Lelo shi Muntu Wafu Wikalanga Namani?

Bilondolola Bible

Bible unena’mba: “Bōmi bayukile amba bakafwanga, ino bafwe kebayukilepo kintu nansha kimo.” (Musapudi 9:5; Ñimbo ya Mitōto 146:4) Nanshi, shi tubafu, ketukidi’kopo. Bafwe kebabwanyapo kulanga, kulonga kintu, nansha kwivwana.

“Ukajokelanga ku luvumbi”

Leza wāshintulwile motwikadilanga shi tubafu pāesambile na Adama muntu mubajinji. Adama byākakōkelepo, Leza wāmunenene amba: “Wi luvumbi kadi ukajokelanga ku luvumbi.” (Ngalwilo 3:19) Kumeso kwa Leza kupanga Adama “ku luvumbi lwa biloba,” Adama kādi’kopo. (Ngalwilo 2:7) Muswelo umo onka, pāfwile Adama, wājokēle ku luvumbi, wāleka kwikala’ko.

Ye mwikadilanga ne bantu bafwa dyalelo. Bible wisambila pa bantu ne banyema’mba: “Abo bonso batambile ku luvumbi, kadi abo bonso bajokelanga ku luvumbi.”—Musapudi 3:19, 20.

Lufu ke mfulopo ya bintu byonso

Divule dine Bible udingakanyanga lufu na tulo. (Ñimbo ya Mitōto 13:3; Yoano 11:11-14; Bilongwa 7:60) Muntu udi mu tulo tukatampe, kayukangapo bintu bilongeka. Muswelo umo onka, bafwe nabo kebayukilepo kintu nansha kimo. Inoko Bible ufundija’mba Leza ubwanya kulangula bafwile pamo na mulangwilwanga bantu mu tulo, ne kwibapa monka būmi. (Yoba 14:13-15) Ku boba bakasangulwa na Leza, lufu ke mfulopo ya bintu byonso.