Le Batumoni ba Yehova Bamonanga Namani Dilubu?
Batwe Batumoni ba Yehova tulamete ku muswelo umonga Bible busongi ne dilubu. Leza wātūdile’ko busongi bu kipwano kya nyeke pa bukata bwa mwana-mulume ne mwana-mukaji. Bisonekwa bileta lupusa lwa kwilubula enka shi umo walonga makoji.—Mateo 19:5, 6, 9.
Lelo Batumoni bakwashanga boba badi na makambakano mu busongi?
En en, twibakwashanga mu miswelo mivule:
Kupityila ku mabuku. Tuletanga’mo kyaba ne kyaba bufundiji bubwanya kukomeja masongi, kubadila’mo ne oa amweka bu adi matekele kutēma. Kimfwa, tala bino bishinte, “Tenir son engagement envers son conjoint,” “Comment pardonner,” ne kishinte “Comment rétablir la confiance entre conjoints.”
Ku kupwila. Ku kupwila kwa pa kipwilo, ku bitango bya ntanda ne bya kipindi twisambilanga’ko pa madingi a kamweno aleta Bible pa busongi.
Kupityila ku bakulumpe. Bakulumpe pa bipwilo bakwashanga muntu yense musonge nansha musongwe, ate mutyima bininge ku bisonekwa pamo bwa Bene Efisesa 5:22-25.
Le bakulumpe babwanya kudingila Kamoni elubule na mwinē pandi?
Aa. Nansha bakulumpe byobalombwanga madingi na besongele batanwa na makambakano mu busongi bwabo, inoko bakulumpe kebadipo na lupusa lwa kwibakwatyila butyibi pa kyabo kyaba. (Bene Ngalatea 6:5) Mungya Bisonekwa, shi muntu wakwata butyibi bwa kwilubula na mwinē pandi pampikwa bubinga bwa mu Bisonekwa, nabya kadipo na lupusa lwa kusonga nansha kusongwa monka.—1 Temote 3:1, 5, 12.
Le Batumoni bamonanga namani kusansana?
Bible ukankamika bonso besongele bashikatyile pamo nansha ke mu bitatyi bya makambakano makatampe mwine. (1 Bene Kodinda 7:10-16) Makambakano amo abwanya kupwa’tu na milombelo ya na mutyima umo, na kwingidija misoñanya ya mu Bible, ne na kwilombola buswe.—1 Bene Kodinda 13:4-8; Bene Ngalatea 5:22.
Inoko shi kubalupuka mwanda mukomo bininge pamo bwa ino itelelwe kunshi’i, bene Kidishitu bamo bakwete butyibi bwa kusansana na benē pabo:
Kupela kukwatakanya kisaka ku kusaka.—1 Temote 5:8.
Kusanshijibwa bibibibi ku ngitu.—Ñimbo ya Mitōto 11:5.
Kutūla būmi bwa ku mushipiditu mu kyaka. Kimfwa, umo pa boba besongele ubwanya kuningila mwinē pandi Kamoni atyumune misoñanya ya Leza, mwine obaningila’wa ubwanya kukwata butyibi bwa amba muswelo umo’tu kete wa “kukōkela Leza bu mulopwe kupita’ko bantu” i kusansana na mwinē pandi.—Bilongwa 5:29.