Malondololo ku Bipangujo Byenu

◼ Le bilomba kwifunda mu bula bwa bitatyi binga na mwifundi wa Bible wendelela kumeso?

I biyampe kwifunda na mwifundi wa Bible wendelela kumeso kufika’nka ne byavuya mabuku abidi—I Bika Bine Bifundija Bible? ne ‘Mwilamei mu Buswe bwa Leza.’ Bikalongwa namino nansha shi mwifundi wabatyijibwa kumeso kwa kupwa ano mabuku onso. Kupwa kwa aye kubatyijibwa, tukendelela kulemba nsaa, kujokela’mo kupya, ne kifundwa ku lapolo wetu wa mingilo. Shi musapudi mukwabo i muketutūle’ko ne kwisamba’po kitatyi kyotwendeja kifundwa, nandi ukalemba nsaa.—Tala Mwingilo Wetu wa Bulopwe, Kweji 3, 2009, paje 2.

I biyampe bapya bekale na kyalwilo kiyampe kya bubinebine kumeso kwa kuleka kwifunda nabo. Basakilwa ‘kujika miji’ mudi Kidishitu ne “kukankamikibwa monka mu kwitabija” mwa kwimanina nshinkidingi mu matompo akebatana. (Kol. 2:6, 7; 2 Tem. 3:12; 1 Pet. 5:8, 9) Kadi, kufundija bakwabo biyampe kulomba bafikile pa “kuyūkidija kwa binebine.” (1 Tem. 2:4) Shi tuvuya mabuku abidi na befundi ba Bible, nabya twibakwashanga bekale na kyalwilo kikomo mu ‘dishinda ditwala ku būmi.’—Mat. 7:14.

Kumeso kwa kwitabija muntu amba abatyijibwe, bakulumpe bafwaninwe kujingulula amba wivwanije biyampe bufundiji bwa Bible bwa kyalwilo kadi wingidijanga’bo mu būmi bwandi. Bakulumpe bafwaninwe kutadija bininge kitatyi kyobabandaula mwifundi kapwile dibuku dibajinji dya kwifunda. Shi muntu kabwenye bisakibwa bya kubatyijibwa, bakulumpe bakakwata’ko mpangiko ya kumupa bukwashi bufwaninwe mwanda wa abwanye bisakibwa bya kubatyijibwa mwenda mafuku.—Tala Balongololwe Mwa Kulongela Kiswa-Mutyima kya Yehova, paje 216-218.

[Bushintuludi pa paje 2]

I biyampe bapya bekale na kyalwilo kiyampe kya bubinebine