Le Dyabola Ubwanya Kuludika Bantu?

Bilondolola Bible

Dyabola ne bandemona badi na lupusa lukatampe pa bantu, o mwanda Bible unena’mba: “Ino ntanda yonsololo idi mu lupusa lwa yewa mubi.” (1 Yoano 5:19) Bible ulombola muswelo wingidijanga Dyabola lupusa lwandi pa bantu.

• Bongojani. Bible ukankamikanga bene Kidishitu ‘bemanije pototo ku bilongwa bya bukosoke bya Dyabola.’ (Bene Efisesa 6:11) Kilongwa kyandi kimo kya bukosoke i kya kongola bantu bakulupile amba bengidi bandi i bengidi ba Leza.—2 Bene Kodinda 11:13-15.

• Majende. Dyabola ongolanga bantu kupityila ku babuka na bibanda, bilumbu, ne bantu babuka lubuko nansha babuka na ñenyenye. (Kupituluka mu Bijila 18:10-12) Kutoma bitomibwa bikolwañana, mitāmu, ne manwa a kulanguluka kufika ne byojimina mu ñeni bilengejanga bantu bengidijibwe na bandemona.—Luka 11:24-26.

• Kipwilo kya bubela. Bipwilo bifundija mfundijo ya bubela byongolanga bantu baleke kukōkela Leza. (1 Bene Kodinda 10:20) Bible utela ino nkulupilo ya bubela bu “mfundijo ya bandemona.”—1 Temote 4:1.

• Kukwatwa na bibanda. Mu Bible i mulembwe bantu bākwetwe na mishipiditu mibi. Kyaba kimo bantu bādi bakwatwa na bandemona bādi bebasaba meso, ne kwibalengeja bekale batumama nansha kwibatapija bilonda.—Mateo 12:22; Mako 5:2-5.

Mwa kunyemena lupusa lwa Dyabola

Kufwaninwepo kutyina bandemona, mwanda Bible unena’mba ubwanya kulwa na Dyabola:

• Shi ujingulule bintu bingidija Dyabola mwanda wa ‘wilwe manwa andi.’—2 Bene Kodinda 2:11.

• Shi wikale na buyuki bwa mu Bible ne kwingidija byowifunda. Kwingidija misoñanya ya mu Bible kukakukinga ku lupusa lwa Dyabola.—Bene Efisesa 6:11-18.

• Shi utalule kintu kyo-kyonso kikwatañene na mingilo ya bandemona. (Bilongwa 19:19) Mu bino bintu mubadilwa minjiki, mabuku, mapepala, matabulo, ne mavideo akankamika bya majende.