Le Mushipiditu Ujila I Bika?
Bilondolola Bible
Mushipiditu ujila i bukomo bwa Leza bwingila. (Mika 3:8; Luka 1:35) Leza utumanga mushipiditu wandi, watūkija bukomo bwandi pa kifuko kyo-kyonso mwanda wa kufikidija kiswa-mutyima kyandi.—Ñimbo ya Mitōto 104:30; 139:7.
Mu Bible, kishima “mushipiditu” i kyalamunwe ku kishima kya Kihebelu ruʹach ne kya Kingidiki pneuʹma. Divule dine bino bishima bifunkilanga pa bukomo bwa Leza bwingila, nansha mushipiditu ujila. (Ngalwilo 1:2) Inoko, kadi Bible i mwingidije bino bishima mu buno buluji bukwabo:
Umpuya.—Habakuka 2:19; Kusokwelwa 13:15.
Luvula.—Ngalwilo 8:1; Yoano 3:8.
Bukomo bupa bipangwa būmi, bwibikwasha byende.—Yoba 34:14, 15.
Mwikadila wa muntu nansha mumweno wandi.—Umbadilo 14:24.
Bantu ba ku mushipiditu, kimfwa Leza ne bamwikeulu.—1 Balopwe 22:21; Yoano 4:24.
Ino nshintulwilo idi na buluji bwa kintu kekimonwepo na bantu ino kilupula bintu bimweka. Dibuku dimo dya Williame Vine (An Expository Dictionary of New Testament Words) dinena’mba: Mu muswelo umo onka, mushipiditu wa Leza, “pamo bwa luvula, keumwekangapo, keutengibwangapo kadi udi na bukomo.”
Kadi Bible utela mushipiditu ujila wa Leza bu “makasa” andi nansha “minwe” yandi. (Ñimbo ya Mitōto 8:3; 19:1; Luka 11:20; dingakanya na Mateo 12:28) Monka mwingidijijanga sendwe makasa ne minwe pa kwingila mingilo yandi, Leza nandi wāingidije mushipiditu wandi, walonga:
Diulu ne ntanda.—Ñimbo ya Mitōto 33:6; Isaya 66:1, 2.
Bible.—2 Petelo 1:20, 21.
Bingelengele byālongele bengidi bandi ba pa kala ne kusapula kobasapwile na bukankamane.—Luka 4:18; Bilongwa 1:8; 1 Bene Kodinda 12:4-11.
Ngikadila milumbuluke ilombolwanga na bantu bamukōkele.—Bene Ngalatea 5:22, 23.
Mushipiditu ujila ke muntupo
Bible patela mushipiditu wa Leza bu “makasa” andi nansha “umpuya,” ulombola’mba mushipiditu ujila ke muntupo. (Divilu 15:8, 10) Makasa a sendwe keabwanyapo kwingila ao mene pampikwa kwingidija ñeni ne umbidi, mushipiditu wa Leza nao uloñanga’nka byobya byawiuludika kulonga. (Luka 11:13) Kadi Bible udingakanya mushipiditu wa Leza na mema ne kwiukwatañanya na bintu pamo bwa lwitabijo ne buyuki. Kuno kudingakanya konso kulombola’mba mushipiditu ujila keumwekangapo.—Isaya 44:3; Bilongwa 6:5; 2 Bene Kodinda 6:6.
Bible i mutele dijina dya Yehova Leza ne dya wandi Mwana, Yesu Kidishitu; ino katelelepo dijina dya mushipiditu ujila pantu nansha pamo. (Isaya 42:8; Luka 1:31) Shitevani mwine Kidishitu wāfwile pampikwa mwanda, bāmupele mu kingelengele kimonwa kya momwa mūlu, wāmona’nka bantu babidi kete, ke basatupo. Bible unena’mba: “Aye, byaadi muyulwe mushipiditu ujila, watala mūlu sō wamona ntumbo ya Leza ne Yesu wimene ku kuboko kwa lundyo kwa Leza.” (Bilongwa 7:55) Mushipiditu ujila i bukomo bwa Leza bwingila, bwine bwāpele Shitevani bukomo bwa kumona kimonwa.
Milangwe mifwe pa mushipiditu ujila
Milangwe mifwe: “Mushipiditu ujila” i muntu, kadi ubadilwa mu Busatu Busantu, monka mokilombwedilwe mu 1 Yoano 5:7, 8 mu Bible wa King James.
Bubine: Mu Bible wa King James i banene’mo mu 1 Yoano 5:7, 8 amba “mūlu, Tata, Kinenwa, ne Mushipiditu Ujila: bonso basatu i umo. Kadi kudi basatu basapula bukamoni pano pa ntanda.” Inoko bakimbi basokwele amba bino binenwa kebyālembelwepo na mutumibwa Yoano ne amba ke bya mu Biblepo. Polofesele Bruce Manning Metzger wālembele amba: “Bino binenwa i bilembwa bya tumiketo kadi kebifwaninwe kutanwa mu Kipwanino Kipya.”—A Textual Commentary on the Greek New Testament.
Milangwe mifwe: Bible utela mushipiditu ujila bu muntu, ne kino kilombola’mba i muntu.
Bubine: Kyaba kimo Bible utelanga mushipiditu ujila bu muntu, inoko kino kekilombolapo amba mushipiditu ujila i muntu. Kadi Bible utelanga ne tunangu, lufu, ne bubi bu muntu. (Nkindi 1:20; Bene Loma 5:17, 21) Kimfwa, Bible unena’mba tunangu tudi na “mingilo” ne “bana” ne amba bubi bongolañananga, bwipaya, ne kulonga bintu na makomwa-meso.—Mateo 11:19; Luka 7:35; Bene Loma 7:8, 11.
Mu muswelo umo onka, mutumibwa Yoano paāpitulukile mu binenwa bya Yesu, wātelele mushipiditu ujila bu “mukwashi” uleta bukamoni, buludiki, wisamba, wivwana, usapula, utumbija, ne utambula.—Yoano 16:7-15; Yoano 14:16, 17.
Milangwe mifwe: Kubatyijibwa mu dijina dya mushipiditu ujila kulombola’mba mushipiditu i muntu.
Bubine: Kyaba kimo Bible wingidijanga kishima “dijina” mwanda wa kulombola bukomo nansha lupusa. (Kupituluka mu Bijila 18:5, 19-22; Eseta 8:10) Ye mobekingidijanga ne mu bishima bya Kiluba’mba “mu dijina dya kijila,” bine kebilombolapo amba kijina i muntu. Muntu ubatyijibwe mu “dijina dya ” mushipiditu ujila uyukile bukomo budi na mushipiditu ujila ne mwingilo owingila pa kufikidija kiswa-mutyima kya Leza.—Mateo 28:19.
Milangwe mifwe: Batumibwa ba Yesu ne bana ba bwanga bakwabo babajinji bādi bakulupile amba mushipiditu ujila i muntu.
Bubine: Bible kanenenepo uno muswelo, nansha ke mānga mine. Dibuku dimo Encyclopædia Britannica dinena’mba: “Nshintulwilo ya amba Mushipiditu Ujila i muntu wa ku mushipiditu wapala . . . yātambile ku Kitango kya mu Koshitantinopele mu 381.” Kyālongekele myaka 250 ne musubu pa kupwa kufwa kwa batumibwa.