Le Bible Upeleja Kwisangaja kwa Kusambakena Pamo?

Bilondolola Bible

Pa kyaba kya kupeleja kwisangaja kwa kusambakena pamo, aye Bible unena’mba i kyabuntu kyobapele bantu besongele kudi Leza. Wāpangile bantu, “mwana-mulume ne mwana-mukaji,” ne kumona byonso byaāpangile amba “byādi biyampe mpata.” (Ngalwilo 1:27, 31) Paālungile ba mwana-mulume ne mwana-mukaji mubajinji mu busongi, wānene amba “bakekala ke ngitu imo.” (Ngalwilo 2:24) Kino kijimba kyādi kilomba kwisangaja na kusambakena pamo ne kwita mutyima mu ñeni.

Bible ulombola nsangaji ikalanga na balume mu busongi panena’mba: “Sangala pamo na mukaji wa busongwalume bobe . . . Mabele andi akusangaje kitatyi kyonso. Ukokwe na buswe bwandi kyaba kyonso.” (Nkindi 5:18, 19) Kadi Leza usakanga bakaji basangēle mu kusambakena pamo. Bible unena’mba: “Mulume ape mukajandi kyokya kimufwaninwe, mukaji nandi alongele monka kudi mulumyandi.”—1 Bene Kodinda 7:3.

Misoñanya itala kusambakena pamo

Kudi Leza, boba bafwaninwe kusambakena pamo i enka bantu besongele kete. Bahebelu 13: 4 unena’mba: “Busongi bulēmekibwe na bonsololo, ne butanda bwa buluo nabo bwikale bwampikwa disubi, mwanda Leza ukatyibilanga ba busekese ne ba makoji mambo.” Balume ne bakaji bafwaninwe kwilamata ne kulama mpiko yobepikīle. Kebakatanapo nsangaji mikatampe na kukimba kwisangaja enka abo bene, ino i na kwingidija musoñanya wa mu Bible wa amba: “Nsangaji ya kupāna itabukile ya kupebwa.”—Bilongwa 20:35.