Le ‘Kulēmeka Shobe ne Inobe’ Kushintulula Bika?
Bilondolola Bible
Musoñanya wa amba “Lēmeka shobe ne Inobe” utanwa divule mu Bible. (Divilu 20:12; Kupituluka mu Bijila 5:16; Mateo 15:4; Bene Efisesa 6:2, 3) Ulomba kulonga bintu biná bikatampe.
Kwibafwije’ko. Ukalombola’mba ulēmekele ba shobe ne inobe shi wibafwija’ko pa byonso byobakulongela. Ubwanya kulombola’mba wibafwijanga’ko shi umona buludiki bwabo na mvubu. (Nkindi 7:1, 2; 23:26) Bible ukukankamika umone bambutwile bobe bu “ntumbo” yobe, ko kunena’mba kwibetemba.—Nkindi 17:6.
Kwitabija lupusa lwabo. Nakampata pokidi mwanuke, ukalēmeka ba shobe ne inobe shi witabija lupusa lwibapele Leza. Kisonekwa kya Bene Kolose 3:20 kinena bankasampe amba: “Kōkelai bambutwile benu mu byonso, mwanda kino’ki kisangajanga Mfumwetu.” Nansha ke Yesu paādi nkasampe wādi ukōkele bambutwile bandi.—Luka 2:51.
Kwibalēmeke. (Bene Levi 19:3; Bahebelu 12:9) Divule dino bulēme bumwekelanga mu byonena ne ku muswelo owibinena. Shako kyaba kimo bambutwile bamo baloñanga bintu mu muswelo ubwanya kulengeja bana bakomenwe kwibalēmeka. Nansha nabya, bana babwanya kulēmeka bambutwile babo na kuleka kwisamba ne kulonga bintu na kibengo. (Nkindi 30:17) Bible ufundija’mba kwisamba na tata nansha na mama bya kibengo i kujilula kukatampe.—Mateo 15:4.
Kuvuija bisakibwa byabo. Shi bambutwile bobe ke banunu, basakilwa padi kukwatakanibwa. Ubwanya kwibalēmeka na kulonga bukomo bwa kuyuka shi badi na byobasakilwa. (1 Temote 5:4, 8) Kimfwa, kumeso’tu kwa lufu lwandi, Yesu wākwete’ko mpangiko ya mwa kukwatakenya inandi.—Yoano 19:25-27.
Milangwe ya bubela pa mwanda utala kulēmeka shobe ne inobe
Mulangwe wa bubela: Shi ulēmekele ba shobe ne inobe, ufwaninwe kwibaleka bendeje busongi bobe.
Bubine: Bible ufundija’mba kijimba kya busongi i kitabuke kipwano kya mu kisaka. Ngalwilo 2:24 unena’mba: “Mwana-mulume ukashiya shandi ne inandi kadi ukalamata wandi mukaji, penepo bakekala ke ngitu imo.” (Mateo 19:4, 5) Shako ba mulume ne mukaji babwanya kumwena mu madingi a bambutwile nansha bako. (Nkindi 23:22) Inoko ba mulume ne mukaji babwanya kukwata butyibi bwa kwitūdila’ko mikalo pa mwanda utala kutweja babutule mu busongi bwabo.—Mateo 19:6.
Mulangwe wa bubela: Ba shobe ne inobe badi na lupusa lonso.
Bubine: Nansha Leza byapele bambutwile lupusa mu kisaka, lupusa lonso lwa bantu ludi na mikalo, keludipo pangala pa lupusa lwa Leza. Kimfwa, kidye kikatampe pokyāsoñenye bana ba bwanga ba Yesu baleke kukōkela Leza, abo bālondolwele amba: “Tufwaninwe kukōkela Leza bu mulopwe kupita’ko bantu.” (Bilongwa 5:27-29) Muswelo umo onka, bana bakōkelanga bambutwile babo “mu bumo na Mfumwetu,” ko kunena’mba mu bintu byonso kebijilulapo bijila bya Leza.—Bene Efisesa 6:1.
Mulangwe wa bubela: Kulēmeka shobe ne inobe i kulonda nkulupilo yabo ya kipwilo.
Bubine: Bible witukankamika tutompe byobya byobetufundija mwanda wa kuyuka shi i bya bine. (Bilongwa 17:11; 1 Yoano 4:1) Muntu ulonga namino ubwanya padi kukulupila mwenda mafuku bintu bishile na bikulupile bambutwile bandi. Bible utela bengidi ba Leza bavule ba kikōkeji kebālondelepo mutōtelo wa bambutwile babo, kimfwa, Abalahama, Luta, ne mutumibwa Polo. —Yoshua 24:2, 14, 15; Luta 1:15, 16; Bene Ngalatea 1:14-16, 22-24.
Mulangwe wa bubela: Pa kulēmeka shobe ne inobe, ufwaninwe kulonda bisela bya kutōta bankambo.
Bubine: Bible unena’mba: “Ufwaninwe kutōta Yehova Leza obe, kadi aye kete ye ofwaninwe kwingidila mingilo ikola.” (Luka 4:8) Muntu utōta bankambo wandi kasangajangapo Leza. Ne kadi, Bible ufundija’mba “bafwe kebayukilepo kintu nansha kimo.” Kebayukilepo kulēmeka kobebalēmeka; kadi kebabwanyapo kukwasha bantu bōmi nansha kwibasusula.—Musapudi 9:5, 10; Isaya 8:19.