Le I Majina a Bāni Alembelwe mu “Mukanda wa Būmi”?

Bilondolola Bible

Mu “mukanda wa būmi” witwa ne bu “muvungo wa būmi” nansha bu “mukanda wa kivulukilo,” mudi majina a bantu badi na dyese dya kupebwa kyabuntu kya būmi bwa nyeke. (Kusokwelwa 3:5; 20:12; Malaki 3:16) Leza ulembanga’mo majina a bantu bamukōkele.—Yoano 3:16; 1 Yoano 5:3.

Tamba ku “ñanjilo ya ntanda” ya bantu, Leza ulamine bengidi bandi bamulamete mu luté lwandi, enka bwa aye ulembela majina abo mu mukanda. (Kusokwelwa 17:8) Mobimwekela Abele muntu wa kikōkeji, i muntu mubajinji wālembelwe dijina dyandi mu mukanda wa būmi. (Bahebelu 11:4) Inoko, mukanda wa būmi ke mulongopo’tu wa majina bitupu, mwanda witulombola amba Yehova i Leza wa buswe “uyukile bandi.”—2 Temote 2:19; 1 Yoano 4:8.

Le majina abwanya kubulwa mu “mukanda wa būmi”?

En-en. Leza wānenene pa mwanda wa bantu bampikwa kikōkeji ba mu Isalela wa kala amba: “Yewa ense umpile mambo, ye onkabula mu mukanda wami.” (Divilu 32:33) Inoko shi twikale nyeke bakōkele, tukashala nyeke mu “muvungo wa būmi.”—Kusokwelwa 20:12.