Le Kiyukeno kya “Mafuku a Mfulo,” Nansha “Kyaba kya ku Mfulo” I Kiyukeno’ka?
Bilondolola Bible
Bible utela bintu ne ngikadilo yadi ya kulombola “mvuyo ya [ino] ngikadilo ya bintu,” nansha “mfulo ya pano pa ntanda.” (Mateo 24:3, Dibuku Dijila) Bible utela kino kitatyi bu “mafuku a mfulo” ne bu “kitatyi . . . kya ku mfulo,” nansha “kyaba kya ku mfulo.” (2 Temote 3:1; Danyele 8:19, Mukanda Ukola) Bintu bimo bya mu bupolofeto bilombola mafuku a mfulo nansha kyaba kya ku mfulo i bino:
Mavita mu bipindi bivule bya ntanda.—Mateo 24:7; Kusokwelwa 6:4.
Kipupo kya nzala.—Mateo 24:7; Kusokwelwa 6:5, 6.
Kutenkana kukatampe kwa ntanda.—Luka 21:11.
Bipupo bya misongo, nansha bipupo “bya mba mikatampe.”—Luka 21:11, Contemporary English Version
Kuvudila’ko kwa bibi.—Mateo 24:12.
Konwa kwa ntanda na bantu.—Kusokwelwa 11:18.
Koneka kwa ngikadila ya bantu, kumwekela ku bantu bavule “bampikwa kufwija’ko, ba kubulwa lulamato, . . . bapela kumvwañana ko-konso, bavubavuba, ba kubulwa kwīfula, ba bukalabale bwa malwa, bampikwa kusanswa buyampe, ba kwaba bakwabo, ba mitwe myūmu, bayule mitatulo.”—2 Temote 3:1-4.
Kupomoka kwa bisaka, bantu “bampikwa kisanso kya bumuntu,” bana nabo “bampikwa kukōkela bambutwile.”—2 Temote 3:2, 3.
Buswe bwa kuswa Leza butalela’ko mu bantu bavule.—Mateo 24:12.
Buzazangi bukatampe bwa bipwilo.—2 Temote 3:5.
Kuvula kwa buyuki bwa bupolofeto bwa Bible, enka ne bobwa butala mafuku a mfulo.—Danyele 12:4
Kusapulwa kwa myanda miyampe ya Bulopwe ntanda yonso.—Mateo 24:14.
Kupelwa ne kufutululwa kwa bukamoni bulombola’mba mfulo keidi pabwipi.—Mateo 24:37-39; 2 Petelo 3:3, 4.
Kufikidila kwa buno bupolofeto bonso kya pamo, ke butyetyepo nansha buvule, ino bonso.—Mateo 24:33.
Le tudi mu “mafuku a mfulo”?
En-en. Ngikadilo idi’mo ntanda ne mbadilo ya bitatyi bya mu Bible bilombola’mba mafuku a mfulo ashilwile mu 1914. Mu uno mwaka, Bulopwe bwa Leza bwashilwile kuludika momwa mūlu, kadi kintu kibajinji kyobwalongele i kupanga Satana Dyabola ne bandemona momwa mūlu, ne kwibalengeja bengile mingilo yabo enka pano pa ntanda. (Kusokwelwa 12:7-12) Lupusa ludi na Satana pa bantu lubwanya kumweka mu ngikadila ne bilongwa bibi bivule bine bilengeja mafuku a mfulo ekale bu “bitatyi bya makambakano bikomo ne mwa kulongela.”—2 Temote 3:1.