Mwanda Waka Batumoni ba Yehova I Bashinte Nkulupilo Yabo Imo?

Bible wikalanga nyeke nsulo ya nkulupilo yetu, o mwanda ponso potujadika mwivwanino wetu wa Bisonekwa, tujadikanga ne nkulupilo yetu.a

Kuno kushinta kukwatañene na musoñanya wa mu Bible utanwa mu Nkindi 4:18 unena’mba: “Kashinda ka bantu boloke kadi pamo bwa kitōkeji kya lubanga kyeñenya kyenda kibaila’ko kufika ne bikanda dyuba mu mitwe.” Penda palupula Dyuba kitōkeji bityebitye, bintu nabyo byendanga bimwekela’ko senene. Mo monka ne Leza nandi, utōkejanga mwivwanino wa bubine bwa ku mushipiditu bityebitye, pa kitatyi kifwaninwe. (1 Petelo 1:10-12) Bible wālaile amba ukalonga kino na kampeja bukidi mu “kitatyi kya ku mfulo.”—Danyele 12:4.

Kuno kujadikwa kwa mwivwanino wetu kekufwaninwepo kwitutulumuja nansha kwitukambakanya mu ñeni. Batōtyi ba Leza ba pa kala nabo bādi na milangwe mifwe kadi bādi batengela bintu bya bubela, o mwanda nabo bādi basakilwa kujadika mumweno wabo.

• Mosesa wētūdile aye mwine bu mukudi wa muzo wa Isalela myaka 40 kumeso kwa kitatyi kyādi kitungile Leza kya kwikala’bo.—Bilongwa 7:23-25, 30, 35.

• Batumibwa bātuninye kwivwanija bupolofeto butala lufu ne lusangukilo lwa Meshiasa.—Isaya 53:8-12; Mateo 16:21-23.

• Bene Kidishitu ba mu myaka ya katwa kabajinji bādi na milangwe ya bubela pa bitala “difuku dya Yehova.”—2 Bene Tesalonika 2:1, 2.

Mwenda mafuku Leza wālemunwine mwivwanino wabo, kadi tulomba’mba endelele kulonga enka namino ne kotudi.—Yakoba 1:5.