Malondololo Ku Bipangujo Byenu

◼ I kika kifwaninwe kulongibwa shi mwanetu wa kunena kishinte kya bantu bonso kafikilepo pa kitatyi kibwane ku kupwila?

Myanda kampanda yakubulwa kusaka ikokeja kulengeja mwanetu akomenwe kufika pa kitatyi kitungwe kya kushilula kupityija kishinte. Shi bakulumpe balanga’mba usa kufika pano-pano ponka, bakokeja kutyiba mbila ya kushilula kupwila na kifundwa kya Kiteba kya Mulami; ebiya kupwila kwa bantu bonso kekulonda. Shi i kimweke patōka’mba muneni kakafikapo, nankyo muneni mukwabo wa pa kipwilo ukokeja kupityija kimo kya mu bishinte byakadi mupityije kala.

Mpangiko miteakanye kala senene kumeso ikwashanga divule ku kwepuka ano makambakano. Tutu upelwe kiselwa kya kutandika mpangiko ya baneni ba bishinte bya bantu bonso ufwaninwe kufikila muneni yense upelwe kipindi, yenga umo kumeso, mwanda wa kumuvuluja kishinte kyapelwe. Kadi ukamuvuluja ne nsāa ishilulanga kupwila, adelese ne nimelo ya telefone ya Njibo ya Bulopwe, wamuyukija binangu byonso, mwanda wa amone mwa kukafikila’ko. Muneni ufwaninwe kusoneka na katentekeji buno bulombodi bonso. Ufwaninwe kukwata kipindi kyobamupēle na mutyika bikatampe, ne kukwata mpangiko yonso ifwaninwe, mwanda wa kuvuija kino kiselwa. Shi wātanwa na bikoleja, ufwaninwe kuyukija bukidi-bukidi mwanetu upēlwe kiselwa kya kwabanya bishinte mwanda wa ateakanye mpingakani. Byonso bino bifwaninwe kulongibwa, mwanda kekifwaninwepo, mbó wimene banwe kemulamba bulembe. Shi muneni usa kulondela, ufwaninwe kulonga bukomo bwandi bonso, atume telefone ku Njibo ya Bulopwe mwanda wa kuyukija banabetu, bamone kya kulonga.

Shi baneni ba bishinte i bakwate bipindi byabo na makasa abidi, kadi i kutandikwe kala mpangiko kumeso, ne kudi kuvulujibwa kumeso kwa kitatyi, ne shi kutelwe mutyima, bine kipwilo kikamwena kamweno mu kishinte kya bantu bonso kya ku yenga ne yenga kiloe shēe.