwatañenepo na musoñanya wa Yesu wa kwisanswa ne na mbila ya kusanswa walwana nobe.” Peter Meinhold mufundi wa teoloji mwine Alemanye, wānenene nandi bitala balondi babajinji ba Yesu amba: “Byadi bikomo kwikala mwine Kidishitu koku nako kadi wi sola.”
Muswelo obakwashanga bakwabo
Batumoni ba Yehova i bekadi bayampe kadi ke byakapo mu mwanda utala mutyima-ntenke wa mu matanda mobashikata. Tulēmekele balupusa, enka na munenena ino mbila ya mu Bible:
“Muntu ense akōkele bininge ba lupusa batabukile bukatampe.”—Bene Loma 13:1.
“Nanshi, futai bintu bya Kesala kudi Kesala, ino bintu bya Leza nabyo kudi Leza.”—Mateo 22:21.
O mwanda tukōkelanga bijila, tufutanga musonko, ne kwingidila pamo na balupusa mwanda wa kukwatakanya bukomo bobalonga bwa kukinga bekadi.